Kategoria: Aplikazio berriak

Azkenaldi honetan, powerpoint motako aurkezpenak online egiteko baliabide ahaltsu baten bila nabil. Ikasturtean zehar, nire gaian (euskaran) pisu handia izan dute mota hauetako aurkezpenek (XX. mendeko literatura, euskalkiak…lantzeko) baina hainbat akats ikusten dizkiot usu eta maiz erabiltzen dugun Microsoft-eko aukera honi. Okerrenena, dena den, taldean lan egiterakoan da. Gelan landutakoa bukatu nahi izanez gero, beti edo taldekide bakar batek eraman behar izaten du etxera han amaitzeko edo beste nonbaiten elkartu behar izaten dute ikasleek, honek dakartzan zailtasun eta oztopo guztiekin (batek partikularrak, besteak entrenamendua…) Horretaz gain, badu beste eragozpen garrantsitsu bat: eskuragarritasuna. Euren buruei korreoz bidali ohi izan dizkiete askotan lanak klaseak amaitutakoan (denbora galtze nabarmena) edo pendrive bat erosi (ikastolako ordenagailuek ez dute jada disketerarik). Egia da, bestalde, oraindik ez dudala aurkitu sarean tresna honek hainbateko aukera ematen duenik (txantiloiak, transizioak, soinuak, irudiak, estekak…)

Bada, esan bezala, hurrengo urtera begira, mota honetako lanketa aurrera eramateko online aurkezpen-sortzaile on baten bila nabil. Duela hilabete batzuk,Thumbstacks aurkitu nuen baina alfa fasean egoteaz gain, ez zuen aukera gehiegirik eskaintzen. Ez nuen tresna egokitzat jo eta, gaur arte, ez naiz berriz hara sartu. Banuen hilabete hauetan hobetuko zutelako esperantza txiki bat baina sartu bezain laster, oraindik alfa fasean jarraitzen duela iragartzen dute. Beraz, oraindik honekin ezer ez.

Aurrekoan, ñblogen beste bat topatu nuen: Zoho Show. Probatu eta nahiko ondo dagoela konturatu nintzen. Ohiko web 2.0 aplikazioen ezaugarriez gain (edonondik eskuratzeko aukera aplikazioa jaitsi eta instalatu gabe), baditu interesgarriak oso diren beste hainbat:

• Firefox 1.0 edo IE 6.0 edo Mozilla nabigatzaileentzat
• WYSIWYG editorea
• Flickr-ekin uztartua (oso interesgarria)
• Aurkezpenak inportatzeko aukera: MS PowerPoint(ppt) edo OpenOffice(sxi) artxiboak. (1MB. gehienera)
• Korreoz gonbidapenak luzatu: ikasleak, lankideak, taldekideak, bezeroak…

Aurkezpen sinpleak egiteko, beraz, tresna egokia da. Halere, oraindik gehitu beharko dizkiote hainbat ezaugarri aurkezpen landuagoak egin ahal izateko (ez dut inondik topatu estekak sartzeko aukera, adibidez). Bestalde, nahiz eta horretarako prestatuta ez egon, elkarlanerako tresna bihur dezakegula iruditzen zait. Taldekide bakar batek alta eman dezake zerbitzuan (talde horretarako pentsatutako izen eta pasahitz batez) eta gero bakoitzak bere etxetik ireki gunea eta proiektuan lan egin.

Nik, uda honetan, antzeko tresnen bila jarraituko dut ea hurrengo ikasturtea heldu aurretik zerbait interesgarria lortzen dudan. Norbaitek beste baten berri badu, ongi etorria izango da. Bitartean, prestatu dudan adibidea ikusi nahi baduzue, hementxe klikatu.

Aurreko batean, izugarri gustuko dudan Google Calendar-i buruz idatzi nuen. Harrezkero, IKTerook ohiko tresna bihurtu dugu gure jardunean. Urrutira jo gabe, duela aste pare bat magicen gonbidapena jaso nuen Google bidez, larunbatean ospatu genuen ikastolaren egunerako. Mezuan, gonbidapen itxurako laukitxo batean, ekitaldiaren gorabehera guztiak azaltzen ziren: non, noiz, zer, tokiaren mapa eta esteka bat ekintzaren orri nagusia bistaratzeko. Behin hara joanda, luzatutako gonbidapenari baiezkoa/ezezkoa emateko aukera izateaz gain, iruzkinak gehitu eta gonbidapena jende gehiagori zabaltzeko parada ere izan nuen. Gustatu zitzaidan, bai, eta berehala sartu nintzen nire Google Calendar-ean. Gonbidapenak bidaltzea benetan erraza dela jabetu nintzen (zeregin berri bat sartzen duzunean, eskuinean add guests aukera erabili, besterik gabe!). Nik baiezkoa esan nuenez, larunbata aurretik mezu pare bat jaso nituen hara joateko hitz eman nuela gogoraraziz. Pentsatu nuen honi buruz idaztea baina atzera bota nintzen erabiltzaileek ezagutuko zutela pentsatuz. Dena den, Google Calendar-ekin lotutako beste zerbitzu baten berri izan dudanean, biak batera azaltzea otu zait.

