Urtea: 2005

Matematikako ariketak egiteko laguntza on-line

Duela egun batzuk irakurri nuen hiru.com-en Hezkuntza Saileko Lanbide Heziketako eta Etengabeko Ikaskuntzako Sailordetzan lanean dihardutela Hiru.com atariak etorkizunean izango duen zerbitzuetako bat prestatzen: herritarrentzako (guraso zein ikasle) on-line laguntza. Bertan azaltzen dute labur-labur adierazten saiatuko naizen laguntza honen nondik norakoa.
Gauza da, hasieran matematika eta gero beste ikasgai batzuk ikasteko on-line laguntza pertsonalizatua eskainiko dietela DBH 3 eta 4ko ikasleei.

Hiru.com atari honen bitartez sartuko da erabiltzailea zerbitzu honetan. Ikasleek ikastetxean jasoko duten pasahitza izango dute eskura, eta huraxe erabiliko dute baliabide honetara sartzeko. Lehen begiratuan, ordura arte gehien kontsultatu diren gaiak eta argitutako zalantzak ikusiko ditu. Horietan ez badu erantzunik aurkitzen, txat bidez jo ahal izango du tutoreengana, zalantza pertsonalki argitzeko. Audio eta teklatuaren bidez, arbel digital konpartitua izango dute ikasleak eta tutoreak, eta horrela egingo dute aurrera.

Ez da, ez , ideia txarra ikasleek hain gustuko duten ordenagailuaren bidez beraien zalantzak argitzeko aukera izatea! Horrela, etxerako lanak egiterakoan, laguntza jasotzeaz gain, informazioa lortzeko beste iturri batera jotzeko gaitasuna garatuko dute (oso baliagarria gerta dakiekeen gaitasuna, gainera!). Beraz, ekimen hau gertutik jarraituko dugu, ea lehenbailehen martxan jarri eta beste ikasgaietara zabaltzen den!

ADSL eskaintza berriak datozen egunetan

Orain dela egun batzuk jakin genuen ofizialki Telefonicak bere ADSL konexioen abiadurak bikoiztuko dituela datozen egunetan, igotze-tasa maximoa 8 mbps-koa izatera helduko delarik. Bikoizketa hau era progresiboan egingo omen da uztailaren 26tik aurrera, Euskal Herrian iraila inguruan izango ditugularik opertibo linea berriak. Aurreko bikoizketan ez bezala, oraingoan jaitsiera tasa bikoizteaz gain igotzekoak ere handituko dira baina bikoitzak izatera iritsi gabe. Kalitatezko bideokonferentziak gauzatu ahl izateko nahikoa izango ote da?. Ikusiko dugu.

Bestalde, atzo jakin genuen estatuko beste operadore batek, Jazztel-ek hain zuzen ere, igotze tasa maximoa 20 mbps-taraino igoko duela datorren urrian. Honekin batera ADSL bitarteko telebista digitaleko zerbitzua urte bukaerarako eskaintzeko asmoa ere azaldu dute. Zerbitzu honekin Telefonikako Imagenio zerbitzuari konpetentzia zuzena egiteko asmoa du.

Ordizia: Harley Festa guztiontzat

Guretzat, Ordizian gertatzen diren albisteen berri ematea oso ohikoa ez bada ere, honen berri ematea erabaki dugu bitxia eta deigarria iruditu zaigulako.

Larunbat honetan, hilaren 11n, arratsaldeko 3:00etatik gaueko 3:00etara, “The Cherris” moto-klubak antolatuta, Harley Davidson moto mitikoaren zaleentzat kontzentrazioa ospatuko da Ordizian.

Kontzentrazio hauen ohiko iraupena asteburu osokoa bada ere, ordiziar hauek aitortzen duten eskarmentu falta dela eta, 12 ordu horietara mugatzea erabaki dute. Honela, aurten gauzak nola antolatu ikasi eta hurrengo edizioetan asteburuko festa prestatu nahi dute.

Nolanahi ere, laburra izan arren, ekintzaz beterik datorkigu jai hau eta zerbait aipatzeagatik honako hauek azpimarratuko genituzke:

* Goierriko txokoak ezagutzeko moto ibilaldia
* Paella jana Beti-Alai Pilotalekuan
* Los Faraones eta Holt-en kontzertua
* Ikuskizun erotikoa
* Salvatore Showmana
* Jokoak, erakustaldiak, salmentak…

Beraz, badakizue, astebururako planik ez baduzue, Ordiziara hurbildu eta giro desberdinaz gozatzeko parada izango duzue.

Aplikazio Libreak enpresentzat

Urtetan, era guztietako erakundeak Softwarearen Patenteen gatibu bizi izan dira. Zorionez, mendekotasun horrekin hausteko zabaltzen zaizkigun aukerak geroz eta anitzagoak eta fidagarriagoak dira.

Software librea inplementatuz gero, lizentzietan diru dezente aurreztu daiteke eta beste zereginetan inbertitu. Horixe izan zen lau gazte espainiarrek pentsatu zutena Aplicaciones Empresariales izeneko web bat zabaltzea pentsatu zutenean. Proiektu berri horretan enpresentzat baliagarriak izan daitezkeen era guztietako aplikazio informatikoen berri ematen dute. Gainera, adierazten dutenez, euren helburu nagusia erabiltzaileen ekarpen eta iradokizunaz informazioa osatzea litzateke.
Albiste hau La Pastilla Rojan irakurri dut.

WordPress blogak egiteko tresna euskaratua

Sustatun irakurri berri dut WordPress blogak egiteko softwarearen euskarazko lokalizazioa prest dagoela eta horren berri eman nahi izan dut lehenbailehen. Magic eta Jolausi entzunda, banekien hemendik gutxira prest egongo zela, baina ez nuen uste hain azkar erabiltzeko moduan egongo zenik eta, hurrengo ikasturtera begira blog bat martxan jartzen ari naizenez, asteburu osoa pasa dut, beste gauza batzuen artean, blog horren atalak itzultzen!! Nahiz eta hemendik aurrera blogak egiteko tresna euskaraz egon, espero dut pasatako ordu guztiak zerbaitetarako balio izango zutela, besterik ez bada blogaren erraiak hobeto ezagutzeko…
Bestalde, aipatutako artikuluan esaten da balitekeela produktu euskaldun hau UEUko Iruñeako ikastaroetan Patxi Gaztelumendik blogintzari buruz eman behar duen zikloan aurkeztea (nahiz eta oraingoz blog horiek ingeleseko interfazearekin eginak dauden), eta hori bai ondo legokeela; izan ere, nik atzo bertan eman bainuen izena UEUk antolatutako ikastaro horretan.
Beraz, berri onak ditugu euskara eta teknologia batzen saiatzen ari garenok!! Informazio gehiago nahi izanez gero (nork egin duen, erabili den itzultzailea, non lor daitekeen…), bertara jotzea besterik ez duzue. Nik, nire aldetik, ikastarotik ateratzen ditudan aprendizaiak zuekin partekatuko ditudala zin dagizuet. Hori bai, pixka bat itxaron beharko duzue berau uztailaren amaieran delako… Non scholae sed vitae discimus.