Kategoria: Jakintza ikastola

Jakintzazu: ikastolako blog komunitate berria

Aurrekoan adierazi genuen bezala, atzo eman genion hasiera Guraso Eskolari. Lehenengo saioan gure txanda izan zen. Gure ikastolan egiten dugunaren berri gurasoei azaltzea zen helburu nagusia. Egia esan, ez ginen oso gustura gelditu gure gurasoen inplikazioarekin. Kontutan izanik ekimena eurek egindako eskaerari erantzuteko antolatu genuela, partaidetza handiagoa espero genuen. Eta ez dut uste eguraldiaren aitzakiak justifika dezakeenik hain asistentzia kaxkarra. Tira, bizi dugun errealitatearen adierazgarri izan daiteke.

Aspalditik hasi ginen saio hauen prestakuntzarekin. Bitarte honetan buelta asko eman dizkiogu buruari; nahikoa ote den gurasoak informatuta edukitzearekin, ez al ditugu gurasoak eurak ere inplikatu behar IKTen erabileran, gure ikasleek egiten dutenaren berri izateko ez ote den beharrezkoa tresnak ere erabiltzen jakitea… Analisi eta eztabaida askoren ondoren zera erabaki genuen: informazioa zabaltzea garrantzitsua izanik, ezinbestekoa dela gurasoak, ahal den neurrian, erabiltzaile aktiboak bilakatzea, irakasleok gela barruan erabiltzen ditugun tresnak erabili eta ezagutu ditzaten.

Horrelaxe gure ikastola osatzen duten kide guztiei irekita egongo den blog komunitate bat sortzea otu zaigu, ikasle, ikasle ohi, guraso eta irakaslez osatutako ikastolako komunitate digitala. Pentsa eta egin!. Atzoko saioa aitzakiatzat hartuz, bertan egin genuen gure komunitatearen aurkezpen ofiziala. Gaur, berriz, hemen egitea tokatzen zaigu

Atariari Jakintzazu izena ipini diogu, transmititu nahi dugun espiritua oso ondo islatzen duela iruditzen zaigu. Hasieran aipatu dudan bezala helburu desberdinak lortu nahi ditugu atari honekin. Guztien berri daukazue hemen. Azpimarratu nahi dudan gauza bakarra zera da: komunitateko partaide izateko derrigorrezkoa da Jakintza ikastolako kide izatea.

Teknikoki, hauexek dira gunearen ezaugarri orokorrak:

  • Jakintzazuko gune nagusia WordPress MU 1.1.1 aplikazioaren gainean eraiki da. Plataforma osoa euskaraturik dago; lokalizazio fitxategiak eskuratu nahi dituenak hemendik jaitsi ditzake. Esan beharra dago, .po fitxategiaren euskaratze lan handiena Aitor Ortuondok egin duela, guk geratzen zen zati bat besterik ez dugu euskaratu. ziurrenik gauza dezente izango ditu zuzendu beharrekoak; ziur norbaitek botako diela bistazo bat eta txukun txukun utziko dituela. :wink:
  • Sisteman logeatzeko sarrera orokor bat ipini da atari nagusian. Bertan ikus daitezke azken blogen, blog aktiboenen eta plataforman argitaratutako azken bidalketen zerrendak
  • Komunitatean argitaratutako bidalketa guztiekin planet bat sortu dugu. Bertan bilduko ditugu Jakintzazun argitaratutako bidalketa guztiak, baita hemendik kanpo ditugun beste blog guztienak ere (IKTeroak barne). Jakintzaren planetan izena ipini diogu eta, nahiz eta oraindik erabat bukatuta ez egon, astea amaitu baino lehen martxan izango dugula espero dut.
  • Erabiltzaileen zalantzak argitzeko, foro bat ere martxan ipini dugu. bbpress 0.8 bertsioarekin egina dago eta hau ere euskaratu egin dugu. Hemen dituzue .po eta .mo fitxategiak
  • Bukatzeko, eta laguntza moduan dokumentu batzuk ipini ditugu erabiltzaileen eskura, oinarrizko erabileran trebatzen joan daitezen

Egia esaten badizuet, izugarrizko lana eman digu hau guztia martxan jartzea (seguruenik konturatuko zineten argitaratutako bidalketen maiztasuna asko jaitsi dela azken hilabete honetan, ezta?). Ez dakit zenbat ordu pasa ditugun Mikel eta biok plataforma guztia garatzen eta, oraindik, esan beharra daukat ez daudela atal guztiak erabat ondo lotuta (diseinuarekin loturiko arazo batzuk ditugu oraindik). Tira, espero dezagun egindako esfortzua emankorra izatea eta, Jakintzazun aipatzen den bezala, “Jakintzako komunitatea aberasteko, elkarren berri izateko, hitz batez, komunikazioa sustatzeko aukera paregabe” hau arrakastatsua izatea.