Bigarren hau gure blogean egutegi hauetako bat ipintzea da. Zertarako? Bada, adibidez, taldean egin beharreko zerbaiten egutegia zuzenean jarraitzeko (lana, kirola…). Ez dakit, bururatzen zaizuen guztia…

Hona hemen zure blogean Google-eko egutegi publiko bat txertatzeko eman beharreko urratsak:

1. Hautatu zure Google Calendar-eko egutegi zehatz bat (badakizue egutegi bat baino gehiago kudeatzeko aukera ematen duela) eta eskuinean duen hiruki txikian klikatu (5 aukerako menu bat zabalduko da).
2. Share this calendar jartzen duen aukeran klikatu (gure blogean egutegia ipini nahi badugu, lehendabizi egutegia publiko bihurtu behar dugu). Markatu bigarren aukera: Share all information on this calendar with everyone
3. Leihatila horretan bertan hautatu Calendar Details (goiko aldean, ezkerrean) eta, ondoren, Calendar Address-eko HTML sakatu(laukitxo urdina).
4. Bi aukera:
   Alde batetik, esteka bat ematen digu (gure egutegiaren URLa, edonon txertatzeko)
   Bestetik, Configuration tool bidea jarraituz, gure egutegiaren HTML kodea sortzen du gure webgune edo blogean ipintzeko. Eta horixe da guztia!

Amaitzeko, honi guztiari botoia gehitzea aholkatuko nizuke. Bera klikatuz, edonori zure egutegi publiko hori berean txertatzeko aukera ematen baitiozu. Botoi honen kodea lortzeko, besterik gabe, bigarren urratsean azaldu dugun share this calendar delakora joan. Hantxe topatuko duzue kodea.

Baina onena azaldutako guztia ikustea izango da; horretarako, klikatu hementxe.

Informazio gehiago:

Google Calendar en nuestro blog/web: Genbeta.

Google Calendar en tu blog: ñblog

Interesgarria Safari erabiltzen duzuenontzat:

Google Calendar ya soporta Safari: Bitelia.

Dagoeneko zuetako askok jakingo duzuen bezala, Googlek abian ipini du Spreadsheets izeneko zerbitzu berria. Microsoften Excelek, aintzat hartu beharreko arerioa izango du aplikazio honetan, zalantzarik gabe, horixe baita, azken finean, Google Spreadsheets; online erabil daitekeen kalkulu orri bat. Writelyren aurpegi berriaren zain gauden bitartean hemen daukagu dohaineko beste aplikazio interesgarri bat probatzeko. Gonbidapena eskatzeko hona joan.

Iturria: Mangas Verdes

Duela pare bat egun edo Mozilla Foundationekoek kalera atera dutela Bon Echo, Firefox nabigatzailearen Alpha 2 bertsio berria. Ofizialak ez diren bertsio guztiekin gertatzen den bezala, oraindik akats batzuk aurkezten dituen arren, benetan interesgarriak dira bertsio berri honek aurkezten dituen hainbat aukera berri. Horien artean nagusienak, nire ustez, ondorengoak dira:

• Bilatzaile gune berria, leihoaren neurriaren arabera automatikoki egokitzen dena. Bilaketaren hitz klabeak idazten ditugun heinean Firefoxek hizki horiekin hasten diren hitz zerrenda bat aurkezten digu, irudian ikus daitekeen.

  

  Beti bezala, ohikoak diren guneetan bilaketak egiteaz gain, beste gune batzuk gehitzeko aukera ematen digu

• Zuzentzaile ortografiko bat integratuta dakar. Aurreko bertsioetan Spellbound bezalako pluginak erabili behar ziren edozein web orritan idatzitakoa zuzendu nahi bagenuen. Orain Firefoxek berak dakar zerbitzu hori. Lehen instalazioan ingelesezko hiztegia gehitzen du soilik baina helbide honetara joz beste 40 hizkuntza desberdinetan dauden zuzentzaileak jaitsi daitezke. Zuzentzaile hauek Thunderbird-ek erabiltzen dituenak izan arren, etorkizunean Firefoxek berak egingo du zuzentzaileen kudeaketa propioa. Euskarazkoaren bila joan nahiz eta hara zer ezustekoa!. Galegoa eta Katalana zerrendan agertzen dira baina euskarazkoa falta dela konturatu naiz. Hemen ere atzean geratzen ari ote gara?. Probak egin nahiean, erdarazkoa jaitsi dut eta esan beharra dago oso ondo dabilela.
• Hobekuntza guztien artean garrantzitsuena jarioen tratamendu berria dela iruditzen zait. Bertsio berri honekin, helbide barraren eskuin aldean agertzen den jarioen ikono laranjan klik egiten duzunean ,

  

  orriaren jario artxiboa ikusteko aukera ematen dizu ohi den bezala, baina oraingoan JARIOA FORMATUDUNA da (ikus beheko irudia), hau da, ez duzu ikusiko lehen agertzen zen kode zerrenda luze eta “itsusi” hori. Gainera, orri honen goialdean, jarioa zure agregatzailera zuzenean gehitzeko aukera ematen dizu.

