2005 – IKTeroak

Olentzero hemen da!!!

Intxurre mendiko gailurretik idazten ari naiz, izan ere, Olentzeroren txondorra zaintzea egokitu zait Euskal Herriko haurrak opariz betetzen dituen bitartean. Duela gutxi abiatu da eta, berak esan didanez, aurten Jakintza Ikastolak niretzat jarritako WiFi-ari esker, eskutitzak ez ezik, e-posta ugari jaso omen ditu. Euskal blogosferatik ere eskakizun ugari jaso dituela adierazi didanean, Jolausek eginikoari buruz galdetu diot eta ez ditut oso albiste onak nire lankidearentzat. Olentzero Jaunak esan dit ez dituela horrenbeste opari merezi eta gutxiagorekin konformatu beharko duela.

Kezkatuta jasotako erantzunarekin, eskaera aldatzeko garaiz ote nenbilen galdetu diot eta berak baietz esan dit; post bat idazteko eta bere PDAn irakurriko duela. Horregatik, berandu baino lehen, eskaera berri hau egitera nator:

Olentzero Jauna:

Aurten IKT taldeko kideok oso langile ibili gara eta gure lagun eta senideekin egoteko denbora gehiago eskatu nahi dizugu. Ikastolan abian jarri ditugu proiektuen helburuak lortzea ere eskatu nahiko genizuke. Gure gurdira igo diren ikasleak eta gainontzeko guztiak pertsona arduratsuagoak, libreagoak eta konprometituagoak izatea nahi dugunez, xede horretan eraginkorrak izatea eskatuko genizuke. Bukatzeko, gure ikastolako hezkuntza komunitateko kide guztiontzat urte oparo eta zoriontsua eskatzen dizugu.

Gauza materialetan oso eskaera xumea egingo dizugu: horrenbeste arazoak ematen dizkigun interneteko konexioa konpontzea eta lanean normaltasunez aritzeko konexio bat jartzea besterik ez dugu eskatzen.

Ikusten duzunez, gauza gutxiago eskatzen dizugu nahiz eta lortzen zailagoak diren. Dena den, ahalegin berezi hau egitea eskatzen dizugu, oso ongi jardun baikara ikasturte osoan zehar.

Ea garaiz iristen den.

Jakintzako blogariak Praktika Onen Trukaketan

Atzo Euskalitek antolatutako 400 Klub-eko (Zilarrezko eta Urrezko Q-a dugun erakundeak osatzen dugun foroa) 2. Praktika Onen Trukaketan izan ginen IKTeroak. Iaz jarri zen martxan esperientzia trukatze hau eta, aurten, aurkeztutako praktikek berrikuntzaren arloa izan dute ardatz.

Ideia zera da: erakunde bakoitzak bere ustez interesgarria duen praktika bat erakusten du 15 minutuko aurkezpen batean. Honela, zurea den zerbait ematearekin batera, beste 9 erakunderen (denak goi mailakoak) ideia edo praktika on jasotzen dituzu. Azken finean, IKTerook hainbeste azpimarratzen dugun partekatzearen filosofia dago oinarrian, konpartitzea, nirea den zerbait gurea izatera pasatzea, eta hori benetan atsegin dugu!

Mota guztietako praktikak ikusteko aukera izan genuen: Torniplasak aukeztutako erremintak biltzeko sistema berritzaile bat, Zamudioko Ospitaleak emaitzen berrikusketarako garatutako txostena eta Jesús Obrero ikastetxeak inkestak kudeatzeko SPSS zuhaitzen erabilera berriztatzailea, besteak beste.

Dena den, niri benetan deigarria iruditu zitzaidana da lehen hiru praktika bozkatuenak (Web ataria, pedagogia eta komunikazio tresna; Elkarrekin lan eginaz eta gozatuz, matematika ikasi eta Webloga erabiliz, DBHO2n euskara ikasi) irakaskuntza arlokoak izatea. Kontuan izanik praktika hauen izaera, berrikuntzaren alorrekoak guztiak, gure sektorea harro egoteko arrazoiak badituela uste dut. Bistan da gogoa eta ekimenak ez zaizkugula falta…

Aurrera jarraitu aurretik, Axular Lizeoko kideak zoriondu nahi ditut Web ataria, pedagogia eta komunikazio tresna aurkezpenak lortu zuen errekonozimenduagatik. Behin baino gehiagotan aipatu dugun moodle eta bere aukera anitzak bikainki aurkeztu zituzten Axularrekoek. Benetan interesgarria, zorionak!

