Buletinik gabeko ebaluazio bilera

Ikaslea ebaluazio prozesuaren ardatza bihurtzen denean

Egun hauetan, EKI proiektua dela eta, ikastolan gurasoei ematen diegun ebaluazio informe edo buletinari buelta batzuk ematen ari gara. Gaur goizean, goiko bideoa ikusi ondoren, egiten ari garen lanak benetan zentzurik ba ote duen zalantzan ipini dut. Bideoak ebaluazio bilera “autentiko” bat zer izan beharko litzatekeen azaltzen duela uste dut eta gureak hauetatik zein urruti dauden egiaztatzeko balio izan dit. Zer dela eta dago halako aldea egiten duguna eta egin beharko genukenaren artean?

Ikaslea bere ikaskuntza prozesuaren protagonista

EGIN BEHARKO GENUKEENA: Ados bagaude eskolaren helburu nagusia ikasleak bizitzarako prestatzea dela eta eguneroko bizitzan sortzen zaizkigun egoerei aurre egiteko ikasten, egiten eta izaten jakitea oinarrizkoak direla, ados egongo gara orduan norberak bere jokabide eta erantzukizunen inguruan hausnartu eta hobekuntzak zehaztea eta aurrera eramatea ezinbesteko gaitasunak direla. Bizitzarako prestatuta egotea, beraz, ikaslea etengabeko autoregulazio prozesu baten gaineko kontrola izatea suposatuko luke. Eta horrek ikaslea autoebaluaziorako estrategietan trebatzea suposatu beharko luke. Baliteke gurasoekin burutzen ditugun bilerak (ebaluazio amaieran edo bestela ere) izatea estrategia horiek praktikan jartzeko unerik aproposena.

Noski ez dela gauza erraza norberak ikasi eta egin duenaren eta bizi izan dituen emozioen inguruan hausnartzea (helduoi ikaragarri kostatzen zaigun kontu bat da). Bada horretarako dago tutorea, prozesu horretan ikaslearen gidari eta aholkulari izan dadin (bideoan ederki asko ikusten den moduan). Modu honetara, ikasleak, derrigorrezko eskolaldia bukatzen duenerako, autoregulazio estrategiak modu autonomoan garatzea izan beharko litzateke eskolaren helburu nagusienetako bat.

EGITEN DUGUNA: Nik ezagutzen ditudan eskoletan oso urruti gaude oraindik bideoan agertzen den egoera horretatik eta, oro har, ezkerreko paragrafoan aipatutako egoera ideal horretatik. Gure ikastolan, adibidez, ikasleak ebaluazio informeak jasotzeko gurasoekin egiten diren bileretatik kanpo uzten ditugu eta, egia esan, ez dut inoiz ulertu zergatik egiten dugun horrela (nik behin edo behin, nire semea bileran gurekin egotea eskatu izan dut). Horrela, haurrak bere ikaskuntza prozesuaren inguruan hausnartzea eta ondorioak ateratzea bere lana edo ardura ez dela ulertzen du. “Nolakoa naizen”, “zer dakidan eta zer egiten dudan” edo “zer ikasteko edo egiteko gai naizen” baloratzea irakaslearen lana dela ulertzen dute, bai ikasleak baita bere gurasoek ere.

Gero DBHn, bat-batean eta oso ondo jakin gabe zergatik eta zertarako, ikasleak, gurasoekin batera, informea jasotzera “gonbidatzen” ditugu, euren rola bilera hauetan gelako altzariek betetzen dutenaren berdina izanik gehienetan. Garai bateko autoek maleteroaren gainean eramaten zuten txakurrek bezala mugitzen dute burua hauek ere zerbait galdetzen zaienean. Ahoa ireki gabe egoten dira ia bilera osoan. Askotan, badakite “txaparroia” jasotzera datozela eta askok halako “eremu elektromagnetiko iraganezin” batez babestuta etortzen dira bileretara. Zertarako datoz ikasleak ebaluazio bileretara? Sermoia entzutera bakarrik? Benetan hori al da gurasoekin egiten diren ebaluazio bileren helburua? Nola demontre prestatu nahi ditugu bizitzarako, egiten dutenaren inguruan hausnartzeko aukerarik ematen ez badiegu?

Portfolioa ebaluaziorako baliabiderik garrantzitsuenetakoa

EGIN BEHARKO GENUKEENA: Askotan entzun eta irakurri dut portfolioa (digitala edo ez) ebaluaziorako tresna baliagarrienetako bat dela baina, onartu behar dut, orain arte ez dudala oso garbi eduki zein den portfolio batek ebaluazio prozesuan duen benetako funtzioa. Bada goiko bideoa ikusi ondoren berehala desagertu dira nituen zalantza guztiak.

