2006 – 29 orrialdea

Taldearen indarra

Urteak dira IKTen inguruko mundu honetan murgildu nintzenetik. Benetan xelebrea da nola sartu ninduten/nintzen enbolatu honetan. Formazioz botikaria eta afizioz irakasle izanik, ez bata eta ez bestea, ez dira IKTen inguruko profesional batentzat profil egokienak, dudarik gabe. Ikastolen elkartetik teknologia berrietan dinamizatzaile baten figura behar zela adierazi zigutenean, nire ikastolan informatikaririk ez zegoenez, eginkizun horiek egokien beteko lituzkeen irakaslearen bila hasi ziren eta azkenean niregana jo zuten. Oraindik ez dut oso ondo ulertzen zein izan zen ni aukeratzearen arrazoia: nik katxondeon beti esan dut ikastolan zeuden irakasleen artean Word-en idazten azkarrena izatea izan zela. Eta horrelaxe, ia konturatu gabe, sartu nintzen mundu honetan.

Eta zer demonio eskaini nezakeen ba nik!!!! Remotoan funtzionatzen zuen trankimazin dispensadore bat nire ikasleentzako? Kafe makinan integratutako usuriaren analisia egiteko pote dispentsadore digital bat? Ordenadorearen aurrean irakasleek izaten zituzten haserre “subidoiak” arintzeko partxe transdermiko batzuk?. A ze papeleta!

Nire lehen eginkizuna (nola ez ba!) Word-en maketatutako ikastolako urtekaria egitea izan zen. Word-en!!!!!. Inprentatik telefonoz deitu zidatenean lehenengoz a ze lotsa:

– Non dauden argazkiak?, non egongo dira ba dokumentuan bertan, ez al dituzue ikusten ala?
– …
– Nola? Tiff argazkiak? eta zer da hori?
– …
– Koloreak?. Pantone? ¿? ¡! ^.^

Azkar espabilatu behar izan nuen. Hurrengorako ipurdia mugitu eta QuarkXpress erabiltzen ikasi nuen. Harrez gero, gauza ugari burutu ditugu gure ikastolan:

12 orrialdez osaturiko Jakintzazu izeneko hiru hiruhilabetekari, urtean 36 orrialde ikastola barruan ekoiztuak bai eduki baita maketazioa ere.
Ikasturte osoko argazkien bilduma CD batean: aurten DVD bat sortu dugu ikasturteko argazkiez gain ospakizun nagusienen bideoak dituena
Ikastolako sarearen egitura osoa goitik behera diseinatu eta garatu: gogoan dut hasierako urte haietan egindako Windows 2000 Serverreko ikastaroa (ene! zer zen hura!! Active Directory, unidad organizativa, baimenak, domeinua…. Beti pentsatu dut informatikan erabilitako terminologia oso itxusia dela, askoz politagoak dira aspirina, optalidon, supositorio… bezalako terminoak). Kontua da 35 bat ekipoekin hasi eta gaur egun 104 ekipo inguru izatera pasatu garela, denak sarean, denak konfiguratu eta konpontzeko.
Pasa den urtearen hasieran blogen mundua ezagutu eta hantxe sartu ginen ere, burubelarri. Beste adrenalina txute berri bat: sekula ez nuen imajinatuko bederatzi hilabete hauek hain emankorrak izango zirenik. Edukien sindikazioaren bitartez jaso dudan ezagutza, formakuntza eta nire lanarekiko perspektiba berriak izagurriak izan dira. Bene benetan esaten dizuet inondik inora ez nuela espero IKTeroak bezalako blog batek euskal blogosferan izan duen ohiartzuna izango zuenik. Euskal hezkuntza sisteman jada bazeuden eta gaur egun oraindik orain nabarmenagoak diren mugimendu berritzaileekin batera ezagutza partekatzeaz pozik sentitzen naiz.
Blogak gure ikasleekin erabiltzeko tresna interesgarriak izan zitezkeela ere pentsatu nuen eta horrelaxe hasiera eman nion hasiera jakinstein izeneko proiektuari.

Gauza asko hain denbora epe laburrean. Nire zakua eginkizunez betetzen joan da mantso mantso baina etengabe. Aspaldi honetan ez nabil gustora, ezinean nabil, itotasun sentsazioarekin. Nire ardurapean dauden proiektuak erdipurdizka ateratzen ari dira, niri gustatuko litzaidakeenetik urruti: aldizkari, DVDa, nire fisikako proiektua, blog hau bera… estankatze prozesu batean daudela iruditzen zait eta, une honetan, hauetako askok eskuetatik ihes egiten didate. Batzuen iritziz perfekzionistegia omen naiz, beti gauzak oso borobilduak izatea gustatzen omen zait. Agian hori izan daiteke baina orain arte ondo egindako lanaren sentsazioarekin etxera joaten nintzen bezala, ez zait gauza bera gertzten gaur egun.

