Bideo honek postaz iristen zaizkigun aurkezpenak ekartzen dizkit gogora(eta oso gogoko ez ditut), baina lidergo on baten ezaugarri nagusienak islatzen dituela iruditu zait.
Kategoria: Denetarik
Basquecamp: 1go barcamp euskalduna Larrabetzun
Aurrekoan, IKTerook 1go Basquecamp edo barcamp euskalduna delakoan parte hartzeko gonbidapena jaso genuen Patxi Gaztelumendiren eskutik. Aitortu beharrean nago barcamp terminoa entzunda nuela, baina ez nekiela zehaztasunez zer zen. Gerora jakin dut barcamp horien oinarrian hitzaldi edo elkarrizketa laburrak daudela. Deialdi irekiak dira eta edonork aurkez dezake interesgarria iruditzen zaion edozer, kontuan izanda, noski, web aplikazioez, kode irekiko teknologiaz edo horrelakoez ari garela.
Larrabetzun, ekainaren 7an, hots, datorren larunbatean, eramango da aurrera ekimen berritzaile hau Euskaraz ari garenak batzeko lemapean . Gu ere hantxe izango gara hezkuntzari lotutako esperientzia zehatz bat partekatzeko, baina, batez ere, besteek esaten dutenaz ikasteko. Ekitaldirako sortutako wikian irakur daitekeenez, herritarrak eta teknologia, mapak eta herriak, kale grabazioak , wikipedia, twitxr.com eta mashup azkarrak izango dira hizpide, besteak beste.
Aukera polita, beraz, antolatzaileen helburua lortzeko: batu, sortu eta ikasi ondo pasatuz. Hitzordua: Larrabetzuko gaztetxean, ekainaren 7an, arratsaldeko 18:00etatik aurrera. Gonbidatuta zaude!
BetterGMail2 eta Flip Browser
Nire lanaren zati handi bat interneten burutzen dudanetik nabigatzailea ezinbesteko tresna bilakatu zait. Hainbeste ordu sarean egonda, nire lehentasunetako bat egiten dudan lana ahalik eta emankorrena izatea da. Ikuspegi honetatik, merkatuan dauden nabigatzaileen azterketa egin eta gero Firefoxekin geratzen naiz. Ez dakit kalitate handiena aurkezten duena den baina, nire ustez, bai da norberaren beharretara hobekien egokituko daitekeena. Izan ere, erabiltzen duen gehigarri sistema eta atzean dagoen gehigarrien kopuruarekin, eskura dauzkagun funtzio berriak kontaezinak bihurtzen dira.Gaur gehigarri hauetako biren inguruko informazioa eman nahi dizuet.
BetterGMail2 da lehena. Aspalditik erabiltzen nuen baina Google-ek GMailen atzean dagoen kodea aldatzea erabaki zuenetik, arazoak izan ditut honekin. Bigarren bertsioarekin ere ez naiz batere gustura ibili orain arte. Maiatzaren 22an egin duten eguneraketarekin gauzak berriro doaz niri gustatzen zaidan bezala. Lehenengo bertsioak zituen aukera asko galdu badira ere, orain dituenak primeran funtzionatzen dute. Zer egiten duen jakiteko hobena aurrean utzitako estekari jarraitu eta bertako azalpenak irakurtzea duzue. Dena den, ezin dut aipatu gabe utzi GMaili “soineko” berria ipintzeko aurkezten duen aukera. Ez naiz inoiz izan hondo beltzen zalea baina Redesigned GMail izeneko azala izugarri gustatzen zait. Oso itxura orekatua iruditzen zait, estilo modernokoa eta GMaili etekin oraindik hobea ateratzeko balio duena. Azken hau, adibidez, oso garbi froga dezakezue kontaktuen kudeatzailearekin; askoz ere garbiagoa da orain hauen kudeaketa.
Bigarrena Split Browser da. Esan bezala, geroz eta gehiago erabiltzen ditut web aplikazioak ekoizpen lanetarako. Google Apps-ekin datozen aplikazioei geroz eta astindu handiagoa ematen ari naiz; blog eta wikiekin geroz eta lan gehiago egiten dut… Askotan faltan botatzen dut idazmahaiko ofimatikako aplikazioek eskaintzen duten aukera interesgarri bat, pantaila bi zatitan banatu eta scroll-a batera egiteko aukera, hain zuen ere. Bada gehigarri honek horixe egiten du; nabigatzailea bi leihotan zatitzen du; baten informazio iturriak bisualiza daitezke eta bigarrenean Google Docs irekita eduki dezakegu. Horrela informazioaren kontsulta eta ekoizpena fitxetan saltoka ibili gabe burutu daiteke. Oso gehigarri praktikoa iruditzen zait.
IX. Hik Hasi Udako Topaketa Pedagogikoak
Aurrekoan, IX. Hik Hasi Udako Topaketa Pedagogikoak aurkezteko prentsaurrekora gonbidatu ninduten eta hantxe izan nintzen Hik Hasi Udako Topaketen koorditzatzaile den Joxe Mari Auzmendi eta Josean Urbietarekin (Xirula Mirulako irakaslea). Atzerapen pixka batez bada ere, hementxe natorkizue han hitz egin genuenaren berri eman eta aurreikusi dituzten ikastaroak aurkeztera.