Norberaren ikaskuntza prozesuen inguruko hausnarketa “a pelo” burutzea gauza konplexua da. Horrela, portfolio didaktikoa (ebaluazio matrize edo rubriken antzera) prozesu horretan gida edo euskarri bezala funtzionatuko luke. Eguneroko horren kapitulu edo atal bakoitza hausnarketarako aitzakia bat izan litzateke, horrela autoregulazio prozesua errutina edo eskema mental berdin baten errepikapenaren eskutik ahalbideratzen delarik. Bide batez, portfolio didaktikoak ondo egindako jarduerekin berriro gozatu eta familiaren aurrean harro sentitzeko aukera ematen du (bideoko haur batek lagunengandik jasotako balorazioak amaren aurrean aurkezten duenean bezala) eta, bide batez, komunikatzen ikasteko konpetentzia garatzeko ere balio du.

EGITEN DUGUNA: Baliteke Lehen Hezkuntzan, burutzen diren jardueren aniztasuna dela eta, ikasleek euren portfolioa osatzeko aukera gehiago izatea. Ezagutzen ditut irakasle batzuk euren karpetan gure seme-alabek burutzen dituzten ekintzen ebidentziak jasotzen ahalegintzen direnak. Agian zentzu gehiegirik ez duena da, ebidentzia horiek ikasleak berak burututako lanak izanik, hauek euren portfolio pertsonalean jasota ez egotea. Nire iritziz, irakasleak lan horiek berak jaso baino, ikaslearen metakogniziorako lagungarriak izan daitezkeen ebidentziak identifikatu eta ikasleari bere portfolioan gordetzeko aholkua eman beharko lioke ikasleari. gero honek hauen inguruan hausnartu dezan.

Derrigorrezko Bigarren Hezkuntzan, berriz, bideoan agertzen den egoeratik oraindik oso urrun gaudela esango nuke nik. Froga, kontrol edo azterketen kalifikazioak, etxerako lanetan egindako “kaleak”, hutsegiteak, diziplina arazoak… jasotzen dituen irakaslearen erregistro edo nota koadernoa izan daiteke portfoliotik gertuen egon daitekeena. Datu asko bai, baina gehienak ezer gutxi adierazten dutenak ikaslearen garapen konpetentzialari buruz. Eta okerrena dena. Ikaslea ebaluazio prozesutik kanpo geratzen den unetik, ikasleak ebidentzia horien inguruan egiten duen interpretazioa eta irakasleak (eta gurasoek) egiten dutenaren inguruan sekulako etena sortzen da. Horrela, ebaluazioaren izaera formatiboa erabat desitxuratuta geratzen da.

Familia inplikatu

EGIN BEHARKO GENUKEENA: Honen inguruan ezer gutxi dago esateko. Uste dut guraso garen guztiok erabat harro irtengo ginela ebaluazio bileratik gure seme-alabak bideoan agertzen diren haurren lekuan ikusiko bagenitu. Gure haurrak egin duten lanen inguruan hasunartu eta dituzten zailtasunen aurrean hobekuntza proposamenak mahai gainean ipintzeko gaitasun hori bereganatzea, uste dut eskolan gure seme-alabak matrikulatu aurretik sinatuko genukeen zerbait litzatekeela esango nuke nik. Nik behintzat oraintxe bertan sinatuko nuke nire semea bideoko haurrek ikasten ikasteko duten gaitasunarekin amaituko balu Derrigorrezko Bigarren Hezkuntza.

Bestalde, deigarria iruditu zait ere, nola inplikatzen den familia osoa (ama, aita, anaiak eta arrebak) haurraren ikaskuntza prozesuan. Uste dut ikaslearentzat oso positiboa dela bere aurkezpena guztion aurrean egitea, familia-giroan. Eta bestalde, gurasoak erabat baldintzatuta irteten dira bileratik, euren seme-alabek zuzenean aurkezten dizkien hobekuntza beharren inguruan askoz ere sentsibilizatuago.

EGITEN DUGUNA: Nik esango nuke gurasoekin egiten ditugun bileretan egoten den giroa oso urrun dagoela egoera idealetik (bideoan ikusten direnak, agian bideoaren presentzia berarengatik baldintzatuta daudela dirudi). Hasiera batean behintzat, ebaluazio bilerak ez dira atseginak: horrela sentitzen dut irakasle paperean nagoenean, baita guraso bezala egotea tokatzen zaidanean ere. Irudipena daukat bilera hauetan irakasleok gehienetan fiskalaren papera hartzen dugula. Beti dago zerbait behar bezala funtzionatzen ez duena eta normalean ezer gutxi ikaslea zoriontzeko. Guraso bezala bilera hauetan ezustekoren batekin sorpresa jasoko dugula pentsatzen dugu. Ikasle helduen kasuan gainera, beti egoten da irakasleak egindako balorazioaren interpretazio pertsonal bat (logikoa den bezala; bileran, normalean, hitz egiteko aukera handirik ez dute izaten) Azkenean nire ustez gurasoak nahiko nahastuta ateratzen dira bileratik. Nire ustez, hori guztia, goitik behera aldatuko litzateke ikaslea bera izango balitz ebaluazio bilera gidatuko lukeena.

