iraila 2006 – IKTeroak

EH 2.0 a2a.

Mikel Iturriak beste kronika bikain bat egingo digulakoan, nik aipamen txiki bat besterik ez dut egingo azken bi asteotan Artelekun esan diren gauzei buruz.

Hasi baino lehen, goraipatu nahiko nuke antolatzaileek azaldutako kemena gisa honetako ekimena aurrera ateratzeko eta euskal internautak debate honen inguruan biltzeko

Bi saiotan izan gara eta oso ideia interesgarriak entzun ahal izan ditugu. Ene iritziz, Josu Landa eta Luistxoren mezu ezkorrak aintzat hartu beharrekoak dira. Izan ere, sarritan, eztabaida antzuetan murgiltzen gara eta gaiaren muinari ez diogu heltzen. Euskaldunon ikusgaitasuna sarean handitzeko beharra etengabe aipatzen da, baita hori lortzeko egin beharrekoa ere. Baina, zoritxarrez, nik uste dut esan, esaten dugula; baina egiteko garaian, gauzatzeko unean, indarra falta zaigu. Nola uler daiteke gure gizartean “borondate publikoa” duten erakundeek eta diru publikoaren laguntzaz eraikitako guneak edukiak “bahituta” izatea eta komunitatea (salbuespenak salbuespen) isilik jarraitzea? Josu Landak lizentzien eta jabego intelektualaren inguruan dagoen mendekotasuna gainditzeko ausardia proposatzen zigun eta ez zait gaizki iruditzen, baina nik ez nituzke baztertuko, horrekin batera, diru publikoekin sostengatutako erakundeak presionatzea eduki horiek guztion eskura jar ditzaten.

Bestalde, Kataluniatik iritsitako Vicent Partal-ek .cat domeinua lortzeko ibilbide malkartsuaren berri eman zigun. VilaWeb-eko kazetariak, gauzak oso ongi azaltzeaz gain, giltzarriak eman zizkigun:

Inurrien lana egin
Diskrezioa
Batasuna
Borondatea

Nolanahi ere, nik uste dut abiapuntu oso ezberdina dugula. Ez dut uste Katalunia eta Euskal Herriko egoerak aldera ditzakegunik. Lan handia egin beharko genuke euren mailara hurbiltzeko. Gaitasuna dagoela aski frogatuta dagoen arren, egia bihurtu beharko dugu eta horretarako, ezinbesteko urratsak ematen hasi beharko dugu:

Gure sistema eragileak eta nabigatzaileak euskaraz jarri
Gure guneen meta tag horietan lang=”eu” ipini
Bilatzaileei lana eginda eman
Edukiak sortu
Lana, lana, lana, lana…

Gogoeta labur honi amaiera emateko, euskaldunon komunitatea eraikitzen laguntzeko gure konpromisoa azaldu nahi dugu eta, gure ahalmenen arabera, interneteko euskal komunitatea ikusgaiagoa bihurtze aldera lana egiteko.

Irakasleak, PCak eta eskola porrota

Gaur, Sergio Montororen idatzi bat La pastilla Rojan irakurri dudanean, harrituta gelditu naiz izenburuarekin: “Poner PCs aumenta el fracaso escolar”

Hori ikusita, berehala hasi naiz artikulua irakurtzen eta, nire iritziz, izenburua edukiarekin bat ez datorren arren, ideia batek nire arreta piztu du:

Yo creo que esto es causado por intentar solucionar con tecnología un problema que no es tecnológico. No estoy para nada en contra de poner más PCs en las escuelas. Mi argumento es que la piedra angular del sistema educativo es el profesor y en España los profesores están mal pagados, desmotivados y a menudo desconectados del mundo de la empresa.

Erabat ados!