Guk gure blogetako bat izan dugu erakusgai, euskaljakintza, hain zuzen ere. Egia esan, pozik egoteko arrazoiak baditugu, aukera paregabea izan baita, betiko foroetatik kanpo, blogen onurak irakaskuntzan (eta beste arloetan) adierazteko. Halere, egia esan behar badut, ez nintzen oso gustura gelditu, zapore mingots batez bueltatu nintzen. Aipatzeko nituen hainbat gauza aitatu gabe gelditu zitzaizkidan (writely-rekin egiten ari garen lanketa interesgarria edo ikasleen inkestaren emaitza ezin hobeak, kasu) nire IKTkide estimatuak bueltan gogorarazi zidan bezala. Eta hori gutxi balitz, aurkezpena bukatu aurretik, interneteko konexioa galdu genuen! Halere, nik uste ideia batekin, behintzat, gelditu zirela: bloga egundoko erreminta dela edozein irakasgai lantzeko, partaidetza sustatzeaz gain, guztiz motibagarria dela eta irakaslearen ohiko rolaren aldaketa ahalbidetzen duela. Eta horrekin gelditu badira, gaitz erdi!!

Amaitzeko pentsamendu bat eta esker mila: blog bidezko lanketa balio handikoa da baina balio handiagokoa oraindik atxikia dakarrena, ikasleekiko harremanak estutzea. Mila esker nire DBHO2ko ikasleei, hasiera-hasieratik izan duten jarrera irekiagatik!

Performancing 1.0

Geroz eta gehiago gustatzen zait Firefox. Hamaika aldiz aipatu dira nabigatzaile honek aurkezten dituen abantailak zeintzuk diren, beraz, ez ditut hemen berriro ere errepikatuko. Halere, azkenaldi honetan txundituta geratzen ari naiz Firefox-entzat kaleratzen ari diren plugin edo gehigarri berriekin. Hauetako gehigarri batzuk kilobyte gutxiko kodigo zati txikiak izan arren sinestezina izaten da nabigatzaileari gehitzen dioten balio erantsia. Hori da gertatzen dena Performancing 1.0 plugin berriarekin.

Plugina ohi den bezala deskargatu eta instalatu ondoren, F8 sakatuz edota nabigatzailearen behekaldeko eskuin aldean dagoen ikono berrian klik eginez, zure blogean idazteko editore konpleto bat irekitzen da pantailaren erditik beheraino (atzean bisitatzen ari zinen webgunea mantentzen du). Plugin honek w.bloggar edota ecto bezalako editore bat gehitzen dio zure Firefox-ari. Hauetan gertatzen den bezala lehenik blogeatzeko erabiltzen duzun plataforma zein den adierazi beharko duzu (WordPress, Movable Type eta Blogger plataformak onartzen ditu), ondoren zure blogaren identifikazioa egin beharko duzu (nire kasuan xmlrpc.php fitxategiaren helbidea idatziz) eta bukatzeko blogean erabiltzen duzun erabiltzaile izena eta pasahitza sartu. Une honetan has zaitezke zure bidalketak idazten.

Itxuraz sinplea da baina zure bidalketak sortzeko beharrezkoak diren gutxieneko tresna guztiak ditu: oinarrizko edizio barra bat, artikulua bistaratzeko hiru aukera desberdin, blog eta atal desberdinen artean txandatzeko aukera… eta oraintxe bertan aurkitu dudan beste aukera interesgarri bat. Edizio eremuaren atzean geratzen den web orriaren gainean eskuineko botoiez klik egiten baduzu “Performancing” izeneko aukera berri bat agertzen da. “Blog this page” aukeratuz idazten ari zaren artikuluan orri honen linka txertatzen du. Oso praktikoa.

Pluginak Firefox 1.5 bertsioarekin bakarrik da bateragarria.

Blogsome-n bloga duzuenontzat albiste txar bat: xmlrpc bitartez argitaratutako artikuluek “backslash problem“ deitzen den arazoa dute. Sistemak artikuluetan agertzen diren kakotx guztiei backslash bat ipintzen die aurretik. Honek balio gabe uzten ditu linkak eta txertatutako irudien helbideak.

Ereindako hazia

Duela bi hilabete eta erdi, Lehen Hezkuntzako 5. eta 6. mailako ikasleekin Ordizia izeneko blogarekin lanean hasi ginen. Hasieratik goraipatu dut ikasle hauen jarrera, eginiko ahalegina, lana… Askotan, lan neketsuenekin ere, jarrera ezin hobea azaltzen dute, nire lana neurri handi batean erraztuz. Egia esan, geroz eta lan gutxiago ematen didate.