Hezkuntzan zentzu gehiegi ez duten lan errutinarioetan murgilduta ibiltzea oso tipikoa izaten da. Oso ondo jakin gabe nola, askotan zentzu gehiegirik ez duten lanak burutzen ditugu. “Beti egin izan da horrela” aitzakipean, ikaragarri kostatzen da inertzia horiekin puskatzea. Nik uste det gurasoekin burutzen ditugun ebaluazio bilerak, adibidez, horren adibide bat dela. Aldaketak proposatzen direnean, askotan aipatzen da “aldaketa horiek denbora behar dute” edo “aldaketa horiek oso konplikatuak dira” bezalako koletillak. Gurasoekin burutzen ditugun bileren kasuan uste dut aldatzea oso sinplea dela, borondate eta koherentzia kontua da bakarrik.

 

Walking in my shoes

“Hay gente homeless que vive en una mansión, y otros con un hogar a la intemperie”

Pachi Tamer

Haritz Alzolari esker ezagutu dut Pachi Tamer. Goiko bideoa ikasleekin batera hausnartzeko alderdi interesgarri mordoa eskaintzen dituen baliabidea iruditu zait, Giza Hezibidean, adibidez, erabil daitekeena.

Ezetz, gakoa ez dela ikasmateriala, irakasleak baizik!

“It is important to remember that educational software, like textbooks, is only one tool in the learning process. Neither can be a substitute for well-trained teachers, leadership, and parental involvement.”

Keith R. Krueger

Klaseko errutina aldatzeari buruz

Aldaketa sinple batek gelako esperientzia aldatzen dueneAN

Irakasle batek bere lanean izan dezakeen etsairik nagusiena errutina izan daiteke. Gure klaseak behin eta berriro molde berarekin prestatu eta aurrera eramaten baditugu, munduko borondate guztia jarrita ere, behin baino gehiagotan gelatik erabat etsituta irteteko boleto asko ditugula esango nuke nik. Eta seguruenik, irakasleok gure lana betetasun sentsazioarekin amaitu eta, zergatik ez, ikasleengandik gure ahaleginak merezi duen onespena jasotzeko aukera galtzen dugu, ahalegin hori beti modu berean enfokatzen dugulako. Ni, behintzat, sentsazio horrekin behn baino gehiagotan irten naiz gelatik.

Askotan nahikoa izaten da aldaketa txiki bat planteatzea gela barruko dinamikan, ohiko metodologian berritasun sinple bat probatzea edo ebaluazio prozesuan bide berri bat erabiltzea, gela barruko esperientzia goitik behera aldatzeko. Horixe da atzo bizi izan nuena DBH 2ko ikasleekin.

Perspektibak zuzentzeko transparentzia
Perspektibak zuzentzeko transparentzia

DBH 2ko teknologiako ikasgaian, marrazketa teknikoa lantzen igaro dugu lehenengo ebaluazio osoa. Lehen asteetan iazko edukiak errepasatu genituen (gorputzen bistak nola marrazten diren) eta bigarren zatian Cavaglieri perspektibarekin aritu gara. Dagoeneko gehienok dakizuen moduan, pieza baten bistak oinarri bezala izanda honen perspektatiba deduzitu eta marraztea, ikasle batzuentzat zailtasun gehiegirik ez duen lan bat bada ere, askori ikaragarri konplikatua egiten zaie. Marrazketako irakasleek ondo dakiten bezala, azken hauei laguntzen joaten zaigu klaseko ia denbora osoa. “Ondo aukeratu bistetako ardatzak eta kontutan hartu bakoitzean agertzen diren neurriak”; “Kontuz y ardatzarekin, ondo begiratu zein den norabide horretan marraztu behar dituzun ertzen eskala”; “Ondo neurtu zuzenki guztiak eta txukun marraztu paralela guztiak”… Eta, nahiz eta, ikasle hauekin egiten dugun ahalegina handia izan, ni pertsonalki beti geratzen naiz frustrazio sentsazio batekin: lan eta esfortzu honek ia beti emaitza kaxkarrak izaten ditu. Hasieran nioen moduan, uste dut ikasleak errutina batean murgilduta ditugu eta etengabe errepikatzen diren egoera horien aurean, ikasle batzuk janda dute ezin dutela aurrera egin: ikasleak adierazten duen etsipen hori da gero irakasleari transmititzen zaiona. Horixe da azken aste hauetan buruan bueltaka eduki dudana.

