Kategoria: Denetarik

Mikel Iturriak beste kronika bikain bat egingo digulakoan, nik aipamen txiki bat besterik ez dut egingo azken bi asteotan Artelekun esan diren gauzei buruz.

Hasi baino lehen, goraipatu nahiko nuke antolatzaileek azaldutako kemena gisa honetako ekimena aurrera ateratzeko eta euskal internautak debate honen inguruan biltzeko

Bi saiotan izan gara eta oso ideia interesgarriak entzun ahal izan ditugu. Ene iritziz, Josu Landa eta Luistxoren mezu ezkorrak aintzat hartu beharrekoak dira. Izan ere, sarritan, eztabaida antzuetan murgiltzen gara eta gaiaren muinari ez diogu heltzen. Euskaldunon ikusgaitasuna sarean handitzeko beharra etengabe aipatzen da, baita hori lortzeko egin beharrekoa ere. Baina, zoritxarrez, nik uste dut esan, esaten dugula; baina egiteko garaian, gauzatzeko unean, indarra falta zaigu. Nola uler daiteke gure gizartean “borondate publikoa” duten erakundeek eta diru publikoaren laguntzaz eraikitako guneak edukiak “bahituta” izatea eta komunitatea (salbuespenak salbuespen) isilik jarraitzea? Josu Landak lizentzien eta jabego intelektualaren inguruan dagoen mendekotasuna gainditzeko ausardia proposatzen zigun eta ez zait gaizki iruditzen, baina nik ez nituzke baztertuko, horrekin batera, diru publikoekin sostengatutako erakundeak presionatzea eduki horiek guztion eskura jar ditzaten.

Bestalde, Kataluniatik iritsitako Vicent Partal-ek .cat domeinua lortzeko ibilbide malkartsuaren berri eman zigun. VilaWeb-eko kazetariak, gauzak oso ongi azaltzeaz gain, giltzarriak eman zizkigun:

• Inurrien lana egin
• Diskrezioa
• Batasuna
• Borondatea

Nolanahi ere, nik uste dut abiapuntu oso ezberdina dugula. Ez dut uste Katalunia eta Euskal Herriko egoerak aldera ditzakegunik. Lan handia egin beharko genuke euren mailara hurbiltzeko. Gaitasuna dagoela aski frogatuta dagoen arren, egia bihurtu beharko dugu eta horretarako, ezinbesteko urratsak ematen hasi beharko dugu:

• Gure sistema eragileak eta nabigatzaileak euskaraz jarri
• Gure guneen meta tag horietan lang=”eu” ipini
• Bilatzaileei lana eginda eman
• Edukiak sortu
• Lana, lana, lana, lana…

Gogoeta labur honi amaiera emateko, euskaldunon komunitatea eraikitzen laguntzeko gure konpromisoa azaldu nahi dugu eta, gure ahalmenen arabera, interneteko euskal komunitatea ikusgaiagoa bihurtze aldera lana egiteko.

Aspaldi erabaki genuen gure blogaren jarioa Feedburnerren bitartez zabaltzea. Feedburnerrek eskaintzen dituen abantailen artean hiru dira, batez ere, garrantzitzuak gure ikuspegitik:

• Alde batetik, Feedburnerrek gure jarioa “jantzi” polit batekin zabaltzen du sarean zehar, izan ere, XML artxiboen itxura “itsusia” alde batera utzi eta RSS fitxategia formateatu egiten du. Hasi ginenean aukera hau oso arrunta ez zen arren, gaur egun jada, asko dira jarioari formatua ematen dioten zerbitzuak. Firefoxek berak, adibidez, laster kaleratuko den 2.0 bertsio berrian, aukera hau aurkeztuko du berrikuntza nagusien artean
• Gainera, gure jarioen jarraipena egiteko estatistika oso interesgarriak eskaintzen dizkigu. Jario zaharrarekin, IKTeroetara harpidetutakoan jarraipena egiteko Bloglinesen begiratzea besterik ez zegoen: jario honekin harpidetuta dauden guztien agregatzaileak zeintzuk diren jakin dezakegu. Edota eguneko zenbat jario jaso diren harpidetutakoen artean.
• Baina nire iritziz, abantailarik handiena zera da: jarioen bukaeran gehitzen den etiketa zerrenda. Etiketa hauen bitartez, jarioari halako interaktibitatea gehitzen zaio: jariotik, bertatik, aukera dago jario bera posta elektronikoz edonori bidaltzea, bidalketa del.icio.usen gordetzea, Technoratin dituen aipamen kopurua ikustea, bidalketaren iruzkinetara zuzenean salto egitea…

FeedFlare izeneko etiketa hauek hasiera batean kopuru jakin batetara mugatuta zeuden arren, gaur egun edonork sortu ditzake berriak eta, ondoren, bere jariora gehitu. Horretarako nahikoa da XML fitxategi sinple batzuk sortu eta webgune batean kokatu, fitxategiari helbide jakin bat emanez. Sortu diren etiketa berri hauen artean, badago bat bidalketa Meneamera zuzenean gehitzeko balio duena. Kontutan izanik Zabalduren azpian dagoen kodea Meneamerenaren berdina dela, azken honetatik abiatuz, bidalketak Zabaldura igotzeko etiketa sortzea otu zait.

Eta horrelaxe egin dut. Beraz, une honetatik aurrera IKTeroen jarioak bidalketa zabaldu.comera zuzenean bidaltzeko aukera eskainiko du.