Bukatu aurretik Aitor Ortuondori eskerrak eman nahiko nizkioke. Bera izan da WPMU-ren lokalizazioa bidali ziguna eta bereak dira ere, gure blogetan erabiliko ditugun euskaratutako azal gehienak. Mila esker Aitor hain eskuzabala izateagatik!

IKTak aztergai Guraso Eskolan

Urteak dira gure ikastolan “Guraso Eskola” izeneko ekimena aurrera daramagula. Urte horietan, formatu ezberdinak erabili dira saioak antolatzeko, baina kasu guztietan aukeratutako gaiak gurasoen eskaeratan oinarritu dira. Gai asko jorratu dira azken urteotan, baina Teknologia Berriak ez dira sekula agertu gurasoen kezken edo interesguneen artean.

  • IKTak
  • Haur eta gazteen garapena
  • Familiaren garrantzia Euskararen normalizazioan

Guri IKTen atala antolatzea egokitu zitzaigunez, prestatzeari ekin genionean, hiru saio aurreikusi genituen:

  • Gure ikastolaren ikuspegi orokorra IKTen inguruan: gure ikastolako gurasoei ikastolan egiten ari garenaren berri eman nahi diegu: IKT taldea, bere eginkizunak, gure IKT plana, nola txertatzen ditugun gelan, zein helburu ditugu, ikusten ditugun arazoak, ikasleen jarrera etorri zaizkien aldaketekiko… Izan ere, konbentzituta gaude guraso askok horren inguruko informazio gehiago ezagutu nahiko dutela. Saio honen dinamizazioa gure IKT arduradunak, Jokin Lacallek, eramango du.
  • Etorkizunari begira: Aldaketa nabarmenak gertatzen ari dira azken urte hauetan teknologia mailan. Gure gazteek geroz eta tresna gehiago dituzte, geroz eta baliabide gehiago dituzte eta hauek guztiek eragina dute euren artean komunikatzeko eran, sozialki hartzen dituzten hainbat ohituretan eta, guretzat, garrantzitsuagoa dena, euren formazio akademikoan. Azken honi garrantzia berezia eman nahiko genioke eta, batez ere, gurasoei azaldu nahiko genieke ikasleen formazio prozesuan internet berriak duen garrantzia. Gaur egun bizi duten egoera eta, etorkizun ertain batean honek izango duen bilakaera ere azaldu nahi diegu. Prospektiba ariketa txiki bat eginez, etorkizuna aztertzen saiatuko gara. Honetarako, Eneko Astigarragaren laguntza izango dugu. Zein hobeto etorkizuneko zirrikituetan murgiltzeko Eneko baino?
  • Gurasoen rola IKTen aurrean: guraso askok ez dakite zer egin, nola jokatu, debekua ezarri edo ez… Hori dela eta, gustatuko litzaiguke, teknologia berrien erabilerarekin loturiko arriskuen aurrean, gurasoek jarraitu beharreko pautak azaltzea baina hauen ikuspegi positiboa ere transmitituz, alarmismo faltsurik gabe. Saio honetarako guraso eta seme-alaben arteko harremanetan esperientzia duen norbait nahiko genuke, agian pedagogoren bat edo, baina era berean, internet berria ezagutzen duena. Gure gaztetxoak “W Hirukoitza erakunde maltzurraren hatzaparretatik libratzeko errezeta magikoak” eskaintzen dituzten espezialista ugari dago. Guk ikuspegi errealistagoa zabaltzea nahiko genuke. Baina, zoritxarrez, ez dugu oraindik inor lortu. Baten bat ezagutzen baduzue, esaguzue, mesedez.

Gaur bertan irekiko da gure txanda eta lehen saioa 18:30etatik aurrera burutuko dugu. Bigarrena, datorren astelehenean, ordu berean eta Enekoren maisutasunez. Azkena, zehaztu gabe daukagu, lehen esan dudan lez, ez baitugu inor aurkitu gai hori jorratzeko.

Bukatzeko, goraipatu nahiko nuke gure ikastolako gurasoek erakutsi duten interesa, ez baita ohikoa gisa honetako gaiak proposatzea. Gure iritziz, gurasoak ikusten ari dira euren seme-alabak oso gauza “bereziak” egiten ari direla, euren jakin-mina areagotu egin dela… baina ez dakite horren atzetik zer den benetan ezkutatzen dena. Horregatik, eta aukera hau aprobetxatuz, ekimen berri bat martxan jarri nahi dugu gurasoak IKTen munduan murgiltzeko eta gure proiektuekin inplikatzeko. Nolanahi ere, proiektuak argia ikusten duenean, izango duzue horren berri.