Hasteko, esan beharra dago ez dela IKTerook Hik Hasiko topaketetan parte hartzen dugun lehenengo aldia. Bi urte daramatzate jolaus eta magicek Blogak irakaskuntzan ikastaroa ematen eta iaz ni estreinatu nintzen Wikiak eta webquestak irakaskuntzan delakoarekin. Aurten bat gehiago; izan ere, ikastaro bana emango baitugu:
- Irakaskuntza 2.0: WEB 2.0 baliabideak eta konpetentzia digitala (jolaus)
- Blogak irakaskuntzan (magic)
- Wikiak eta webquestak irakaskuntzan (sei)
Baina gatozen harira. Aurtengoak, esan dudan bezala, IX. Udako Topaketa Pedagogikoak izango dira. HIK HASIk eta EHUko Hezkuntzaren Teoria eta Historia Sailak antolatu dituzte elkarrekin. Uztaileko 1, 2 eta 3ko goizetan 35 ikastaro eskainiko dira, eta arratsaldeetan, berriz, parte hartu nahi duen edonorentzako saio irekiak antolatu dira. Aurreko urteetan bezala, erantzun ona jasoko dutelakoan daude antolatzaileak. Aurtengoan, informatika, hainbat espresio mota, literatura eta abar indartu badituzte ere, ahalegin berezia egin dute heziketa harremanak lantzen eta egoera berrien aurrean jarrerak modu egokian bideratzen lagunduko duten ikastaroak antolatzen.
Prentsaurrekoan Joxe Marik adierazi zuen legez, bi nobedade daude. Nagusia, IMANOL URBIETAren lan pedagogikoa ezagutarazi nahi dutela. Horretarako, ahalegin berezia egingo dute ikastaroa eskainiz. Gainera, berak protagonismo berezia hartuko du sarrera eta amaierako ekitaldietan, euskal hezkuntzari egin dion ekarpena nolabait eskertu nahian. Bestea, Balioen heziketarako ardatzak ikastaroan NANCY CHACON doktore kubatarrak parte hartuko duela.
35 ikastaro aukeran euskaraz
Hezkuntza gaiei buruzko 35 ikastaro eskainiko dira aurten, denak euskaraz (32 ikastaro euskara hutsean eta beste 3 euskaraz eta gaztelaniaz). Guztiak aipatu ezin, eta hona zenbait ikastaroren zertzeladak:
- Imanol Urbieta. Duela berrogei urte jaio zen ildo pedagogiko-musikal horrek gaurko eskola eta ikastoletan balio moderno bezain esanguratsuak bermatzen dituela konbentzituta gaudelako eskaintzen dugu aukera hori.
- Balioak. Bizikidetza. Suizidioa. Gurasoekiko seme-alaben bortizkeria… Ikasleen arteko tratu txarrek, gurasoekiko seme-alaben bortizkeriak eta abarrek alarma piztu dute jendartean. Guraso eta irakasleen arteko harremana beharrezkoa da. Familian gertatzen diren egoera berriek eragiten dute eskolan…
- Hezitzaile-profila, hezkidetza gida. Heziketan, profesionalen prestakuntzan etengabeko hausnarketa ezinbestekoa delako.
- Ahozkotasuna. Letraz, irudiz eta teknologia berriz betetzen ari zaigu ingurua. Hala ere, ahozkotasunak ezinbesteko garrantzia du komunikatzeko orduan.
- Euskal kultura, euskal zibilizazioa… Euskal curriculuma garatzen ari den honetan, lanerako materiala eskuratzea erraztu nahi dugu.
- Adimen emozionala. Coaching. Frogatu da emozioek ikasteko prozesuetan duten garrantzia. Hori bizitzen eta ezagutzen lagunduko dute ikastaro horiek.
- Teknologia Berriak. Informatikak eskaintzen dituen baliabideak ikasgelatan praktikoki erabiltzeko, zazpi ikastaro antolatu dira. Horien artean daude Wikiak, Wequestak, Blogak, Photoshop, Power Point, Scratch… ikastaroak.
- Espresioaren alorra. Alor honetan, hainbat ikastaro eskaintzen dira: Biodantza, Karaokeen sorkuntza, Psikomotrizitatea, Haurrentzako kantu eta Jolasak, Antzerkia edota Marrazketa ikastaroa.
- Lehen mailako prebentzioa edota HUHEZIko Hazitegi proiektua… Haur Hezkuntzak izugarrizko garrantzia du pertsonaren oinarriak finkatzeko orduan. Ikuspuntu desberdinetatik, horretaz arituko dira hainbat ikastarotan.