Feedburnerrekoekin harremanetan jarri naiz Zabaldu.comeko FeedFlarea euren zerrendan ipintzeko. Bitartean, zuetako norbaitek erabili nahi badu, nahikoa du zabaldu.xml fitxategi honen helbidea kopiatzea eta Feedburnerren duen kontuan itsastea. Hori besterik ez da egin behar

Urte sasoi honetan ohikoa da era guztietako promesak egitea, nahiz eta gehienak bide bazterrean aparkaturik gelditzen diren. Guk gisa honetako ariketa egin genuen iazko ikasturtearen amaieran eta konpromiso batzuk hartu genituen:

• Diseinu berria prestatu
• Atal berriak sortu
• Estandarrak errespetatu
• Irisgarritasuna bultzatu
• …

Beste batzuen artean, horiek izan ziren hartu genituen konpromiso nagusienak eta horiek aintzat harturik udako oporrak aprobetxatu ditugu lanari ekiteko.

Ikus dezakezuenez, itxura aldatu diogu gure blogari, baina aldaketa ez da kanpoko itxurara mugatu, izan ere, estandarrak eta irisgarritasuneko printzipioak ezarri nahi izan ditugu blogaren atal guztietan. XHTML 1.0 Strict, CSSa eta RSSa baliozkotu ditugu. Ez da lan erraza izan, baina guretzat funtsezkoa izan da estandarrak errespetatzea gure blogaren irisgarritasuna eta erabilgarritasuna, ahal izan dugun neurrian, hobetzeko.

Hori dela eta, lehenengo urratsak ematen hasi gara irisgarritasunaren ibilbidean. Gauza batzuk lortu ditugu nahiz eta gaiaren inguruan gure ezagutza nahiko eskasa den. Hasteko, menuaren aukera guztiak “shortcut” izeneko lasterbideak edo tekla konbinazioak ezarri ditugu. Irisgarritasunerako jarraibideak ezartzen ahalegindu gara eta akatsik gabeko gunea eraikitzea lortu dugu, nahiz eta ondoren gehitu ditugun script batzuk eta egutegia akatsa ematen duten.

Faktore hauek alde batera utziz, garbi ikus daiteke garrantzia handiagoa edukiari eman nahi izan diogula. Horretarako, alboko menua kendu eta orriaren behealdera eraman dugu

Gainera, blogaren zabalera handitu egin dugunez, 1024 X 768 da beharrezkoa den gutxieneko erresoluzioa behar den bezala ikusteko.

Edukiei dagokienez, ataletan ikutu batzuk somatuko dituzue baita atal berri bat ere: Tutorialak. Azken honekin, IKTerook ekoizten ari garen eta ekoiztuko ditugun bideo-tutorialak guztion eskura jartzen hasiko gara.

Bukatzeko, esan zuen ekarpenak gustura jasoko genituzkeela eta horra hor gure gonbitea. Esaiguzue alkandora berria gustukoa duzuen edo ez, zer aldatuko zenuketeen, atalen bat faltan botatzen ote duzuen….

Dakizuen bezala, oporrak bukatu dira eta atzo ikasleei ongietorria egiteko prestatzen egon gara azken egun hauetan. Dena prest jartzen saiatu, ordutegiak egin, ordenagailu gelak abiarazi, ikus-entzunezkoen funtzionamendua egokia ziurtatu, bilerak, programazioa itxi, zerrendak…Nola azal dakioke ikasturte hasiera zer den irakaskuntza munduan sartuta ez dagoen edonori! Zoramena!!

Honelako momentuetan eten bat egiteak gero lana gogo biziagoz hartzera eraman dakiguke eta niri etenak musikaz lagundurik egitea gustatzen zait. Horretarako oso aproposa den gune bat ezagutu nuen lehengoan: blogmusik . Pandora atsegin baduzue, hau agian atseginago egingo zaizue. Lehenengoak, artikulu honetan azaldu nuen bezala, gure gustukoa izan daitekeen musika ezagutzera emateko (guk nahi dugun abeslari, talde edo abesti abiapuntu) aukera eskaintzen badu, bigarrenarekin zuzenean gustatzen zaizkizun abeslari edo taldeen abestiekin zure zerrendak osa ditzakezu.

Nola? Alta eman eta, goiko irudian ikus dezakezun bezala, Ipod baten itxura duen erreproduzitzaile bat azalduko zaigu. Bilatzailean abeslari edo talde baten izena idatziko dugu eta berehala datu-basean gordeta dauden abeslari horren abesti guztiak azalduko zaizkigu (125.000 abesti daude!). Bilaketa alfabetoz egitea ere posible da. Nahi ditugun abesti guztiak hautatu eta gure zerrendara gehitzea litzateke hurrengo urratsa. Nahi adina playlist edo zerrenda sortuko ditugu, blogmusik-ean sartzen garenean entzun ahal izateko. Guztiz web 2.0, gure ordenagailura ezer jaitsi gabe!

Amaitzeko, eskaintzen dituen beste aukera interesgarri pare bat:

• Entzuten ari zaren abestia partekatzearena. Ez legoke gaizki lanegunari lagun batek bidalitako abesti eta mezu batekin hasiera ematea, ezta? (Nik oraintxe jaso dut nire buruari bidalitakoa eta asko gustatu zait )
• Klik batez firefoxeko barran gunea zuzenean eransteko aukera.

Musika gustatzen bazaizue, blogmusik atsegingo duzue!

Jatorria: Digizen