Gaur bertan, IKTerook izan dugun bileran gisa honetako hausnarketa egin dugu. Gure Hezkuntza Sistemak antzinatasuna besterik ez du saritzen. Zenbat irakasle dago motibaziorik gabe mila proiektuetan ikaragarrizko ahaleginak egin eta gero beraien lan eskerga ez delako inondik inora errekonozitzen? Zenbat dira “militante” izatetik “funtzionario” (hitzaren esanahi ezkorrenean) izatera pasa direnak? Zenbat ahalegin Euskararen erabilera sustatzeko? Zenbat ahalegin metodologia berritzaileak inplementatzeko?… Eta gero, zer? Ezer ez. Inongo saririk ez, inongo abantailarik ez, inongo errekonozimendurik ere ez.

Horrela ulertzekoa da irakasle askoren motibazio eza. Okerrena, ikastetxeek ez dutela behar adinako ahalmenik edota baliabiderik politika alternatiboak aurrera eramateko. Trienioak dira hezkuntzan kontatzen dutenak, gainontzeko guztia alde batera gelditzen da eta Administrazioek ez dute ezertxo ere egiten egoera hori aldatzeko

Askotan esan dugu ez dela nahikoa ordenagailu berri eta ahaltsuak izatea, beharrezkoa dela irakasleen konpromisoa formazioa eskuratzeko, metodologia berriak inplementatzeko (teknologia berriak edo beste baliabideak erabiliz), irakasleon prestigioa berreskuratzeko eta egungo egoerari buelta emateko. Baina Administrazioak honi guztiari bizkar ematen dion bitartean, nekez lortuko da irakaskuntzaren egoera aldatzea eta datozkigun erronka berriei behar bezala erantzutea.

Hori bai, beti topatuko ditugu erromantizismoz beteriko ale batzuk Kixoteren antzera haize erroten aurka borrokan, baina erromantizismotik ezin da bizi.

Netquiz pro, diktaketak ordenagailu bidez

Duela hilabete batzuk eke.org gunean Hitzaditza diktaketa kulturalaren berri izan nuen. Euskara idatzia arrunta bihurtu eta literaturaren gustua ematea zen egitasmo honen lehen xedea. Treba zaitez ondoko aldi baterako! zioten pixka bat beheraxeago. Ez agur eta ez adio, hantxe hasi nintzen eskaintzen zituzten hiru diktaketak egiten. Ideia izugarri gustatu zitzaidan nire ikasleekin aurrera eramateko. Ez bakarrik ortografia lantzeko, baita azaltzen diren pasarte horiek, liburuak eta autoreak ezagutzera emateko, teklatuan idazteko gaitasuna lantzeko, testuinguruaren laguntzaz hitzak asmatzeko eta hiztegi berria ezagutzeko ere, besteak beste. Eta hortxe hasi ziren nire buruhausteak…

Trebatzeko emandako adibideetan, aplikazioa Netquiz 3.0 sisteman oinarritzen zela ikusi nuen. Dohainekoa, zorionez! Berau jaitsi eta ahal nuen bezala (frantsesez zegoen) nire lehenengo diktaketak sortzen hasi nintzen. Kontua da Internet Explorerer egin zitezkeela, baina firefoxen ez zen audioa inondik inora azaltzen. Puntu horretan, eke.org-eko Jakesekin harremanetan jarri eta Uztaritzeko Lota jauregira joateko gonbitea luzatu zidan. Zer den informatikan iaioa izatea! HTMLn etiketa bat aldatu eta listo! Bertsio berria (Netquiz pro) atera berria zela eta beste hainbat jakingarri ere komentatu zidan. Mila esker, Jakes, harrera eta emandako azalpen guztiengatik!

Netquiz pro frantsesez, ingelesez eta gaztelaniaz dago. Ikasleekin euskaratzeko asmoa dut; dena den, dagoen bezala ere, badago bide bat ia dena euskaraz ipini ahal izateko. Aplikazioak 11 ariketa mota ezberdin sortzeko aukera eskaintzen du. Horietako batzuk nik beste aplikazioetan topatu ez ditudanak, gainera (diktaketak, tableroak, hutsuneak bete, atalak identifikatu…). Oso-oso interesgarria! Aplikazioa hemendik jaits dezakezue.