Badira urte pare bat gure ikastolan IKTeroen taldea sortu genuenetik. Taldea osatzearen helburu nagusiena garbia zen: niregana heltzen zen ezagutza konpartituz gure ikastolako zoko guztietara zabaltzea, nire formazioa eta esperientzia konpartituz gure ikastolako kudeaketan urrats kuantitatibo eta kualitatiboak ematea. Eta esan dezaket neurri batean hau egi bihurtu dela. Hor daude sei eta magic izugarrizko lana egiten bere ikasleekin eta, bide batez, dakiten guztia beste irakasleei erakusten. Baina orokorrean, taldeko lan eta arduren banaketa, IKTero bakoitzak aportatu dezakeenaren identifikazioa, erabakiak taldean hartzea… ez dut ongi bideratu.

Beraz, gai hau gaurko IKTeroon bileran ateratzea erabaki dut. Nire errezeloak nituen ea nola jasoko ote zituzten nire azalpenak. Esplikazio orokor baten ondoren garbi adierazten ahalegindu naiz zer zen burutik pasatzen ari zitzaidana: gaur egun ekoizten ditugun produktu guztiak era egokian garatu nahi baditugu eta, bide batez, etorkizunean etorriko diren teknologiak gure eguneroko lanean erabili nahi baditugu gure barne antolaketa aldatu egin behar dela, alegia. Honek ardurak banatzea eta lanak partekatzea ekarriko du baina benetan kalitatezko zerbitzu bat eman nahi badugu aldaketa beharrezkoa dela azaldu diet.

Eta esan beharra dago lanerako prestutasuna eta azaldutako ildo nagusiekiko atxekimendua besterik ez dudala jaso, etapa guztietako irakasleen aldetik gainera. Beti pentsatu dut erakunde baten kudeaketan kalitatezko zerbitzua emateko baldintzarik garrantzitsuena langileen prestutasuna eta lan-giroa dela. Eta hori behintzat ez da falta IKTeroetan.

Eskerrik asko, neska-mutilak!!!

Estiloa zainduz

CSS

Eguberriko oporretan, ikasleekin burutu beharreko web diseinu eta irisgarritasunari buruzko lanketa prestatzen hasi nintzenean, ez nuen uste horrenbesterako emango zuenik. Hasierako asmoa oinarrizko kontzeptu batzuk jasotzea besterik ez zen arren, berehala ohartu nintzen gai oso zabal eta ahalmen handiko baten aurrean nengoela. Nire ezjakintasun ikaragarriaren aurrean, nire jakin-mina gailendu zen eta ikertzeari ekin nion.

CSSa erabiliz, web irisgarriak eraiki

Lehenengo zailtasuna aurkitutako informazio, ia guztia, ingelesez zegoela, baina nire ingeles eskasa eta Babel Fish-en laguntzaz, nola hala moldatu nintzen. Bigarrena eta, zalantzarik gabe, larriena, nire ezagutza maila kaxkarra. Baina, badakizue, ezjakintasuna gaitz ugariren iturburua izan bada ere, ausarta ere bada. Mila proba, mila ahalegin eta orduak, bata bestearen atzetik, behar izan nituen nire lehenengo lantxoa burutzeko.
Honekin, ohartu nintzen Internet Explorer zer den eta web estandarrak nola “betetzen” dituen. Eta horrek Firefox-en defendatzaile sutsuagoa bihurtu ninduen. Nire ikasle batzuek, Firefox-eko akzioak ote ditudan galdetzen didate.
Lan horren atzetik, beste batzuk iritsi ziren eta, guztien eskura jartzearren, Lehen Hezkuntzako blogean dugun Informatika atalean argitaratu nituen.Honatx horietako batzuk:

Orain, “Lightbox” izeneko efektu polita ikusgai jartzen dizuet. Efektu hori ikusteko, argazkien gainean klik egin beharko duzu eta ixteko, berriro klikatu bere gainean. Hau, bereziki, Jolausi eskaini nahi diot. Izan ere, mila ahalegin egin ondoren, amore eman nuenean, Jolausek bidalitako mezu batek zirikatu ninduen eta lanean jarri ninduen berriro. Azkenean, lortu nuen eta Internet Explorer-ekin nituen arazoak gainditzea ere lortu nuen.

