Hezkuntza munduan aski ezaguna den Ardora aplikazioaren azken bertsioa (2.0) kaleratu berri da. Bertsio berri honetan, jarduerak euskaraz sor ditzakegu. Euskarazko “interfazea” hautatzeko ez dago ezer berezirik egin beharrik. Aplikazio honen bertsio berria jaitsi eta instalazioa burutu ondoren, “idioma” menua sakatu eta Euskara hautatu. Listo!
José Manuel Bouzán Matanza da aplikazioaren egilea eta copyright duen arren, dohain jartzen du guztion eskura. Eskertzekoa da bere jarrera eta bere konpromisoa hizkuntza minorizatuekin. Izan ere, bertsio zaharrean gure hizkuntza propio ezarrita zuen , nork itzuli zain (mezu bat zuen berarekin harremanetan jartzera gonbidatuz). Eta hori da IKTerook egin genuena: harremanetan jarri eta berak bidalitako kateak itzuli genituen. Euskarazko itzulpenaren zain omen zegoen bertsio berri hau kaleratzeko. Gauza polita ezbairik gabe. Orain denok aukera paregabea daukagu ariketak sortzeko.
Aplikazio honen bitartez, 28 ariketa mota ezberdin sor daitezke. Jarduerak 12 ataletan bilduta daude:
- Grafikodun jarduerak
- Hitz-jokoak
- Soinudun jarduerak
- Lotu
- Osatu
- Sailkatu
- Ordenatu
- Testa
- Neurri-unitateak
- Kalkulua
- Eskemak
- Geometria
Informazio gehiago jarduera mota bakoitzari buruz orrian bertan topatuko duzue
Ikus dezakezuenez, aukera anitza eta, nire ustez, oso aproposa informatikaz gutxi dakien edozein irakaslerentzat.
Oharrak: Jarduera bat sortzerakoan, argitaratu egin behar da. Argitaratzean, bi fitxategi azalduko zaizkigu; HTML fitxategia eta JAR (Java) fitxategia. Biak karpeta berean gorde behar ditugu. Ondoren, ezinbestekoa izango da zerbitzari bat sortutako karpeta bertara igotzeko eta jarduera sarean jarri ahal izateko.
Aplikazio honekin sortutako ariketa batzuk (gutxi oraindik) jarri dizkizuegu: Eguzki Sistema, Arauak lantzeko, eta Sinonimoak lantzeko