Duela aste batzuk, Idoia nire lankidearekin bere klaseak prestatzeko erabiltzen duen metodoaren inguruan hitz egiteko aukera izan nuen. Praktikan jarri dituen jarduera eta teknika desberdinen artean, kimikako ariketak modu kooperatiboan ebazteko jarraitzen duen bidea oso interesgarria iruditu zitzaidan. Egokitzapen txiki batzuekin marrazketako laminak egiteko egokia izan zitekeela iruditu zitzaidana. Idoiak kimikako ariketak taldean ebazten ditu. Bada nik ere marrazketako laminak taldean ebaztea probatu beharra nuela pentsatu nuen. Gainera ikasturte hasieran, Picasso izena jarri nion talde-lana eta partaidetza aktiboa sustatzeko dinamika praktikan jartzeko aukera polita izan zitekeela ere pentsatu nuen.

Duela aste batzuk azaldu nien ikasleei nire asmoa. Gehiengo batek harridura aurpegia jarri zuen. Baten bat ere kexatu zen: nonbait ez zuen inorekin partekatu nahi bere marrazketako ezagutzak eta bere marrazketako nota. Hasierako inpresioa ezkor horiek jasota ere, aurrera egitea erabaki nuen. Atzo egin genuen hurrengo bi astetan burutuko dugun erronkaren simulakroa. IZARREN DESAFIOA izena ipini nion 😀 eta gezurra badirudi ere, izen horrekin bakarrik, marrazketa batere gustatzen ez zaien ikasle batzuen arreta behintzat jasotzea lortu nuen. Gezurra dirudi baina askotan bi tontakeria aldatzeak ikasleengan eragin positibo nabarmena izan dezake.

Dinamikaren funtsa oso sinplea da. Ziur nago irakasle askok antzeko zerbait aspalditik jarri dutela praktikan euren klaseetan:

  1. Ikasleak taldeka ipintzen dira (ebaluazio osorako talde finkoak zehaztuta ditugu gela bakoitzean).
  2. Ikasle guztiei lamina bera banatzen zaie. Hogei minutu dute guztiek lamina bukatzeko.
  3. Denbora amaitzen denean, hamar minutu dituzte, bikoteka jarrita egin dutena alderatu, analizatu eta hobekuntzak proposatzeko. Hamar minutu horiek bukatzen direnerako, biek lamina bukatuta eduki beharko lukete.
  4. Amaitutakoan, talde osoa elkartzen da eta bost minututan, taldekide guztiek perspektiba txukun bukatuta dutela ziurtatu behar dute.
  5. Une honetan, poltsa batetik zenbaki bat ateratzen da. Talde bakoitzean, zenbaki hori duen ikasleari, aurretik guztion artean egin duten lamina berriro egitea tokatzen zaio, baina oraingoan bakarka. Lan hori burutzeko hogei minutu ditu.
  6. Denbora amaitutakoan, lamina niri eman eta ikasle horren lana zuzentzen dut (goiko argazkian agertzen den transparentzia erabiliz). Perspektiba zuzena bada talde osoak urrezko izar bat irabazten du.

Horixe da guztia, ikusten duzuen moduan, nahiko planteamentu sinplea da. Estruktura kooperatibo bat txertatu (1-2-4 motakoa) eta dinamikari leihaketa kutsua ematen dion saritxo bat eskaini, besterik ez. Bada, horrekin bakarrik, erabat flipatuta geratu nintzen atzoko klasearekin. Orain arte izan dugun saiorik emankorrena izan da, alde handiarekin gainera. Gelan osoan egon den lanerako jarrera positiboa eta elkarlanerako giroa orain arte ebaluazio osoan inoiz egon ez dena izan da. Jarraian botatzen dizkizuet atzoko saioan behatutako hainbat puntu:

  • Orain arteko klase arruntetan gertatzen ohi den bezala, lehenengo fasean ikasle batzuk perspektiba hamar minututan bukatuta zuten eta beste batzuk, berriz, hogei minutu horiekin ez zute nahikoa izan lamina amaitzeko. Honaino, ezer berririk ez. Beno bai! Hogeita sei ikasleak burua laminatik altxatu gabe egon ziren hogei minutu horietan. Aurreko klaseetan ez zen beti horrela izaten.
  • Ikasleek bikoteka nahi duten moduan jartzeko askatasuna izan dute. Horrelakoetan ohikoa izaten da mutilak mutilekin eta neskak neskekin jartzea. Baina oraingoan irizpidea erabat aldatu dute (normala den bezala): gaitasun alde nabarmenak zeuden taldeetan, kontrolatzen duten ikasleak laguntza behar dutenekin elkartu dira. Bikote horien funtzionamendua behatzen aritu nintzen eta oso positiboki harrituta geratu nintzen ikusi nituen jokabideekin:
    • Bikote batzuetan, hasierako hogei minututan perspektiba txukun eginda zuten bikotekide biek. Batzuk laminak trukatu eta batak besteari egindakoa zuzentzea erabaki zuten. Bikotekidearen perspektiban ertzen neurriak errepasatzen ibili ziren, paraleloak izan behar zirenak benetan haal ziren egiaztatu zuten… Nik jartzen dudan baina arreta gehiago jari zuten laminak elkarri zuzentzen.
    • Beste bikote batzuk bide desberdina aukeratu zuten. Bikotekide bien laminak bata bestearen gainean ipini zituzten eta ertz guztiek kointziditzen zuten begiratzen aritu ziren. Ertzen batekin arazoak bazituzten, norena zegoen ondo eta norena gaizki aztertzen aritu ziren. Picassoren dinamikan landutakoa kontutan hartzeko eskatu nien eta oso txukun aritu ziren.
    • Desoreka handiak egon ziren bikoteetan, hamar minutu horiek zertan erabili oso garbi zuten biek: lamina bukatuta zuenak bukatu gabe zuenari laguntzen egin zituen hamar minutuak. azalpenak ematen eta “ikusten ez diren” alderdi horiek ikustarazten ahalegintzen. Ikasleren batek amaitu gabeko lamina hori kideari kendu eta berak bukatzeko tentazioa izango ote zuen begiratzen egon nintzen. Baina hemen ere zuhur jokatu zuten. Lamina bukatzeak bakarrik ezertarako balio ez zuela ulertu zuten; azken urratsan lamina egitea bikotekideari tokatzen bazitzaion, honek egin beharko zuena ondo ulertuko zuela bermatzea zen benetan lortu behar zutena.
  • Azkeneko bost minutuak bikote biek perspektiba bera marraztu zutela ziurtatzeko erabili zuten gehienek. Talde batzuetan, lamina erabat amaitu gabe zuen ikasleren bat edo oraindik geratzen zen. Hauetan guztion artean lagundu zioten ikasle horri bere lana amaitzen.
  • Aritzek aukeratu zuen azkeneko ariketa egingo zuten ikasleak aukeratzeko zenbakia. “2” zenbakia atera zuen eta Enara, Laida, Jon, Alain, Mattin eta Maddiri tokatu zitzaien, euren taldeko ordezkari bezala, lamina berriro egitea. Hogei minututan seiek amaitu zuten lana. Sei ikasle horietatik lauek irabazi zuten urrezko izarra (tira, izar “ofizialak” datorren bi asteetan ipiniko dira jokoan). Beste biek akats batzuk egin zituzten (batez ere, neurriekin). Hala eta guztiz ere, balorazioa ikaragarri positiboa izan zen, izan ere, bi ikasle horiek aurreko klaseetan banatu zitzaizkien laminekin arazoak izan zituzten ordubetean txukun amaitzeko (ulermen arazoak eta arazo teknikoak zituzten biek) Beraz, bi ikasle hauen hobekuntza laminak egiteko modu berri honekin nabarmena izan zen eta beraiek ere, horretaz jabetu ziren (horixe da garrantzitsuena).
  • Ondorioekin bukatzeko:
    • Atzokoan talde osoak batera egin zuen aurrera. Aurreko klaseetan egon ziren aldeak difuminatuago geratu ziren atzokoan.
    • Elkarrekin aurrera egite horrek asko animatu zituen zailtasunak zituzten ikasleak. Ingurukoen laguntzarekin eurak ere aurrera egiteko gai direla sentitu zuten.
    • Batzuk ikaragarri estimatu zuten ondokoen laguntza eta horrelaxe errekonozitu zieten euren bikotekideei. Uste dut detaile polita izan zela laguntzen ahalegindu ziren ikasleentzat ere.
    • Gelan egon zen lanerako giroa ikasleak zoriontzeko modukoa izan zen, kontutan izanda gainera, DBH 2ko talde hau ez dela batere erraza.
    • Elkarri lagundu eta kooperatzeko talde osoak adierazi zuen jarrera ezusteko handia izan zen niretzako. Baliteke gainera, sekulan horrelakorik egiaztatzeko aukerarik ez izatea, gela barruko dinamikaren errutina aldatzeko erabakia hartu izango ez banu. Ohikotasunetik irtetea, lanerako testuinguru desberdinak aurrera eramatea, taldearen alderdi “ezkutuak” azaleratzeko balio izaten dute, ohiko helburu curricularretaz gain.