Ondorengo diktaketak sortzeko garaian, nire batxilergoko ikasleak eta EGA izan ditut bereziki kontuan; dena den, testuaren maila moldatuta, gure ikasle gaztetxoekin ortografia lantzeko era egokia izan daitekeela iruditzen zait. Orain artekoak eta egiten joango naizenak euskaljakintzako eskuineko zutabean ipiniko ditut ortografia diktaketen bidez hobetu nahi duen edonoren eskura (ariketak – ortografia). Jarraitu beharreko urratsak:

Liburuan edo ariketaren izenburuan klikatu diktaketa gunean sartzeko
Audioa abiarazi (quicktime beharrezkoa da) eta idatzi entzuten duzuna formularioan
Amaitzen duzunean, klikatu Zenbat huts? (gaizki idatzitako hitzak gorriz, jan dituzunak azpimarratuta eta soberan idatzitakoak kortxete artean azalduko zaizkizu)
Zuzenketa klikatuz, jatorrizko testua agertzen da
Berriz hasi aukera ere badago, diktaketa nahi duzun aldiz egin ahal izateko
Jarduera honek lau diktaketa ditu. Galdera? laukitxoan zenbakia idatziz, zuzenean diktaketa horretara joko duzu
Puntu edo komaren ondoren beti hutsunea utzi behar da.

Besterik gabe, hementxe duzu zure ortografia hobetzeko aukera. Ezetz zero akats lortu lehenengoan?

Zabaldu.com gure jarioan

Aspaldi erabaki genuen gure blogaren jarioa Feedburnerren bitartez zabaltzea. Feedburnerrek eskaintzen dituen abantailen artean hiru dira, batez ere, garrantzitzuak gure ikuspegitik:

Alde batetik, Feedburnerrek gure jarioa “jantzi” polit batekin zabaltzen du sarean zehar, izan ere, XML artxiboen itxura “itsusia” alde batera utzi eta RSS fitxategia formateatu egiten du. Hasi ginenean aukera hau oso arrunta ez zen arren, gaur egun jada, asko dira jarioari formatua ematen dioten zerbitzuak. Firefoxek berak, adibidez, laster kaleratuko den 2.0 bertsio berrian, aukera hau aurkeztuko du berrikuntza nagusien artean
Gainera, gure jarioen jarraipena egiteko estatistika oso interesgarriak eskaintzen dizkigu. Jario zaharrarekin, IKTeroetara harpidetutakoan jarraipena egiteko Bloglinesen begiratzea besterik ez zegoen: jario honekin harpidetuta dauden guztien agregatzaileak zeintzuk diren jakin dezakegu. Edota eguneko zenbat jario jaso diren harpidetutakoen artean.
Baina nire iritziz, abantailarik handiena zera da: jarioen bukaeran gehitzen den etiketa zerrenda. Etiketa hauen bitartez, jarioari halako interaktibitatea gehitzen zaio: jariotik, bertatik, aukera dago jario bera posta elektronikoz edonori bidaltzea, bidalketa del.icio.usen gordetzea, Technoratin dituen aipamen kopurua ikustea, bidalketaren iruzkinetara zuzenean salto egitea…

FeedFlare izeneko etiketa hauek hasiera batean kopuru jakin batetara mugatuta zeuden arren, gaur egun edonork sortu ditzake berriak eta, ondoren, bere jariora gehitu. Horretarako nahikoa da XML fitxategi sinple batzuk sortu eta webgune batean kokatu, fitxategiari helbide jakin bat emanez. Sortu diren etiketa berri hauen artean, badago bat bidalketa Meneamera zuzenean gehitzeko balio duena. Kontutan izanik Zabalduren azpian dagoen kodea Meneamerenaren berdina dela, azken honetatik abiatuz, bidalketak Zabaldura igotzeko etiketa sortzea otu zait.

Eta horrelaxe egin dut. Beraz, une honetatik aurrera IKTeroen jarioak bidalketa zabaldu.comera zuzenean bidaltzeko aukera eskainiko du.