Euskal Inauteriak 2.0

Inauteriak gainean ditugu eta, ohiturari eutsiz, gure ikastolan buru belarri gabiltza prestakuntza lanetan.

Antolatzen dugun desfilea izan daiteke kanpotik gehien ikusten den ekintza, baina hori ez da gure ikastolan gai hau lantzerakoan egiten den gauza bakarra. Izan ere, Euskal Inauteriak jorratzea erabaki genuenetik, alde ludikoari bizkar eman gabe, beste motako helburuak lortu nahi genituela oso garbi ikusi genuen eta era guztietako jarduerak antolatzen hasi ginen gure ikasleekin desfileaz gain.

Aurten, adibidez, ahozkotasunari garrantzia berezia eman nahi izan diogu eta antolatutako lanketa guztia horrekin lotu dugu.

Burututako ekintzen artean, hona hemen ikasleekin landutakoaren laburpen txiki bat.

Lehen Hezkuntzako maila bakoitzak Euskal Inauterietako pertsonaia bat landu du. Taldeka antolatu dira egokitu zaien pertsonaiari buruzko informazioa bildu, ekoiztu eta azalpen testu bat osatzeko. Talde hauek prestaturikoa gainontzeko gela guztietan azaldu dute.


1. maila

2. maila

3. maila

4. maila

5. maila

6. maila

Lanketa hau burutu ahal izateko, elkarlanean aritu dira ikasleak nahiz irakasleak eta ikastolak jendaurreko azalpenak emateko ezarrita dituen oinarrizko irizpideak jarraituz, oso esperientzia aberasgarria bizi izan dugu eta zuekin guztiokin partekatu nahiko genuke.

Jendaurreko azalpenetarako oinarrizko irizpideak:

PRESTAKETA

  1. Irakurketa burutuko duen ingurunea aztertu
  2. Edukiak aukeratu, pilatu eta hierarkizatu
  3. Diskurtsoa antolatu
  4. Denborara egokitu
  5. Baliabide osagarriak biltzen saiatu

JENDAURREKO AZALPENA

  1. Hizlariaren aurkezpena: Jendaurreko diskurtso formalaren itxura eman beharko zaio.
  2. Hizlariaren ekoizpena: Entzuleekin harremana eta norberaren rolak garbi geldituko dira eta hauek erakartzen ahaleginduko gara. Gaia kokatu beharko dugu eta, ahal bada, bitxikeriren bat kontatu entzuleen arreta eta jakin-mina pizteko. Edukiak igortzeko eta entzuleengana iristeko, adibideak erabiliko ditugu, ahots aldaketak, galderak tartekatuko ditugu, material osagarriak erabiliko ditugu, hizkuntza zuzena, denbora zaindu, entzuleari begira hitz egin, ondo ahoskatu, entzuteko moduan hitz egin, keinuak eta gorputzeko mugimenduak erabili…
  3. Hitzuztea edo azalpenaren bukaera: Bukatu dugula esango dugu, eskerrak emango ditugu, galderak luzatuko ditugu ulertu den edo gustatu den jakiteko… Aurkezleak edo moderatzaileak amaiera gidatu beharko du eta hizlariari eskerrak eman orduko, nahi izanez gero, galdera- erantzunen tartea zabaldu eta gidatuko du.

Hori guztia gutxi balitz, Teknologia Berriek eskaintzen diguten aukeraz baliatuz, podcast bat sortu dugu ikasleek emandako azalpen horiek biltzeko eta bideo bat Youtuben jarri dugu. Argazkiak ere Ikastolako web orrian eta Flickr-en jarri ditugu.

Hona hemen pertsonaia bakoitzarekin grabatutako podcast-a:

Eta hona hemen, Youtuben jarri dugun bideoa:

Ondo pasa inauteriak!!!!!!

EGUNERAKETA: 2007-02-17

Hemen duzue atzo arratsaldean izandako desfilearen laburpena. Gustatuko zaizuelakoan

Txitxardin Beltzako diskurtsoa

Duela egun batzuk, Enekok idatzitako iruzkin batean, Txitxardin Beltzan Sareko Argia saria jaso genueneko diskurtsoa irakurtzeko aukerarik ba ote zegoen planteatzen zigun. Anotazio batzuen inguruko hitzaldia izan zen nirea; testu egituratu bat prestatzeko denbora behar nuela eta, geroagorako utzi nuen asuntoa. Gainera, Lasarteko aurkezpena luzeegia izateaz gain, bertan plazaratu nituen ideiak ulertu ote ziren ere zalantzaz geratu nintzen.