Larri eta Jai (Nire txakurrak)

Kanela (Nire katua)

Aktualizazioa: Azken efektu hau nola egiten den ikusteko, azalpenak hemen

Webquestions 2.0 euskaratuta!

Aurreko artikuluan jolausek azaldutakoari jarraituz, oraingo honetan beste aplikazio bat euskaratu dugula kontatzera gatozkizue. Aplikazioa Daryl Rowlandek sortutako WEBQUESTIONS 2.0 da eta, modu errazean eta dohain, web orri formatoan gordetzen diren galdeketak sortzea ahalbidetzen du (programaziorik jakin gabe, noski!).

Azalpenekin jarraitu aurretik, nire ikasleak zoriondu nahi ditut; izan ere, DBHO 2koak izan baitira phpMyFAQ eta Webquestions 2.o aplikazioak itzultzeaz arduratu direnak! Kontua da, mota hauetako proposamenekin joaten natzaienean, beti aurkitzen dudala jarrera erabat irekia eta ezin hobea berrikuntza hauetan murgiltzeko (writely erabiliz lanean aritzeko, sareko euskararen presentziaren zabalkuntzan parte hartzeko, aplikazio informatikoak itzultzeko eta abar luze bat). Baina hori guztia beste artikulu baterako utziko dugu eta orain itzulitako aplikazioan zentratuko gara. Benetan, zorionak eta eskerrik asko nire irakasle lana errazteagatik eta klasera joateko gogoa egunero pizteagatik!
Baina gatozen harira. Jarraian, Webquestions 2.0 aplikazioak ematen dizkigun aukerak aztertzen saiatuko gara:

Aplikazioak dituen arlo indartsuenak:

4 galdera mota ezberdin konbina daitezke galdeketa batean (hautapen anitzkoitza, erantzun bakarra, egia ala gezurra eta hitz ezkutua)
Irudiak eta ikurrak sar daitezke
Pertsonalizatzeko aukera ugari eskaintzen du (atzealdean irudi bat sartu; koloreak, letra mota eta neurria aldatu…)
Prozesu osoan zehar, galderak gehitu, editatu eta ezabatzeko aukerez gain, ordura arte egindakoa aurreikusteko abagunea ere eskaintzen du
Jarduna erabat gidatua da

Ahuleziak:

Galdeketa hasi aurretik ezin da testurik txertatu. Askotan aukera hau irakasleontzat oso interesgarria izaten da. Nire kasuan, adibidez, aurrekoan Txomin Agirreren Garoaren pasarte bat irakurri ondorengo galdeketa bat sortu nahi nuen eta pasartea bertan txertatzea ondo legokeela iruditu zitzaidan. Ezinezkoa da! Halere, esteka bat sartuz konpondu nuen baina adibide honetan ikusiko duzuen legez, goialdean zerbait idatzi nahi izanez gero, espazioa erabat mugatua du.

Hain da sinplea lanketa, non ia egunero sortzen baitut jardueraren bat edo beste euskaljakintzan esekiteko. Beraz, adibide gehiago ikusi nahi badituzue, jo hara.
Hona hemen batzuk:

Programaren inguruko argibide guztiak (behera kargatzea, tutoriala…) Muñoz de la Peñaren aula21ean aurkituko dituzu. Hurrengo pausoak jarraitu behar dituzue:

1. Aipatutako gunetik aplikazioa jaitsi eta zuen ordenagailuan gorde.
2. Euskaratutako artxiboa ere zuen ordenagailuan gorde. Artxibo hau instalatzeko ondorengoa egin behar duzue:

Gorde honela:
C:\Archivos de programa\Clever Software\WebQuestions 2\Languages

3. Karpeta horretan gorde eta gero, programa abiarazi eta Options eta Hizkuntzak kargatzeko eremuan, hautatu gorde duzuen artxibo hori (Euskara). Aplikatu eta berehala dena euskaraz ikusiko duzue.

Ea, ariketak sortzera animatzen zareten. Ziur ikasleek eskertuko dutela!

phpMyFAQ aplikazioa euskaratuta

Orain dela hilabete batzuk Sei, gure IKTera saltserak, PHPWebquest aplikazioaren euskaratzearen berri eman zigun bezala, oraingo honetan phpMyFAQ aplikazioa jada euskaraz erabil dezakezuela adieraztera gatozkizue. Halere bietan jarraitu dugun prozesua oso desberdina izan da: aurrekoan eginkizun osoa Sei-ren ardura izanik, oraingo honetan gure ikastolako ikasle eta irakasleen arteko elkarlanean oinarritutako lorpena izan da.