Feedburnerrekoekin harremanetan jarri naiz Zabaldu.comeko FeedFlarea euren zerrendan ipintzeko. Bitartean, zuetako norbaitek erabili nahi badu, nahikoa du zabaldu.xml fitxategi honen helbidea kopiatzea eta Feedburnerren duen kontuan itsastea. Hori besterik ez da egin behar

Google Apps For Your Domain: posta kontuak gure ikasleentzako

googleapps Gure ikasleei korreo kontu bana eskaintzea aspalditik dugun beharretako bat da. Luze aritu gara posta elektroniko kontuak kudeatzeko dauden zerbitzu desberdinak baloratzen eta ez da batere erraza izan hauen artean gure beharretara ondoen egokitzen dena aukeratzea. Aukeretako bat gure zerbitzarietako batean dugun Microsoft Exchange korreo zerbitzaria erabiltzea zen. Irakasleon kontuak honen bitartez kudeatzen dugun arren, ez genuen oso garbi sistemarik egokiena ote zen ikasleen posta kudeatzeko. Ikasle gehienek postaren erabilera egokia egiten duten arren, denok dakigu hauetako batzuen postontziek, kasu askotan, “erloju bonben” antzera, edozein momentutan jarri dezaketela konpromezuan gure sarearen segurtasuna. Hori dela eta, errezelo asko genituen sistema honekin.

Beste aukeretako bat, web bitarteko zerbitzuak erabiltzea zen. Hauen kasuan ere kontrako aldagaiak aldekoak baina gehiago ziren: posta helbide arrotzak, taldeak kudeatzeko arazoak, segurtasun eskasa…Aukera hau ere baztertzearen aldekoak ginen. Dena den, talde txikietan erabiltzeko (kontu asko sortu behar ez den kasuetan, behintzat) GMailen aldeko apustua egin genuen. Seik, adibidez, batxilergoko hiru taldeetako ikasle bakoitzarentzat GMaileko kontu bana sortuta zuen jada ikasturte honen hasierarako.

Horretan geundela abuztuaren 28an, oporretatik bueltan, Googlek “Google Apps for your Domain” kaleratu behar duela adierazten du bere blogean. Googleeko beste hainbat zerbitzuekin gertatzen ohi den bezala, hau ere beta fasean egonik, zerbitzua probatzeko beharrezkoa zen gonbidapena jasotzea Googleekoengandik. Egoera ikusirik, Magicek ziztu batean bidali zien Googleeko kideei mezu bat gonbidapen bat eskatuz. Egun gutxi batzuren ostean, hortxe genituen 100 posta kontu berri konfiguratzeko moduan.

Egun batzuk zerbitzuaren muina zein zen ikasten egon ondoren, ikasleen kontuak sortzeari ekin genion. Lehenengo urratsa zera zen: Googlek zituen posta zerbitzariak gure domeinuarekin harremanetan jartzea. Zer esan nahi duen honek? Labur esanda, Googlek eskainitako posta helbideak izena@gmail.com motatakoak izan ordez izena@jakintza.net (gure kasuan) helbidea izatea. Horretarako nahikoa da domeinua erregistratuta duzun webgunera joatea eta, orri honetan adierazten den bezala, MX erregistro berri batzuk sortzea. Gure kasuan, jakintza.net domeinua Domitecaren bitartez erregistratu genuenez bertara joan eta esandako aldaketak egin behar izan genituen. Hasieran konplikazio txiki batzuk izan arren, bertako zerbitzu teknikoak ziztu batean konpondu zigun arazoa.

Egun batetik bestera, jakintza.net izenean 100 posta elektroniko kontu berri sortzeko aukera genuen. Esan eta egin, gure batxilergoko ikasleentzako korreo kontuak sortzeari ekin genion. Kontu kopuru handia sortu behar denez, aukera dago, “Bulk Account Update” izeneko zerbitzua erabiliz, kontuak taldeka sortzeko. Horretarako nahiko da CSV fitxategi bat sortzea ikasleen datu hauekin: username, first name, last name eta password. Zerrenda hau igo ondoren sistemak sortzen ditu ikasle guztien korreo kontuak une batean (hori bai, kontu pixka bat eduki behar da pasahitzarekin: honek zehazki sei karaktere bakarrik izan behar ditu). Era honetan di-da batean sortu ditugu batxilergoko ikasle guztientzat posta kontu bana.

