Kaixo, lagunak! IKTeroak-en parte hartzen dugunok jakin badakigu arrakastatsuak izan direla oso orain arte euskararen inguruan idatzitako hainbat artikulu (hiztegiak eta EGAko ariketak on-line…) eta horregatik urrats bat gehiago eman nahi izan dugu alor honetan: euskararen zabalkunderako eta euskal literatura zein kultura ezagutzeko interesgarriak iruditzen zaizkigun erreferentziak bildu nahi izan ditugu. Gure asmoa euskararen erabilera egokia bultzatzea eta euskal literatura eta kulturari buruz aurkitzen dugun informazio interesgarria zabaltzeaz gain, edonorren eskutan ahalik eta modu errazenean informazio hori guztia jartzea izan da. Orri honen eskuineko aldean euskarazko baliabideak on-line izeneko esteka klikatzen baduzue, atal ezberdinetan sailkatutako euskarazko baliabideak topatuko dituzue: hiztegiak, entziklopediak, euskal literatura, euskara lantzeko jokoak…).
Baliagarria suertatuko zaizuelakoan egin dugu eta, gure nahia bilduma osatzen joatea denez, zuen emanaren zain gelditzen gara… Bestalde, norbaiti atal berriren bat otuko balitzaio, sartzeko prest geundeke. Besterik gabe, zuen iritzien zain gelditzen gara. Ordura arte, ondo izan!
Kategoria: Denetarik
Kalitatea Hezkuntzan V
Kalitate ereduek inon eragina izan behar badute, ikaskuntza-irakaskuntza prozesuetan izan beharko luke. Aurreko artikuluan aipatu nituen baldintzak betetzen direnean, esparru zabal bat irekitzen da prozesu horietan eragiteko: unitate didaktikoak, saio lektiboa, ebaluazioa, tutorizazioa… Horietan guztietan Teknologia Berrien inplementazioa gauzatzeko erak berebiziko garrantzi izan dezake. Ikastolok ahalegin handia ari gara egiten prozesu horiek tresna bateratu batez kudeatzeko eta Ikasweben txertatzeko. Horrek garrantzi handia badu ere, nire asmoa gela barrura begira dago. Hau da, kalitate eredu eta teknologia berrien inplementazioak gela barruko jardunean duen eragina aztertzea izango da nire xedea.
Teknologia Berriak ikastetxeetan sartzen hasi zirenetik, ene iritziz, asko izan dira eginiko hanka-sartzeak. Zalantzarik gabe, irakasleriaren prestakuntza falta izan da larriena. Horrek zaildu egin baitu erabileraren hedapena eta jarrera eszeptikoa sortarazi baitu. Beste fase batean, eskainitako formazioa programa jakin batzuen erabilera ezagutzera zuzenduta zegoen. Honekin, programa horietan “adituak” lortu ziren baina erakutsi al zitzaien programa horiek nola erabili ikaskuntza-irakaskuntza prozesuetan eraginkorrak izateko? Garbi dago erantzuna ezezkoa dela. Hori bai, ikasle guztiek “kopiatu eta itsatsi” komandoak oso ongi ikasi zituzten. Estereotipoz beteriko lanak ekoizten hasi ziren ( nork ez ditu jaso lanak oso-osorik internetetik kopiatuta eta WordArt-eko izenburuekin apainduta? Nire ikasleek badakite zenbat “gustatzen” zaizkidan lan horiek ), betiko hezkuntza ereduak errepikatzen ari ziren. Honekin, ikasleen sormena, iritzi kritikoa, pentsamentu eraikitzailea… mugatu egiten zen. Zorionez, irakasle asko egoera horrekin gustura ez , beste planteamentu batzuk egiten hasi ziren. Helburua: eraginkorrak izatea ikaskuntza-irakaskuntza prozesuan ikasleen sormena eta jakin-mina sustatzeko.