Duela aste batzuk, aplikazioa jaitsi eta instalatu ondoren, erdarazko eta ingelesezko hizkuntz fitxategiak eredu bezala hartuz, aplikazioaren euskaratzeari ekin genion. Horretarako, batxilergoko bigarren mailako gela bateko ikasleekin harremanetan jarri ginen eta proiektu honekin hastea proposatu genien. Gure ikasleek gustora jaso zuten gure eskaera eta, Sei-k fitxategia Writelyn eskegi eta bere ikasleei beharrezkoak ziren baimenak eman ondoren, ikasle bakoitzari euskeratzeko zatia zein zen adierazi zitzaion. Ilusioz beteta hantxe hasi ziren gure ikasleak lanean. Eta ederki asko gainera!. Lan txukuna egiteaz gain eskatutako denbora epea ere erabat errespetatu zuten.

Jarraian, Sei-k artxiboa osoa jaso eta azken gainbegirada eman zion, hizkuntzaren aldetik egon zitezkeen akatsak konponduz. Bukatzeko fitxategia niri pasa eta nik webgunera igo nuen. Tarteka agertzen ziren kode akatsak zuzentzen (ikurrak falta, kode egitura okerrak…) denboratxo bat pasa nuen. Bestalde, ingelesezko eta euskarazko esaldien egitura askotan desberdinak izanik, hauek moldatzen ere denbora pixka bat pasa behar izan nuen. Kontua da oporren amaierarako artxiboa euskaratuta eta erabat operatiboa zegoela.

Une honetan itzulpena aplikazioa sortu duen programatzaileak jasota dauka eta, nahiz eta, bere webguneko atarian aplikazioa euskaratuta dagoela adierazi, laister kaleratuko duen 1.5.6 bertsioan izango duzue ofizialki. Ordurarte norbaitek erabili nahi izango balu hemendik jaitsi (kopiatu testua eta Ohar-bloka erabiliz gorde language_eu.php izenean) eta “lang” izena duen karpetan eskegi dezake.

Benetan pozik gaude egindako lanarekin. Askotan aipatu dugu elkarlana sustatzea dela gure erronketako bat eta horrelako ekimenekin hori da lortu nahi izaten duguna, ikasle nahiz irakasleen arteko elkarlanaren ondorioz emaitza interesgarriak lortu daitezkeela kontrastatu, alegia.

Lerro hauen bitartez zorionak eman nahi dizkiet gure ikasleei: ilusioz beterik egin dute lan eta emaitza hor dago, denon eskura. Eta pentsa, agian zuek zarete aplikazio bat euskaratu duzuen lehen ikasle taldea, nork daki!

Laister Sei-k adieraziko dizue zein izan den maila bereko bigarren gelako ikasleek gauzatu duten proiektua.

Aplikazioari dagokionez, phpMyFAQ webgune askotan aurki daitezkeen Frequently Asked Questions (FAQ) direlakoak sortzeko tresna interesgarri bat da. Bertan gai edo arlo baten inguruan sor daitezkeen galderak argitaratu eta hauen erantzunak ematen dira. Horixe da funtsean aplikazio honek eskaintzen duena. Baditu, halere, beste ezaugarri batzuk ikasleekin erabiltzeko oso aproposa egiten dutenak, hala nola:

Galdera irekiak egiteko aukera ematen du: ez da beharrezkoa sisteman balidatuta egotea galderak egin ahal izateko. Behin galdera egina dagoenean administrariak moderatu egingo du eta, hau onartzen bada, galdera irekia argitaratuko da edonorren erantzunaren zain geratzen delarik.
Erantzunak ere edonork eman ahal izango ditu, ikasleak nahiz irakasleak. Galderak egiteko jarraitzen den sistema bera da.
Argitaratutako galdera/erantzun bakoitzari iruzkinak egiteko aukera ematen du. Horrrela aukera dago bidalitako erantzun bat zuzendu edota osatzeko eta, bide batez, egindako galderaren inguruko beste edozein komentario ere egin ahal daiteke.
Galderak bere interesaren edo garrantziaren arabera baloratu daitezke. Galderak irakurtzen duenak 0tik 5erako balioa esleitu dezake, horrela galdera bat kontsultatzen denean, irakurleek emandako balorazio orokorraren ideia bat ere jasoko du.
Galderak hiru eratara kontsulta daitezke: eskuineko zutabean atalka antolatzen dira eta eskuineko zutabean, behekaldean azken bost galderak agertzen dira eta, goikaldean, Top 10 delakoa, bisita gehien jaso dituzten galderen zerrenda alegia.