Honaino iritsi bazarete, agian zuetako baten batek galdetuko zuen “eta zer gertatzen da izarrekin?” Bada datozen bi astetan izango ditugun bi orduko bi saioetan, lau izar egongo dira jokoan. Beraz, gorengo saria lau izar eskuratzea izango da. Zer egingo dudan horrekin? Bada oraindik ez dakit eta egia esan, hori gutxien axola zaidana da 😉

Jokabide disruptiboak kudeatzen

Nola zuzendu oker hasi zaigun ikasturte berri hau

Ziurrenik askok gogoratuko dituzue etxean gurasoei behin baino gehiagotan entzundako esaldi xelebre edo askotan errepikatzen zituzten komentario xelebreak. Oso ondo jakin gabe zergatik, garunean betirako grabatuta geratzen zaizkigu eta, noizean behin, egoera jakin batzuetan, gogora etortzen zaizkigu. Nire aitak bazuen bat nirekin askotan erabiltzen zuena eta azken egunetan buruan bueltaka darabilkidana. Saltsa berrietan murgiltzen nintzenean, “tú, como siempre, arrancada de caballo y parada de burro” esaten zidan erdaraz, behin baino gehiagotan.

Orduan ez nion kasu gehiegirik egiten aitari baina uste dut bazuela arrazoi puntu esaten zidan horretan. Izan ere, motibatzen nauten egoera berrien aurrean, bi aldiz pentsatu gabe, lanean jartzen naiz. Txinparta pizten zaidanean, ikaragarri ilusionatzen naiz eta ingurukoak ere, ni bezala, erabat inplikatuta egongo direla sinisteko joera izaten dut. Nik ditudan espektatibak besteek ere partekatzen dituztela pentsatzeko ohitura daukat eta nire aldetik ipintzen dudana, besteengandik jasoko dudanaren parean egoteko itxaropena izaten dut. Eta batzuetan nire ilusioa kutsakorra izatea lortzen badut ere, beste askotan ez da horrela izaten eta hori gertatzen denean, gehienetan, amore ematen bukatzen dut. Hasierako ilusioa berehala galtzen dut eta ekimen gehienak erdibidean geratzen dira.

Askotan aipatu dudan moduan, azken bi urte hauek oso emankorrak izan dira nire garapen profesionalari dagokionez. Irakasle bezala hobetzeko Aniztasun Curricularreko (AC) talde batekin lan egitea benetan baliagarria izan zitekeela pentsatzen nuen eta halaxe gertatu da. Hasierako ilusio hori bizirik mantendu da azken bi ikasturte hauetan, nagusiki ikasleen aldetik jaso dudana erabat asetuta utzi nauelako maila profesionalean baita maila pertsonalean ere.

Aurten taldea aldatu egin da, ikasle berriak ditut eta egoera aldaketak ematen direnean askotan gertatzen den moduan, tentsioak eta konfliktoak sortzen dira. Irakasleok jakin badakigu ikasle promozioen artean desberdintasunak egoten direla, oraindik nabarmenagoak, beharbada, ACko taldeen kasuan, talde hauek osatzen dituzten ikasleen profil akademiko eta pertsonalak anitzagoak izaten baitira. Oraingo taldea aurrekoarekiko oso desberdina da eta oso konplikatua egiten ari zait dagoeneko ohituta nengoen gelako dinamika lortzea. Dagoeneko bi hilabete pasa dira ikasturtea hasi zenetik. Nire espektatibak eta nire ikasleek dituztenak ez datoz bat eta eskaini/jaso balantze pertsonala ez dut orekatua denik sentitzen.

Egun hauetan dena pikutara bidaltzeko gogoa behin baino gehiagotan etorri zait burura. Ikasle hauekin egiten dudana benetako balio pedagogiko eta hezitzailerik ba ote duen zalantzan ere jarri izan dut. Irakaslerian hain tipikoa den “balones fuera” egiteko tentazioa ere eduki dut: errua gurasoena da, ikasleak alfer hutsak dira, gizartea da erruduna eta nik horren aurrean ezin dut ezer egin…, bezalako aitzakietan erortzeko tentaldia ere izan dut.

Beraz, aitak hainbestetan aipatzen zidan “parada de burro” hark, berriro ere egi bihurtzeko boleto asko dituela konturatu naiz. Eta oraingoan ez diot aitari arrazoia eman nahi. Antzeko egoeretan egon naizen beste askotan faltatu izan zaidan hausnarketa egitea derrigorezkoa dela uste dut. Hausnarketa hau bi planotan egin behar dudala iruditzen zait:

Nire betekizunaren balorazio pertsonal bat:

