Kategoria: IKTak eta irakaskuntza

Barrapunton irakurri dut Juan Medina Molinak Matematikako irakasleak matematikako 200 bideo baino gehiago jarri dituela guztion esku.

Egia esan, hasieran ez nuen oso ongi ulertzen ez baita oso ohikoa matematikako edukien bideoak ikustea. Baina, bere azalpenak irakurrita erraz uler daiteke bideo hauen izaera zein den. Cartagenako irakasle honek egin duena oso orijinala izan da. Izan ere, arbelan arituko bailitzan ematen ditu azalpenak. Ez dakit ziur nola arraio egin duen hori, baina nik uste dut Tablet PC bat erabili duela kaptura burutzeko.

Kontua da, oso material interesgarria jarri duela guztion eskura. Edukietan erreparatuz gero, ohartuko zarete mailakatuta jarri duela materiala. Gehiena, DBH, DBHO 1 eta DBHO 2ko ikasleei zuzenduta dagoen arren, Unibertsitateko ikasleentzat ere topa daiteke zer edo zer. Baita hautaproba prestatzeko buruketak ere. Gainera, hainbat bideo azpi-tituluekin datoz entzumen arazoak dituztenentzat.

Irakaslearen azalpenak zuzenean grabatuta daudela kontuan harturik, ez da harritzekoa, hainbatetan, aurkezpenaren kalitatea baxua izatea. Baina berak dioen bezala, funtionalitatea da bilatu nahi izan duena.

Me gustaría aclararte que los vídeos están grabados de forma natural, o sea, como si estuviera explicando en la pizarra. Por ello, éstos pueden no tener una presentación exquisita (algunos pueden ser hasta impresentables…), pero esto no me preocupa, ya que busco más la utilidad. Algunos incluso están grabados en directo en mis clases.

Nik ez dakit “Barrapunto efektuarengatik” den, baina orria kargatzen nahiko arazoak izan ditut, ez, ordea, bideoak deskargatzen. Behin sartu eta gero, bideoak nahiko ongi jaitsi ditut.

Bukatzeko, gauza bat adierazi nahiko nuke: imajinatuko duzuen bezala, bideo guztiak gazteleraz daude. Ez dut uste Euskal Herriko irakasleok horrelako gauzak egiteko gaitasunik ez dugunik, agian batzuek jada egina dute, baina guztion eskura horrelako materiala jartzeak nori egingo lioke kalte? Ez al gara ohartzen gisa honetako edo beste motako lanak sarean jartzerakoan, guztiok irabazten dugula? Noiz ohartuko gara partekatzeak dituen abantailaz?

Gaur goizean, gure ikastolako DBH 1eko ikasleek Berde-Berdea izeneko proiektuaren aurkezpena izan dute. Proeiktu hau Gipuzkoako Kutxak bultzatzen du eta eurek dioten bezala, hauxe da proiektuaren helburua:

Gazteen heziketa eta parte hartzea sustatzea ingurumenaren alde.

Ideia ez da beste munduko gauza bat, zalantzarik gabe, baina baditu ñabardura batzuek beste proiektuengandik bereizten dutena

• Webgune bat garatu dute proiektua lantzeko (hau ohitura bihurtzen ari da proiektu berrietan)
• Ohiko materialak (karpetak, liburuxkak…) ez ezik, CD multimedia bat ere banatu dute
• Azkena eta niretzat bereziena, ikasleek eginiko lanaren arabera eta asmatutako galdera kopuruaren arabera, Kutxak diru bat banatuko du ingurumenaren inguruan lanean diharduten Gobernuz Kanpoko erakunde ezberdinen artean

Benetan, ideia oso interesgarria iruditu zait gure ikasleak kontzientziatzeko eta, aldi berean, erakunde horiek egiten duten lana babesteko eta bultzatzeko. Aurtengo erakundeak honako hauek dira:

1. Aranzadi
2. ArranoEtxe
3. EIBE
4. Kalapie
5. The Green Belt Movement

Oker ez banago, gure ikasleek, Afrikan lanean ari den azkeneko horrentzat bideratu nahi dute lortzen duten guztia, baina behin betiko erabakia hartzeke dago oraindik.