Noiz eta non
Ikastaro guztiak uztailaren 1, 2 eta 3an izango dira, goizeko 9:00etatik 14:00etara. Egoitzei dagokienez, hiru lekutan banatuko dira nagusiki: Pedagogia Fakultatean (teorikoagoak direnak), Informatika Fakultatean (informatikakoak) eta Ekintza ikastolan (espresiokoak batez ere).
Norentzat
Ikastaroak bereziki irakaskuntzan dabiltzan profesionalei zuzendurik daude: ikastetxeetako irakasleei, musika eskoletako irakasleei, aisialdiko begiraleei, Pedagogiako, Psikopedagogiako, Psikologiako edo Magisteritzako ikasleei, hezkuntza aholkulariei eta abar. Hala ere, interesa duen beste edozeinek ere parte har dezake. Aurtengoan, bereziki, harremanak, bitartekaritza, suizidioa, balioak, irakurzaletasuna, hezkidetza, euskal kultura eta espresioko ikastaroetan jarri dute arreta. Horiek guztiak edonorentzat oso egokiak izan litezke. Matrikula epea maiatzaren 30 arte izango da.
Informazio gehiago edota matrikula egin nahi baduzue, jo ondorengora: HIK HASI
XV. Jardunaldi Pedagogikoak
Urtero lez, Ikastolen Elkarteak antolaturik, Jardunaldi Pedagogikoen XV. edizioa ospatu da Gasteizko Europa Jauregian.
Aurtengo Jardunaldien gaia “Konpetentzietan oinarritutako hezkuntza” izanik, irakaskuntza diardugunontzat oso gai interesgarri eta sakonak jorratu dira hiru egun horietan. Ni, lana dela medio, osteguneko saioetara bakarrik joan nintzen. Hitzaldien egitaraua honako hau izan zen:
Josu Sierra
- Oinarrizko konpetentzien ebaluazioa diagnostiko ebaluazioa E.A.E.n.
- Aurkezpena: Oinarrizko konpetentzien ebaluazio diagnostikoak 4. LH eta 2. DBH-n
Antonio Benitez
- Diagnostiko ebaluazioaren eredua Andaluzian: konpromisorako eta eskola-errendimenduaren hobekuntzarako proposamena.
Neus Sanmartí
- Ebaluatu, ikasteko. Ebaluazioa autoerregulazio-prozesu gisa.
Serafín Dominguez Ruiz
- Diagnostiko ebaluazioari buruzko esperientzia (konpetentzien ebaluazioa).
Ikus dezakezuenez, maila handiko hizlarien artean, ezezagun bat agertu zen, Serafín Dominguez Ruiz, San Sebastian ikastetxeko zuzendaria Palma del Rio – Kordoba. Gehienetan, gisa honetako jardunaldietan ospe handiko hizlarien zain egoten gara eta, aitortu beharra daukat, ni ere horrela joan nintzela. Nire iritziz, hizlari horiek, gutxi gorabehera, espero zitekeena esan ziguten eta ez genuen inongo ustekaberik hartu han entzundakoarekin. Baina Lehen Hezkuntzako Kordobako ikastetxe txiki baten zuzendaria, gehienontzat ezezaguna, izan zen niretzat ustekaberik handiena. Beharbada, han erakutsitakoa ez zen gure gustukoa izango eta, arlo pedagogikoan desadostasun handiak izango nituzke azaldutako planteamenduarekin.
Hori esan eta gero, modu berean, esan beharra daukat zuzendari horrek han erakutsi zigunak izugarrizko balioa duela. Eta berriro insistitu nahi dut, berak defendatutako proiektuarekin desadostasun handiak ditudala. Baina, ikastetxe txiki eta umil baten zuzendariak guztion aurrean erakutsi zigun administrazioak edo argitaletxeek ezartzen dituzten mugen gainetik, ikastetxeok dugun autonomia eta ikas-komunitateko kideen irrika bideratzen direnean, gauza asko egin daitezkeela. Zuzendari harrek transmititzen zuen konbentzimenduak demostratzen zuen, komunitate batek bere proiektuan sinisten duenean eta partaideen inplikazioa bilatzen denean, aurrerapausuak ez emateko horrenbeste errepikatzen diren aitzakiak hori besterik ez direla, aitzakiak.
Behin baino gehiagotan entzun dugu gaur egungo ikasleek ekintzailetza jorratu behar dutela eta jarrera pasiboa alboratu behar dutela, bada horixe izan zen nik Kordobako zuzendariarengandik jaso nuen mezua. Ikastolen sorreran bizi izan zen dinamismoa, errebeldia eta ilusioa gogora ekarri zizkidan. Baina orain burgestuta gaude. Eroso sentitzen gara erantzukizuna besteen esku utzita.
Dena den, ikastolon proiektuan sinisten dugunok asko gara eta, zailtasunak-zailtasun, asko dira duten onena emateko prest daudenak. Horregatik eta gure izaeraren baitan balore horiek errotuta ditugulako, badakit egungo eta etorkizuneko erronkei ausardiz eta pasioz aurre egingo diegula. Bidaia horretan, Kordobako zuzendaria izango dut gogoan.