Kontua da, atzo El Diario Vasco-ko herriko kronista izan genuela ikastolan. Denbora luzez bere aurrean hitz egin ondoren, ea gaurko Ordiziako kronikarako lerro batzuk idatziko ote genituen eskatu zigun. Egokiena, Lasarteko apunteak hartu, eta bertan aurkeztutakoaren idatzi bat prestatu eta bidaltzea zela pentsatu nuen. Horixe da Ordiziako gaurko kronikan irakur dezakezuena eta nik azpian ipini dizuedana. Nik uste testu honek nahiko garbi adierazten duela Lasarten azaltzen saiatu nintzena eta iruditzen zait, gure betiko irakurleak zaretenok, erraz ulertuko dituzuela bertan adierazten diren hainbat ideien zergatia.

Beraz, hona hemen testu osoa:

IKTeroak izeneko gure bloga 2005eko apirilaren 11an sortu genuen. Ordurako “Teknologia berrien identifikazioa eta ezagutza” izeneko prozesua martxan ipinia genuen ikastolan, bere ardura nagusia nirea izanik. Hainbat iturri desberdinetatik jasotako informazioa gure ikastolako irakasleen artean nola zabaldu zen garai hartako arazoetako bat. Horrela, gure ikastolako ikasle nahiz irakasleei informazio baliagarria eskaintzeko biderik egokiena, bloga martxan jartzea zela erabaki nuen.

Bloga Jakintza ikastolako IKT taldea osatzen genuen kide guztioi irekita egon arren, hasiera hasieratik Mikel Etxarri eta Maite Goñi izan ziren ekimenari gogo gehienez erantzun zioten irakasleak. Horrela, hiruon artean bildutako informazioa, bizitako esperientziak edota egindako hausnarketak IKTeroak izeneko blogan argitaratzen hasi ginen.

Gogoratzen dut lehen egunetan gure kezkarik handiena zera zela: nola hartuko dituzte gure irakasleek gure ekarpenak? Irakurriko ote dituzte? Tarteka tarteka iruzkinen bat edo beste aurkitzen genituen gure artikuluetan eta, gure harridurarako, gehienak ikastolatik kanpoko irakurleek idatzitakoak izaten ziren. Kontxo, ikastolatik kanpo jarraitzen dituzte gure ere gure istorioak!

Halako batean, Maite Goñik interneten topa daitezkeen euskarazko hainbat hiztegien aipamena egin zuen bere artikulu batean. Txundituta geratu ginen konturatzean zenbat bisitari zetozen gure blogera Google bilatzailean “euskal hiztegiak”, “euskara” edota “euskarazko baliabideak” hitz gakoak idatzi ondoren. Honek interneteko euskal komunitatearentzat halako gabezia batzuk zeudela garbi adierazten zuen. Horrela, IKT taldean buruturiko hausnarketa sakon baten ondorioz, hasierako helburuak birplanteatzea eraman gintuen:

  • Gure ikastolan IKTak irakaskuntzan inplementatzearen beharraz jabetuta geunden arren, ezinbestekoa iruditzen zitzaigun gure esperientzien berri euskal komunitate osoari zabaltzea. Uste genuen (eta gaur egun erabat konbentzituta gaude) gela barruan gure ikasleekin izandako bizipenak aberasgarriak izan zitezkeela eskola komunitatea osatzen dutenentzat.
  • Bestalde, euskararen presentzia interneten bultzatzea izan zen hartutako bigarren erabakia. Erabiltzen ditugun edukiak, sortzen ditugun jarduerak, ariketak, ikastaroak, euskaratzen ditugun aplikazioak… denen eskura ipiniz, euskarari bultzadatxo bat emango geniola pentsatzen genuen. Bide batez, edukiak partekatuz, irakaskuntzan hain errotuta dagoen “materialaren jabego pribatuarekin” puskatu nahi genuen, eskola komunitatean partekatzeak dakarren onuraz besteei jabetuaraziz (kataluinan, adibidez, ederki asko egiten duten moduan). Eta garrantzitsuena dena; partekatze filosofia honetan gure ikasleak inplikatu nahi genituen. Ikasketekiko adierazten duten jarrera pasiboarekin eten eta, eurek ere euskal gizarteari zer eskaini badutela ulertarazi nahi genien.