Gipuzkoako ikastetxeentzat den proiektu honetan parte hartuko dutenen zerrenda webgunean bertan topa dezakezue eta gure ikastolako bi taldeak hauek dira: DBH 1A eta DBH 1B

Ea lan asko egiten duten eta erakunde hauentzat laguntza handi bat lortzen duten, horixe baita proiektu honen helbururik politena.

Joan den ostegunean, Iparraldea Andoainen jardunaldien barruan, Andoaingo Bastero Kulturunean biltzeko aukera izan genuen gutako batzuk, hau da, euskal blogosferako “militante” batzuk (Joxe Aranzabal, Jakes Larre, Iban Arantzabal eta ni neu) interneti buruzko mahainguru batean. Hasteko, Andoaingo Udalari eskerrak eman nahi dizkiot eta, batez ere, Nekane Goikoetxeari egin ziguten harreragatik.

Internet iraultza izan genuen hizpide eta helburua azkenaldi honetan hain aipatua den web 2.0 kontzeptua herritarrei ezagutzera ematea zen, bakoitzak gure ikuspuntutik (kazetaritza, Euskal Kulturaren Erakundea edo irakaskuntzatik, hain zuzen ere). Joxeren jarduna, alde horretatik, ezberdina izan zen; terminoaren jatorria, garapena eta kontzeptu horren atzean ezkutatzen diren hainbat aplikazio garbi asko eta modu praktikoan erakutsi baitzituen. Besteok gure arloetan ekarri dizkigun onurak eta potentzialitatea adierazteko aukera izan genuen, sare sozial, informazio partekatze eta elkarreragitearen garrantzia aldarrikatuz.

Azken hau da nik azpimarratuko nukeen ideia. Handik eta hemendik ibilian, nik uste dut gero eta gehiago garela web 2.0 terminoaren garrantzi ezaz jabetzen garenok; izan ere, ez baita zenbaki kontua, jarrera kontua baizik. Web 2.0, 3.0…Zenbaki batzuk joan eta beste batzuk etorriko dira, baina benetan garrantzitsuena denon eskura dohain dauzkagun baliabideei etekina ateratzen saiatzea izan beharko litzateke, denon artean lanean aritu, konpartitzen ikasi. Errezeloak alde batera utzi eta besteei eskain diezaiekeguna eskaini, ez bakarrik gure lana baita gure errekonozimendua ere. Jolausek esaten duen moduan, guk ematen dugun gauza, ideia, material edo dena delako bakoitzaren truke, besteengandik mila bider jasotzen baitugu… Eta nik Andoainen ikusi nuen gogo hori.

Nabarmentzekoa, zalantzarik gabe, gertutatu ziren hainbat blogarirekin (Luistxo, Gorka Julio, Iturri, Mikel Irizar, Imamon, Joxe, Iban…) izandako hartu-emana. Aplikazio berriak, Google hartzen ari den nagusitasuna, tramankulu berritzaileak, beste blogari batzuen ekarpenak… Ez dakit zerbait utzi genuen aipatu gabe! Hitz batzuetan laburtzeko, oso emakorra izan zen gaua (Luistxorekin hitz egiten ari nintzela, adibidez, blokeatuta nengoen lantxo baterako ideia bat izan nuen; hobeto esanda, eman zidan… )

Nekanek, Andoaingo Udaleko euskara teknikariak, egin duenez osteguneko kronika Sustatun ez noa ni gehiago luzatzea . Joxe Aranzabalek, Faroan, bere aurkezpena utzi digu eta nik ere, honi jarraituz, hementxe uzten dizuet prestatuta eraman nuena. Dena den, nire aurretik esandakoa ez errepikatzearren, aldatu egin nuen zertxobait eta alde teorikoa pixka bat baztertuz, ikastolako ibilbidea modu praktikoan erakusten saiatu nintzen. Noizko hurrengoa? Sustaturen urteurrena ospatzen?