  

  Horretarako, lehenik Tools/Options/General hautatu eta azpian dagoen “Choose Feed Reader” botoian klik egin. Agregatzailea zure ekipoan instalatuta baduzu (nire kasuan bezala, NewsGatorekin) exekutagarriaren helbidea idatzi beharko duzu; agregatzailea, berriz, web aplikazioa bada, zerrenda batetik hautatu beharko duzu. Oso praktikoa.

Alpha 2 bertsioa probatu nahi baduzu zoaz hona eta deskargatu Bon Echo izenez ezagutzen den bertsio hau. Hori bai, kontuz ibili!. Lehenik eta behin esan beharra dago, bertsio ez-ofiziala izanik, akatsak dituela oraindik; eta bigarrenik, erabiltzen ari zaren plugin gehienek ez dira erabilgarriak izango bertsio berri honetan. Nire kasuan Performancing da bakarra, Firefox 2ra eguneratu dena.

Beraz, euskarazko zuzentzailea noiz kaleratuko den zain gauden bitartean, Firefox berri hau probatzen jarraituko dugu

Informazio gehiago hemen

Atzotik eskuragarri dago Skypen 2.5 bertsio berria. Oraindik beta fasean dagoen bertsio berri honek hainbat berrikuntza interesgarri dakartza: Outlookeko kontaktuei Skypen bitartez zuzenean deitzeko aukera, lagunei SMS mezuak bidaltzeko aukera… eta beste batzuk. Baina denen artean interesgarriena Skypecasts zerbitzua iruditu zait. Zerbitzu honen bitartez zure gustukoak diren gaien inguruko elkarrizketetan parte har dezakezu. Txat gelen pareko zerbitzua eskintzen du Skypecasts-ek baina elkarrizketa idatziz burutu beharrean, hitzez ematen da, zuzenean, aldi berean 100 solaskide arteko taldeak osa daitezkeelarik. Elkarrizketa hauetako bakoitzak, gunea sortu duen arduraduna izango du moderatzaile bezala; berak banatuko du mikrofonoa solaskideen artean, beharrezkoa denean hitza kendu edota elkarrizketatik botatzeko aukera ere izango duelarik.

Skypecast bat sortzea oso erraza da: hizpidea zein izango den hautatu, ondoren izenburua ipini, bere deskribapena garbi adierazi eta gaia azaltzen duten etiketa egokiak hautatu. Ondoren, saioan parte hartu nahi dutenak jakinen gainean egon daitezen, zein ordutan konektatuko zaren adierazi beharko duzu. Behin saioa hasi ondoren zeu izango zara moderatzailea eta zeuk erabakiko duzu zein izango den elkarrizketa mota, eztabaida irekia edota norabide bakarreko elkarrizketa, zuk galdetzen duzu eta besteek erantzuten dute, alegia. Zure ardura izango da hitza nori ematea eta, beharrezkkoa izango balitz, hitza nori kendu ere; nahiz eta solaskideei hitza kendu hauek beti izango dute aukera mikronofoa eskatzeko aukera,horrela zure baimenaren zain geldituko dira.

Oraindik ez dut aplikazioa probatu baina irakaskuntzan erabiltzeko oso interesgarria izan daitekeela iruditzen zait. Aurtengo ikasturtearen hbasieran, nire ikasleekin multikonferentzia bat aurrera eraman nahi izan nuen baina elkarrizketan hiru erabiltzaile baino gehiago konektatzen ginenean, seinalearen kalitatea izugarri jaisten zen, elkarrizketa bat baldintza honetan gauzatzea ezinezkoa zelarik. Sistema honekin, berriz, badirudi solaskide multzoa handia izanda ere kalitatea bermatzen dela. Gai jakinen inguruan gure ikasleekin solasean, eztabaidan edota ikuspuntu desberdinak azaltzeko interesgarria izan daitekeela iruditzen zait. Ariketa baten aurrean adibidez, zalantzak eta kezkak argitzeko balio dezake, ikasleek galderak euren artean argitu ditzaten, beti ere irakaslearen moderazio lana dela medio. Ea aurtengo ikasturtea amaitu baino lehen probatzeko aukera dudan.

Skype bezalako tresna batek irakaskuntzan izan dezakeen garrantziaren adibidea da, baita ere, Moodle plataformarako garatu den Skype Presence Block delakoa. Gehigarri honen bitartez Moodleek ikastaro batean parte hartzen duten irakasle eta ikasleen egoera zein den erakusten du (konektatuta, offline, kanpoan, lanpetuta…). Gehigarri hau erabiltzeko erabiltzaile bakoitzaren profilean bere Skype IDa txertatzea besterik ez da behar