Astebete daramagu zerbitzu hau erabiltzen eta esan beharra dago primeran dabilela. Gure ikasleek posta kontua izateaz gain, egutegi propioa dute eta GTalk izeneko txata ere. Hona hemen hauen ezaugarri nagusienak:

Posta kontua GMaileko beste edozein kontu batek dituen ezaugarri berdinak ditu: 2 Gbeko edukiera (halere, Gmailek zertxobait gehiago eskaintzen du), SPAMaren aurkako sistema eraginkorra (oso inportantea ikasleen kasuan), POP3 korreoa konfiguratzeko aukera, mugikorrean korreoa jasotzeko aukera… Nire iritziz, zerbitzu honekin merkatuan dagoen posta elektroniko zerbitzu hoberena erabiltzeko aukera eskaintzen diegu gure ikasleei. Bestalde, posta zerrendak sortzeko aukera ere ematen du. Gure kasuan zerrenda desberdinak sortu ditugu: gela bakoitzeko bat, hautazko desberdin bakoitzarentzat beste bat, zientzietako eta letretako bi taldeentzat beste bi…
Ikasle bakoitzak GMaileko kontu bat izateaz gain egutegi pertsonala ere badu. Bertan, norberak bere erregistro pertsonalak jasotzeko aukera du. Irakasleontzat bereziki garrantzitsua den aukera bat egutegiaren partekatzearena da. Nire kasuan Fisikako egutegi berezi bat sortu dut nire kontuan eta ondoren maila bakoitzeko ikasleekin partekatu dut. Nire ikasle bakoitzak egutegia partekatzeko gonbidapena jasotzen du. Onartu ondoren, nire Fisikako egutegian gertaera bat ipintzen dudan bakoitzean, hau automatikoki nire ikasleen egutegian agertzen da, eurek ezer berezirik egin gabe. Beste ikasgaietako irakasleek ere euren egutegiak partekatu ondoren, maila bakoitzeko ikasle bakoitzak eskola egutegi propioa izango du, bertan ikasturtean zehar izango dituen gertaeren, eginkizunen, ekimenen.. berri jasoko duelarik. Eta garrantzitsuena dena: hauek denak erregistraturik geratuko dira (zalantzak eta gaizki-ulertuak egon ez daitezen gero).
“Google Apps for your Domain”ek eskaintzen duen hirugarren zerbitzua GTalk da. Postaren kudeatzailean bertan agertzen den txat zerbitzu honen bitartez aukera daukagu gure ikasleekin harremanetan jartzeko denbora errealean. Gainera, ahots bitarteko komunikazioa, fitxategiak ziztu batean bidaltzeko aukera… beste erabilgarritasun interesgarriak dira ere.

Zerbitzuaren erabilgarritasuna nolakoa den ikusirik ondorengo erabakia hartu dugu Jakintza ikastolan: gure ikasleak Lehen Hezkuntzako Lehen Mailara heltzen diren unean, ikastolako sarean sartu ahal izateko kontu pertsonala izango dute, norberak bere karpeta pertsonala izango duelarik. Era berean, Googleen zerbitzu honetan oinarriturik, posta kontu pertsonala ere izango du. Datu hauek ikasle bakoitzaren fitxa pertsonalean gordeta geratuko dira 6 urtetik 18 urte bitartera.

Baina nola eraman aurrera hau guztia Googlek 100 kontu bakarrik eskaini baldin badizkigu? Gaur goizean (goizeko hamaikak inguru izango ziren) mezu bat bidali diet “Google Team”-ekoei 700 kontu gehiago eskatuz (bai badakit askotxo direla baina eskatzea librea da, ezta? ). Hara non nire sorpresa, gaur arratsaldeko bostetan (hau da, sei ordu besterik ez dira igaro!) Matthewk (Google Teameko kide batek) eskatutako 700 kontuak operatiboak ditudala erantzun didanean. Eta horrelaxe da!!! Badaukat lana datozen egunetarako!!!