10-11 urteko ikasle hauek, Informatika eta Multimedia Tailerrak ikasgaiak lantzerakoan, garatzen ari diren autonomia, jakin-mina, elkarlanerako ahalmena… ikaragarria izaten ari da. Ez hori bakarrik,aurreko bidalketa honetan, aipatu nuenez, ikasle batzuk bere kaxa hasita daude del.icio.us bezalako zerbitzuak erabiltzen (nork esango zuen duela hiru hilabete, 10-11 urteko ikasleek hori egingo zutela?). Bada, hori ez da guztia. Dagoeneko, Bloglines-en kontua ireki eta euren feed-ak jasotzen hasita daude batzuk. Pentsa dezakezuen bezala, horren berri izan dudanean gaur, zur eta lur gelditu naiz!. Izan ere, horren inguruan aipamen txiki bat egin besterik ez, eta euren jakin-minaz bultzatuta, inoren laguntza jaso gabe, iritsi dira hori egitera. Ez al zaizue harrigarria iruditzen? Niri, behintzat, bai.

Hau guztia pozik eta harro egoteko arrazoi nahikoa izanik, ez da izan gaur ikasle hauengandik jaso dudan albiste pozgarri bakarra. Izan ere, gaur jakin baitut 6. mailako ikasle batek bere bloga martxan jarri duela. Ikastolan piztutako jakingogoz etxera joan eta aitari blog propioa sortu nahi zuela esan omen zion, saiakuntzak egin ahal izateko, esperimentatzeko… Bere aitak informatikaz oso gutxi zekiela eta ezin izango ziola asko lagundu erantzun zionean, gure ikaslearen ilusioa nagusitu zen eta amore eman beharrean, familia osoa inplikatu zuen egitasmo horretan. 6 urteko arrebaren izena hartu eta Blogsomen (berak ezagutzen duen zerbitzuan) Bihurrikeriak izeneko bloga argitaratu zuen.

Euren lehen bidalketan dioten bezala, bihurrikerien berri eman eta elkarrekin une dibertigarriak pasatzea nahi dute.

Blog honetan, gertatu diren bihurrikerien berri emango dizuegu, bai guk eginak, edo beste edozeinenak. Zuen aldetik, ideia onak baldin badituzue bidal ditzakezue.

Gaur bizi izan ditudan une goxo hauengatik bakarrik, egin dugun lanak merezi izan duela esan dezaket eta erein dugun hazia fruituak ematen hasita dagoela nahiz eta horrelako uneak egunero ematen ez diren. Egia esan,honelakoak ere bizi izan ditut DBHko ikasleekin. Bizitzaren gazi-gozoak…

Bukatzeko, 11-12 urteko DBH 1eko ikasle batzuek ere aurki euren bloga abian jarriko dutela aurreratu nahi dizuet, honek dakarren guztiarekin: ardurak eta erantzukizuna hartzea… Ezin ukatu, ikasle aktibo, autonomo eta ikusberak garatzeko bide ezin egokiagoa dela!

Xinha, Here!, plugin interesgarria Firefox-erako

Jadanik zuetako askok konturatu zineten gure ikastolan erabiltzen ditugun blog guztiak WordPressean oinarrituta daudela. Gehienak Blogsomek eskaintzen dituen dohaineko blogak dira, hauek WordPress-MU aplikazioan sortuak eta garatuak direlarik; honen bitartez erabiltzaile anitzei blogak sortzeko plataforma amankomun bat eskaintzen zaie. "Multiuser" izateak baditu eragozpen garrantzitsu batzuk: administrazio eremua ingeleraz konfiguratuta dago bakarrik, plugin kopurua mugatua da eta ezin dira eskaintzen direnak baino gehiago erabili, argazkien tamaina eta formatoa mugatua dago… eta bidalketen edizio eremua "quicktag"-etan oinarritzen da, hau da, testuari formatoa eman ondoren blogean benetan nola geratuko den ezin da ikusi (WYSIWYG deitzen dena).

Hori dela eta askotan galdetu didate ez ote dagoen Blogsomen aukerarik Chenpress bezalako plugin bat erabiltzeko. Gaurtik aurrera esan dezaket erantzuna baiezkoa dela. Beraz adi!!.

Xinha, Here! Firefox-erako gehigarri bat da. Honen bitartez edozein webgune batean testua sar dezakezue WYSIWYG editore bat erabiliz, horretarako nahikoa da (behin plugina instalatu eta nabigatzailea berrabiarazi ondoren) eskuin botoiarekin klik egitea testu koadroaren gainean eta "Xinga, Here!" hautatzea. Berehala irekiko zaizue edizio leiho berri bat mota guztietako botoiak izango dituena eta, bide batez, testu editatua nola geratuko den ikusteko aukera ere emango dizue.

Xinha, Here! erabiliz idatzi dut artikulu hau eta, egia esan, oso interesgarria iruditu zait. Beraz, WordPress zale guztioi Firefox instalatzeaz gain, plugin hau erabiltzera gonbidatzen zaituztet. Kontatuko dizkidazue zuen inpresioak.

Informazio iturria | Comunidad WordPress en Español