Labur esanda, ikasleei hainbestetan eskatzen diegun eta irakasleoi horrenbeste kostatzen zaigun autorregulazio edo autoebaluazio ariketa bat egitea beharrezkoa ikusten dut. Orain ez dut gogoratzen non baina behin hauxe irakurri nuen: “Irakasle batek merezi dituen ikasleak ditu” Egi galanta. Eta aurtengo taldearekin erabat asetuta ez banago, baliteke horretan nik neuk ere nire ardura izatea. Orain arte nire betekizuna baloratu beharko banu, alderdi hauek ikusiko nituzke hobetu beharrekoak bezala:

  • Etengabeko konparazioekin bonbardatu ditut nire ikasleak: duela bi urte, bide berri honi ekin nionean, nire ikasleen jokabideak “neurtzeko” aurreko inongo erreferentziarik gabe hasi nintzen. Oraingo taldeak, ordea, aurrekoaren erreferenteak ditu eta hauek gainera, oso maila altukoak dira. Horrela oraingo ikasleen jokabideak nahiko nituzkeenak ez direnean, segituan konparatzen ditut aurreko taldekoenekin. Gehiegitan aurpegiratu diet iazko taldeak eurek baino hobeto funtzionatu zutela kasu gehienetan. Eta uste dut hori ez dela bidezkoa; ez nago plano berean eta baldintza berdinetan baloratzen ari bi promozioak.
  • Exijentzia maila altuegia jartzen ari naiz gauden garairako: iazko ikasturtea nola amaitu genuen ikusita, aurtengorako ipinita nituen espektatibak oso altuak ziren, duela bi urte nituenak baina dezente altuagoak. Baina taldea berria da, oraindik ohiko metodo tradizionalera ohituta daude eta gure estilo propiora egokitzeko denbora behar dute. Nik bi ikasturteko eskarmentua daukat; nire ikasleek zero patatero oraindik. Ez da zilegia nire ikasleei, hain denbora gutxian, egoera berri honetara egokitzea eskatzea. Denbora behar dute.
  • Ez ditut ekitatez tratatu nire ikasleak: puntu honekin beti izan ditut nire kezkak. Gelaren aurrean jokabide edo jarrera desegokiak dituzten ikasleak identfikatzea ez zait inoiz gustatu. Horregatik, kontu hauek askotan gelaren aurrean, modu orokorrean planteatzeko ohitura izaten dut. Baina AC taldean burutzen ditugun proiektu guztiak talde-lanean burutzen dira eta taldeen funtzionamendua egokia izateko elkarreragin positiboa egotea ezinbestekoa da. Eta horrela ez denean, elkarreragin positibo hori oztopatzen dituzten jokabide pertsonalak agerian utzi behar direla uste dut, ikasleak besteen aurrean epaitu gabe baina bai garbi utziz nortzuen jokabideak diren talde-lana oztopatzen dutenak.
  • Ez dut lehenengo proiektua behar bezain ongi prestatu: aurrekoan komentatzen nuen bezala, baliteke lehen proiektu hau orain arte martxan jarri dudan konplexuenetako bat izatea. Eta horrela izanik, uste dut dudala behar bezala prestatu, batez ere, kontutan harturik ikasle talde hau PBL metodologian hasiberria dela. Baliteke proiektuak merezi zuen prestakuntzan motz geratzea eta ziurrenik ikasleei babes handiagoa eman behar nien, kontutan izanik beraientzat lehenengo aldia zela antzeko esperientzia baten aurrean egoten zirela..
  • Nire jarrera ikasleen aurrean, gehienetan, oso ezkorra izan da: irakasleok ikasleengan izaten ditugun aurreiritziak alde batera aspaldian utzi nituela uste nuen. Baina talde honekin agian ez naiz erabat “legala” izan alderdi horretatik. Nire atentzioa jarrera disruptiboena duten ikasleengana zuzendu dut eta horrek taldearen aurrean beti ezkor eta konfiantzarik gabe agertzea eragin dit.
Konponbideak bilatu:

Classroom ManagmentAurreko guztia esanda, onartu behar dut aurtengo taldean ditudan ikasleak zailak direla. Gelako jarduna normaltasun giro batean mantentzea kostatzen ari zaigu. Ikasle disruptiboen eragina iazko taldean baina nabarmenagoa da aurten eta, horrelako klase giro batekin, ez da erraza bestelako helburuak lortzea. Horrelakoetan irakasleok zuzenean barne arautegira jotzen dugu askotan. Paper batean idatzita dagoena besterik gabe aplikatzen dugunean, arazoa beste bideetatik konpontzeko ditugun gabeziak estaltzeko balio izaten digu. Beste batzuetan, goi-mailako estamentuetara jotzen dugu, “ahalguztidunaren” aholku eta babesaren bila edo erabakiaren gaineko ardura gu ez garen norbaiti delegatzeko asmoz. Kasu batean zein bestean, konponbideak kanpotik etortzea espero izaten dugu. Baina ikasleekin ditugun jarrera arazoak gureak dira, gu gara arazo horien parte eta gurea da arazo horri, gure ekintzen bitartez, irtenbide bat emateko ardura. Galdera da, “zer egin dezaket nik ikasleekin bizi dudan errealitatea aldatzeko?”