Bide hau askoz ere interesgarriagoa iruditzen zait eta aukera ugari dagoen arren, nik balibide batzuk besterik ez ditut aipatuko: Webquest-ak, weblogak, Skype eta Messenger. Hauek bakarrik aipatzearen arrazoia oso xinplea da: gure ikastolan erabiliak dira eta euren baliagarritasuna frogatuta dut. Horietaz gain, Moodle , clic … aipa nitzake baina zerrenda bukaezina egingo litzaiguke.
Beharbada, garrantzi gutxien duena erabilitako tresna da. Bakar-bakarrik guk ziurtatu beharko dugu erabilitako tresnak bermatzen duela lortu nahi dugun helburua. Arestian aipaturiko tresna horiek beste interakzio mota bat ahalbideratzen dute eta oso baliagarriak dira ikasleengan jakin-mina pizteko, informazioaren trataera egokia sustatzeko, elkarkidetza bultzatzeko, gogoeta eragiteko…
Guk, gure ikastolan, EFQM eredua ezarri genuenetik, tresna ugari daukagu gure eguneroko jarduna ebaluatzeko, berrikusteko, hobetzeko… eta horiei esker, berehala jakin genuen Teknologia Berrien inguruko ikuspegian aldaketa sakona eman behar genuela, baita eman ere!. IKTen inguruko prozesuak abian jarri genituen eta, horiekin batera, formazio plan sakona hasi genuen. Hasiera hasieratik oso garbi genuen ikaskuntza-irakaskuntza prozesuen mesedean jarri nahi genituela IKTak. Garatu beharreko Curriculuma zehaztu, azpiegitura egokiaz hornitu, talde dinamizatzaile bat osatu… ; horiek izan ziren gure lehen urratsak, besteak beste.
Gaur egun, ohiko bilakatu dira gure ikasleen ekoizpen multimediak, lan digitalak, beste ikastetxeetako ikasleekin burutzen dituzten elkarlanak… Ikuspegia zeharo aldatu dugu eta, emaitzek itxaropentsu egoteko arrazoi asko ematen diguten arren, gauza asko hobetzeko dugula ez dugu ezkutatzen. Gure abantaila, eta ez da nolanahiko abantaila, EFQM ereduari esker garatu ditugun kontrol eta doikuntza tresnetan kokatuko nuke, izan ere, tresna horiek etengabe informazioa ematen digute eta neurri zuzentzaileak jartzeko bidea erakusten digute.
Honekin amaitu nahiko nuke Kalitatea Hezkuntzan izenarekin batailatu nuen artikulu sorta hau. Dena den, artikulu hauek idazten ari nintzela, beste ideia bat bururatu zitzaidan eta zin dagizuet epe laburrean gai honekin lotutako beste artikulu bat izango duzuela. Baina, lasai egon, bakar bat izango da eta, bertan, Kalitate Ereduen inplantazioa ikastetxeetan eta horietan Teknologia Berrien garapena aztertzen saiatuko naiz . Ba al dago harremanik? Ikusiko dugu. Besterik gabe, mila esker eta hurrengora arte.
1000 bisita!
Une honetan IKteroen bitakorak 1000 bisita izatera heldu da. Hilabete eta erdi oraindik ez du egin blog-arekin hasi ginenetik eta, honez gero, eguneko gutxi gorabehera 25 bat bisita ditugu (maiatzaren 9tik hona 70 bisitari izan ditugu eguneko). Hau dela eta, hasieran hartu genuen konpromisua indarrean darrai sekulan baino ilusio handiagoarekin. Eskerrik asko irakurtzen gaituzuen guztioi!!! 
Eta ez, sentitzen dugu baina ez dugu denborarik izan 1000. bisitariarentzat saririk prestatzeko. Agian 10000.arentzat…. 
