Kategoria: Interneten aurkitutakoak

Fisika-Kimika irakasten dutenek euren ohiko eskema aldatzen joan beharko dute. Gela batera joan eta materia azaltzerakoan ezin izango dute gure irakasleek guri esaten zigutena esan: “materia hiru egoeratan aurki daiteke:solidoa, likidoa eta gasa”. Nik dakidala, behintzat, orain arte bost ziren materiaren egoerak: arestian aipaturikoak gehi plasma eta Bose-Einstein kondentsatua.

Bada, horiei beste bat gehitu beharko diegu gure saio lektiboetan azaltzeko. Barrapunto blogean irakurri dudanez, MIT-eko fisikari talde batek materiaren egoera berri bat sortu du. Fermioiez osaturiko gas bat omen da zeinek tenperatura oso altuetan superfluido edo fluido perfektu baten izaera hartzen duen.

Diotenez, superfluido berri honen ikerketak tenperatura altuetan supereroankortasunaren inguruko zalantzak argitzeko balioko du.

Batek daki gure bilobak ikastolara iristen direnerako materiaren zenbat egoerekin topatuko diren.

Cibercristalen aurkitua:

“Dímelo y lo olvidaré;
enséñame y recordaré;
implícame y aprenderé;
apártate y actuaré”. (Proverbio chino)

IKTeroon lan filosofia ezin da era egokiagoan eta laburragoan adierazi.

ADELEizeneko irakasle elektroniko honek ikasleengandik ikasten du.

Graz-eko (Austria) Joanneum UnibertsitateTeknikoan garatzen ari den sistema honek erabiltzailearen begirada jarraitzen du bere beharrak identifikatzeko eta hezkuntza edukiak egokitzeko.

Proiektu honen zuzendaria den Maja Pivec-ek adierazi duenez, begiradan ez dira datu objektiboak islatzen soilik, prozesu kognitiboaren beste datu batzuk ere islatzen omen dira eta hauetan oinarritzen da proiektu hau, hain zuzen ere. Eye Tracking izeneko teknologia erabili dute. Honen bitartez, begiradaren mugimenduak kamera batez erregistratu eta grafiko batean jasotzen dira. Honela, giza kontzientziatik alde egiten duten hainbat prozesu aztertzea lortzen dute.

Baina, proiektu honek beste urrats bat ematen du informazioa ikaslearen nahi eta lehentasunetara egokitzerakoan. Hori lortzeko hiru elementu erabiltzen ditu: erabiltzailearen begirada jarraitzen duen kamera, software bat datu horiek interpretatzeko eta profila sortzeko eta eduki multzo bat erabiltzailearen beharren arabera erabiltzeko.

Sistemak lortzen duen informazioari esker jakingo du erabiltzaileak nolako informazioa nahi duen eta horren arabera irudi edo testu bidez eskainiko du bere informazioa. Gainera, paragrafo bat hiru aldiz irakurriz gero, sistemak informazio gehigarria eskainiko dio horren inguruan. Paragrafo edo zati batzuk irakurri gabe utziz gero, sistemak berriro erakusten du informazio hori.

Proiektu honen arduradunek diotenez, ADELE oso interesgarria izan daiteke hardwarearen ekoizleentzat, hezkuntza eta ezagutzaren gestioko plataforma digitalentzat, edukien sortzaileentzat…

Beraz, badakizue, aurki pantailaren aurrean jartzerakoan ezin izango ditugu gure nahiak ezkutatu. Ez dut pentsatu ere egin nahi ikasle askoren nahia zein den kontuan harturik, ager daitekeena.

Orain dela egun batzuk jakin genuen ofizialki Telefonicak bere ADSL konexioen abiadurak bikoiztuko dituela datozen egunetan, igotze-tasa maximoa 8 mbps-koa izatera helduko delarik. Bikoizketa hau era progresiboan egingo omen da uztailaren 26tik aurrera, Euskal Herrian iraila inguruan izango ditugularik opertibo linea berriak. Aurreko bikoizketan ez bezala, oraingoan jaitsiera tasa bikoizteaz gain igotzekoak ere handituko dira baina bikoitzak izatera iritsi gabe. Kalitatezko bideokonferentziak gauzatu ahl izateko nahikoa izango ote da?. Ikusiko dugu.

Bestalde, atzo jakin genuen estatuko beste operadore batek, Jazztel-ek hain zuzen ere, igotze tasa maximoa 20 mbps-taraino igoko duela datorren urrian. Honekin batera ADSL bitarteko telebista digitaleko zerbitzua urte bukaerarako eskaintzeko asmoa ere azaldu dute. Zerbitzu honekin Telefonikako Imagenio zerbitzuari konpetentzia zuzena egiteko asmoa du.

Interneten web orrialde berri bat aurkitu dugu, Khef izena du eta oso ideia interesgarria iruditu zaigu. Bertan brainstorming delakoa burutzeko esparrua aurkituko dugu.

IKTeroak egiten dugunon artean badira batzuk ideiak bor-bor dituztenak eta etengabe proposamenak luzatzen dabiltzanak. Horientzat oso aproposa izan daiteke.

Web aplikazio honen bitartez ideiak luza daitezke besteek ekarpenak egin ditzaten, ideia berriak sortzeko, besteen ideiak osatzeko, ideien arteko interakzioak sustatzeko… Aplikazioa erabili ahal izateko alta eman beharra dago. Guk egin dugu eta ohartu gara ia hutsik dagoela, beraz, has gaitezen lehenbailehen gure ideiak luzatzen.