Horrela, hasierako lotsa haiek alde batera utziz, “gure ikastolako sukaldean egositako plateren” berri zabaltzen hasi ginen egindako lan eskergak gure inguruan eragin positiboa izango zuelakoaren konfiantzaz. Eta horrelaxe izan dela uste dugu; geroz eta gehiago izan dira kanpotik jaso ditugun animoak, geroz eta leku gehiagoetatik luzatu dizkigute gonbidapenak gurearen berri euren ikastetxeetan azaltzeko, geroz eta gehiago izan dira jasotako errekonozimenduak, Sareko Argia saria hauen guztien azkena eta, zalantzarik gabe, garrantzitsuena izan delarik.

Bi urte eskas egin ditu gure blogak sarean. Ziztu batean pasa zaizkigun hogeita lau hilabete hauetan espero ez genituen bizipen mordoa jaso ditugu. Esan dezakegu, lotsarik gabe, onartuak eta errekonozituak sentitzen garela bai internet baita euskal eskola osatzen duten estamentu desberdinetatik.

Baina, sentsazio gozo horiekin batera sentitzen dugu ere gazi puntu bat. Izan ere, arestian aipaturiko filosofiak ez du eragin handirik izan eskola komunitate orokorrean.

  • Alderdi batetik, oso gutxi dira oraindik euren esperientziak besteekin partekatzen dituztenak, inolako konplexurik eta beldurrik gabe.Jakin badakigu, ari direla bai sare publiko, bai ikastolen elkartetik, baita lanbide heziketako ikastetxeen aldetik esperientziak partekatzen, proiektu pilotuak garatzen eta gureak bezalako ekimenak aurrera eramaten baina zoritxarrez hauetako gehienak giltzapean daude. Lehen esan dudan bezala “gure sukaldean sekreturik gabeko sukaldaritza prestatzen dugu” baina badirudi oraindik, euren errezetak giltzapean gordeta edukitzea nahiago dutenak. Zer balio dauka norberak bakarrik ikusi eta ukitu dezakeen altxorrik preziatuena gordeta edukitzea? Gure kide katalanak aspaldi jabetu ziren benetako balioa herriaren onurako ekimenak bultzatzean dagoela. Horrelaxe heldu dira irakaskuntza mailan Europa herrialde aurreratuenetako bat izatea IKTen erabilerari dagokionez behintzat.
  • Bestalde, oso gutxi dira oraindik baliabideak euskaraz sortzeari ekin dietenak. Euskararen presentzia interneten oraindik oso eskasa da. Erotu egiten gara askotan irakasleok gure ikasleekin euskarazko baliabideak erabili nahi ditugunean eta zoritxarrez, gehienetan, beste hizkuntzetan sortutako baliabideak erabiltzera jo behar izaten dugu. Izan gaitezen eskuzabal, utzi ditzagun alde batera jokabide atzerakoiak, eta ekin diezaiogun euskarazko edukiak sortu eta interneten kokatzeari. Unibertsitateak eta eskolak, erakunde publikoekin batera, zer esana handia daukagu horretan.

Amaitzeko, ez dut aukera hau pasatzen utzi nahi, gure herriko udalari eskaera txiki bat egin gabe: informazio eta komunikabideen teknologiak geletara eramaten lan handia egiten ari gara herriko ikastetxe guztiak. Ordiziako gaztetxoak teknologietan alfabetatuak izatea nahi dugu. Baina zoritxarrez gazte hauetako askok, ez dute IKTak euren etxeetan erabiltzeko aukerarik oraindik. Hori dela eta, ahalegin bat eskatuko nioke gure udaletxeari horretarako baliabide gehiago jar ditzan. Adibidez, ez legoke batere gaizki udal liburutegian ekipo gehiago ipintzea, hauen erabilera dohainekoa izanik. Gure herriko gazteek inoiz baino gehiago behar dituzte ordenagailuak euren eguneroko lanak egiteko. Ea ba denon artean laguntzen diegun.

Begiak bustitzen zaizkit horrelakoak irakurtzerakoan…

Batzuetan, gutxien espero duzunean, barruak aztoratzen dizkizun artikulu horietako bat irakurtzen duzu sarean. Gaur, DBH 1eko gure ikasle batek idatzitako azken posta irakurri dut. 10 urteko ikasle honen idatzia irakurtzen amaitu dudanean malkotxo batzuk ihes egin didatela onartu behar dizuet. Emozionatu egin naiz!

Eskerrik asko Iñigo. Ez duzu imajinatzen zein harro sentitu naizen zure ipuina irakurri ondoren!

PD: Iñigoren bloga irakurtzea gonbidatzen zaituztet. Tresna hauen baliagarritasunaz ohartzeko adibide polita da.