Kalitatea Hezkuntzan IV
Gai hau jorratzearen arrazoia oraindik oso garbi ez dudan arren, agindutakoa bukatzen ahaleginduko naiz. Aurreko artikuluan aipatu nuen bezala, gaurkoan, ikaskuntza-irakaskuntza prozesuetan bikaintasunerako ereduen inplementazioak duen eragina aztertzen ahaleginduko naiz.
Lehenik eta behin, gai hau aztertzerakoan erabili behar nuen ikuspegia argitu behar izan nuen eta nahiko garbi ikusi nuen bat baino gehiago eman beharko niola. Gehiegi ez luzatzearren, bitan laburbilduko ditut: prozesu horietan indar-guneak eta gabeziak identifikatzeko eta eragiteko aukerak eta prozesu horietan erabil daitezkeen teknologia berrien eragina.
Prozesuak ezarri eta sistematizatu ondoren, ongi diseinaturik daudenean, behinik behin, horien kudeaketa etengabeko informazio iturri bilakatzen da. Hots, prozesu horien jarraipena egiterakoan PDCA izeneko zikloa burutuz gero, adierazle desberdinen inguruko informazioa izango dugu. Adierazle horien inguruko informazioaz baliatuko gara hobekuntzarako proposamenak luzatzeko, planak diseinatzeko, gure eginkizuna, ikusmira eta balioak gauzatzeko, giltzarritzat identifikaturik ditugun prozesuen bilakaera eta garapena ezagutzeko… Horrek guztiak erakundearen etengabeko hobekuntzaren filosofia indartu eta kontsolidatzen du.
Sistematika hori garatuta ez dagoenean, gehienetan, intuizioz aritzeko joera handia dago, horrek islatzen duenarekin: inprobisazioa, pertzepzio okerrak, informazio falta… Era horretan, ahuleziak nekez identifikatzen dira eta arazoak edo zailtasunak, hobetzeko aukerak bezala hartu beharrean, oztopotzat hartzen dira eta erruduna nor den bilatzeko joera izan ohi da. Praktika hauek erakundearen garapenean balazta lana egiteaz gain, bezeroen mesfidantza piztu eta bertako pertsonen frustrazioa eragiten dute.
Kalitatezko ereduetan murgildu nahi duen edozein erakundek eta etengabeko hobekuntzaren aldeko benetako apustua egiteko gogoa duenak Euskaliteko helbide honetan oinarrizko informazioa aurki dezake.
Hurrengo artikuluan, kalitatezko ereduetan ikaskuntza-irakaskuntza prozesuetan teknologia berrien eragina aztergai izango dugu. Hurrengora arte.
Xbox 360, Playstation 3 eta Nintendo Revolution; bideokontsola arrakastatsuenen modelo berriak
Ezagunak dira, jada, bideokontsola ezagunenen modelo berrien ezaugarri teknikoak.
Pasa den maiatzaren 12an Microsoft-ek, MTV telebista katean, bere Xbox 360ยบ bideokontsola berriaren aurkezpen ofiziala egin zuen. Badirudi Redmond-ekoek hobekuntza handiak egin dizkiotela aurreko modeloari.
Gaur bertan Sony-k Playstation 3-ren ezaugarriak kaleratu ditu. Bere ezaugarriak Xbox 360renaren parekoak omen dira. Gaur jakinarazi denez, aukera izango da kontsola honetan PS2 eta PS1-eko bideojokuekin aritzea. Diseinuan aldaketa dezente egon direla ezin da ukatu.
Azkenik, Nintendo etxeak GameCube-ren ordezkoa diseinatzen hasita egon arren, badirudi produktua ez dela dendetara helduko datorren urteko ekainararte gutxienez. Bere ezaugarriak ez dira oraindik ezagunak baina badirudi GameCube-a baina bizpahiru aldiz potenteagoa izango dela.
Nor irtengo da lehia honetan irabazle?. Zein da zuri iritziz hiruen artean bideokontsolarik konpletoena?. Zure iritziaren zain gaude.