Nire asmoa zera da: gelan sortuko diren galderak nahiz ikasle bakoitzari etxean sortzen zaizkionak bertan ipintzea. Bestalde, ikasleek eurek ahalegindu beharko dira galderei erantzuna ematen, gelan jaso dutenean oinarrituz edota bakoitzak bere kabuz lortu duen informazioan oinarrituz. Galdera batek erantzunik izango ez balu edota bere osotasunean erabat egokia izango ez balitz, erantzuna denon artean osatzen ahaleginduko gara. Ebaluagarriak izango dira bai egindako galdera kopurua (aintzat harturik bakoitzak jasotzen duen balorazioa) baita emandako erantzunak eta hauen egokitasuna ere. Zuetako norbaitek parte hartu nahiko balu gonbidatuta zaudete. Ea zerbait interesgarria lortzen dugun denon artean!!!

Web 2.0: zerbitzu gehiago

Etengabe ari dira zerbitzu berriak sortzen Web 2.0 delako horren inguruan. Horiei buruz hemen idatzi eta komentatu egin izan dugu, baina zerbitzu berriak (niretzat, behintzat) aurkitu ditugu eta interesgarrienak zuen esku jarri nahi ditugu.

Hasteko, Flickr-en argazkiak bilatzeko zerbitzu harrigarria bezain orijinala. Retrievr da bere izena eta, honen bitartez, argazkiak koloreen arabera bila daitezke. Flash-en eginiko eremu bat dauka koloreak hautatzeko eta marrak egiteko. Hautatutako koloreen araberako argazkiak azalduko dira “Retrievr search” botoia sakatzerakoan. Hau, oso baliagarria izan daiteke web baterako irudiak bilatu nahi dugunerako. Zerbitzu hau erabiltzeko ez da beharrezkoa inon alta ematea.

Beste bat youSENDit zerbitzua da. Zerbitzu honetan ere, ez da beharrezkoa alta ematea eta guztiz dohain erabil dezakegu. Honekin, e-postaz bidali nahi ditugun artxibo handiak bidal ditzakegu, beti ere 1Gb baino txikiagoak badira. Normala denez, artxiboaren “upload” egiteko patzientzia beharrezkoa da eta hori bidaltzeko agindua ematen zaionean egiten du. Beraz, badakizue, bidali eta “upload” egiten ari den bitartean, beste zereginetan aritu.

Hurrengoa oso baliagarria da agiri ofizialak bidaltzeko eta sinadura digitala eskatzeko. Urteetan, hori egiteko fax-a erabili izan da, bada EchoSign aplikazioak horixe egiten du. Sinadura behar duen agiri bat bidaltzerakoan, orri bat sortzen du hartzaileak osa dezan. Ondoren, beharrezkoak diren sinadurak bildu dituenean, PDF artxiboa sortzen du agiri orijinala eta sinadurak bat eginda. Hemen egon daitekeen arazo bakarra fitxategien bertsioan egon daiteke. Izan ere, sinatu ondoren, oso zaila baita bermatzea agiriaren bertsioa. Agian, horretarako, ongi legoke Writely bezalako sistema ezartzea zerbitzuan bertan.

Hurrengoa, AjaxTrans itzultzailea da. Honek beste aplikazioa bat gogorarazi dit: Babel Fish. Hauek berehalako itzulpena eskaintzen dute eta hizkuntza ezberdinen arteko itzulpenak eskaintzen dute. Itzulpenaren kalitatea oso handia ez bada ere, nahikoa izaten da ideia bat egiteko. Nik Babel Fish Firefox gehigarria erabiltzen dut, baina hemendik aurrera, ez badit gehiegi argitzen bere itzulpenarekin, badakit nora jo beste itzulpena lortzeko.

Azkena, e-komertzioarekin lotuta dago. Clipfire-n erabiltzaileek aurkitutako salmenta interesgarriak proposatzen dituzte eta besteek botoa eman dezakete. Honela, “ranking” moduko zerbait osatzen da. Zerbitzua oso berria denez, oraindik ez dago oso beteta, baina ideia interesgarria izan daiteke “txoiloak” aurkitzeko. Bilaketak egin daitezke, RSS jarioa dauka atal guztietan, “popular deals” izeneko atala arrakasta handiena duten eskaintzekin… Nik Seirentzat telebista hau, bere etxeko telebista zaharra kentzeko, aurkitu dut, merke-merke gainera! Sei: zure etxeko telebista zaharra kentzen baduzu, gogoratu nirekin. Nire bordan txoko bat egingo nioke eta.