Ez dago errezeta magikorik, badakit.  Gauza bat garbi baldin badaukat da ikasleak eurak inplikatu behar ditugula gelan adierazten duten jarrera aldaketan; nortasunak moldeatzen lagundu dezakegu, baina aldaketa ikasle horren eginkizun pertsonala da. Ikuspegi hori galtzen badet, jai daukat.

Kontu honi buelta batzuk ematen ari nintzela, Alberto del Mazoren blogan argitaratutako artikulu interesgarri honekin egin nuen topo. Bertan, Carmen Y. Reyes psikologaren lana aipatzen du. Bere iritziz, ikasleei garbi utzi behar zaie gela barruan adierazten duten jokabideak beraien hautua dela. Baina, era berean, ulertarazi behar zaie (eta irakasleok ere garbi eduki behar dugu) jokabide hori aldatzea beraien esku dagoela eta gainera GAI DIRELA . Carmenek horrela azaltzen du ingelesez:

“Once children understand that they choose their behavior, they also understand that they can change their behavior. Psycho-educational teachers believe that strengthening children’s coping and social problem solving skills is therapeutic. The psycho-educational or therapeutic model is one of social problem solving and socio-emotional growth rather than disciplining and punishment.” 

Kontzientzia hori barneratu eta praktikan jartzea ez da ikasleek bakarrik egin behar duten bide bat, irakasleok ere zeregin horretan lagundu dezakegu. Nola?  Bada Carmenek jokabide disruptibo horiek kudeatzeko irakasleok jarrai ditzakegun hamazortzi printzipioen zerrenda bat proposatzen digu. Azpian ipintzen ditut, nire iritziz interesgarrienak izan daitezkeenak (zerrenda osoa hemen aurki dezakezue):

  1. Ikasleekin daukagun harremana erabiltzen dugun hizkuntzaren araberakoa da. Harreman terapeutiko eta hezigarriak eragin nahi baditugu, hizkuntza positiboa erabili behar dugu.
  2. Erabiltzen ditugun mezu eta lexiko kritiko edo negatiboak, positiboak diren mezu eta hiztegiarekin ordezkatzen baditugu, ikasleen jokabidea moldeatu dezakegu eta gelaren gaineko kontrola handitu egiten dugu.
  3. Gela barruan sortzen diren jokabide disruptibo desberdinen aurrean modu desberdinean erantzuteak irakaslearen konpetentzia sendotzen du. Ikasleen jokabide disruptiboen aurrean nola jokatuko dugun erabakitzeko ahalmena da irakasleok daukagun botererik garrantzitsuenetako bat (hauxe bera, adibidez, aurten egiaztatu dudan puntu bat izan da)
  4. Joakibde disruptiboa duen ikasle batek, jarrera disruptiboa du, alegia,  ez da ikasle disruptiboa. Beste hitzetan, arazoa bere jarrera da, ez ikaslea (hau askotan ahaztu egiten zaigu)
  5. Jokabide disruptiboak alda daitezkeen akzioak dira.
  6. Ikasleek jokabide disruptibo gutxiago adierazten dituzte euren jarrera kontrolatzeko gaitasuna (autokontrola eta autogestioa) dutela sinesten dutenean.
  7. Ikasleak jarrera aldaketarako eta autokontrolareko prestatuago sentitzen dira euren esfortzuak zerbaitetarako balio duela konfiatzen dutenean.

Amaitzeko, hemezortzi printzipio jasotzen dituen zerrenda horri, nik beste bat gehituko nioke: “Askotan, jarrera disruptibo horiek gela barruko testuinguru jakin batean sortzen dira. Testuinguru horiek aldaezinak direla pentsatzea, arazoa betikotzea ekar dezake. Testuinguru berriak eragitea, ikasle disruptiboen alderdi positiboak ezagutzeko modu baliagarri bat izan daiteke” (eta hau ere, nik neuk egiaztatu dudan zerbait da)

Tira, irakasleok gela barruan bizi ditugun jokabide hauek konpontzeko modu BAT dagoela, konponbide BAT dagoela esatea, tontakeria galanta dela badakit. Horregatik ez dut arautegietan edo aurrez definitutako zigorretan eta antzekoetan sinesten, aurrerago esan dudan moduan, jokabide oker bakoitzak, irtenbide propio bat behar duelako. Baina bai iruditzen zait Carmenek aipatzen dituen printzipio horien bidetik joan daitekeela gure gelan ditugun arazoen konponbidea. Zaila dela, bai, baina inondik inora ezinezkoa!