Kategoria: Aplikazio berriak

Aplikazioak zure patrikan

Gure bizimodu azeleratu honetan, askotan, gure ordenagailuak ez diren beste terminaletan lanean aritzea tokatzen zaigu. Hori, niretzat, behin baino gehiagotan arazo bat bihurtzen zen, ez bainuen aurkitzen nik normalean erabiltzen nituen aplikazioak. Hori ikusita, nire Pendriven dokumentuak eta fitxategiak eramateaz gain, aplikazioak eramaten hasi nintzen. Egia esan behar badut, hasi nintzenetik gaurdaino, egundoko aldaketa eman dute aplikazio hauek guztiek eta geroz eta hobeto funtzionatzen dute.

Horregatik, mezu honekin, arazo horrekin bazabiltzate, baliagarria egingo zaizuen aplikazio eramangarri hauen bilduma txiki bat erakutsi nahi dizuet.

Hasteko, nire 1Gb-eko USBan daramadan aplikazioa: PortableApps Suite.

Bi bertsio daude, Estandarra (89,5 MB) eta Lite (30,4 MB). Nik Estandarra instalatuta daukat eta primeran funtzionatzen du. Gainera, aplikazio gehiago gehitzeko aukera ematen du. Aplikazio honetan, honako programak topatuko ditugu:

Hala ere, nik beste hauek ere instalatu ditut:

Esan bezala, nik 1Gb-eko pendrive batean instalatuta daukat, baina 512 MB-eko bat nahikoa da ongi funtzionatzeko.

Erabiltzen dudan beste USBan ez ditut gisa honetako aplikazioak instalatu, CMSak baizik. Bai, entzuten duzuen bezala, edukiak kudeatzeko sistema ezberdinak instalatuta dauzkat. Horretarako, WOS Portable erabiltzen dut. Bertan, Zerbitzariarentzat softwarea eta Aplikazioen softwarea hauta dezakegu. Honako hau, bertan dagoen aukera zabala:

Zerbitzariarentzat softwarea

Aplikazioen softwarea

IKus dezakezuenez, ikaragarria eskaintzen diguten aukera. Gainera, garai batean prozesu korapilatsua zena instalazio prozesu samurra bihurtu da eta klik bat egitea besterik ez dago zure pendriven CMS horiek guztiak instalatuta izateko.

Zerrenda amaiezina egin daiteke, baina nik, aspergarria ez izateko, beste bakar batzuk besterik ez dizuet emango:

Bukatzeko, eta baten batek, orain arte azaldutakoarekin nahikoa izango ez balu, hona hemen aplikazio eramangarrien bilduma batzuk:

Firefox 3.0 gertu da

Zuetako askok jada jakingo duzuen bezala, apirileko azken egunetan kaleratu zen Firefox 3.0 nabigatzailearen alpha 4 bertsioa. Iragarri dutenez, Gran Paradiso izenez ezagutzen den nabigatzailearen beta bertsio berria datorren uztailean izango dugu jada erabilgarri. Aurreko beta bertsioekin izan dudan esperientzia positiboaren ondoren (apenas eduki ditut arazoak) irrikitan nago uztailaren 31a heltzeko bertsio berri hau probatzeko

Dagoeneko asko hitz egin da bertsio berri honek ekarriko dituen berrikuntzen inguruan (nagusiena Gecko motorearen 1.9 bertsioaren garapena). Baina ezer gutxi jakin izan dugu bere GUIari buruz, alegia, erabiltzaile interfazeari buruz. Mozillako User Experience Design-eko arduraduna den Alex Faaborg-ek emandako pista batzuk ezagutu ditut gaur eta, egia esan, oso itxura ona duela esan beharra dago.

Esandakoa, irrikitan nagoela Gran Paradisok dituen berrikuntzak probatzeko!

Iturria: ZonaFirefox

Pelikulak online

Pelikulak, serieak, marrazki bizidunak… atsegin dituzu? Bada, deskargatu gabe eta ordenagailuan inongo programarik instalatu gabe, horrelakoak ikusteko aukera izan dezakezu. Horretarako, Peliculas Online gunera joan eta dagoen eskaintzatik hautatu ikusi nahi duzun filma edo seria ta listo. Divx Web Player beharrezkoa da da ikusi ahal izateko, besterik ez. Firefox erabiliz gero, agertuko den irudian klikatu eta, gainontzeko pluginekin egiten duen moduan, berehala instalatuta izango duzu. Explorer erabiliz gero, goialdean kolore horiko barratxo bat azalduko da, klikatu eta ActiveX kontrola instalatuko dizu.

Ikus dezakezuenez, ezer berezirik egin gabe, zinea eskura izan dezakegu. Oraindik dagoen eskaintza ez da oso zabala, baina emeki-emeki ari dira gehiago sartzen. Pelikulak streaming bidez bistaratzen dira eta hiru aukera ezberdin dago: web orrian bertan bistaratu, beste leihatila batean edo pantaila osoan.

Zalantzaren bat izanez gero, laguntza orrian kontsulta dezakezu.

Interfaze osoa gazteleraz dago eta frogatu ditudan filmak ere gaztelaniaz entzun ditut. Kalitateari dagokionez, nik esango nuke nahiko ona dela (ez naiz oso exijentea). Une honetan, “El laberinto del fauno“ren hasiera ikusi dut eta zin dagizuet, kanpoan daukagun eguraldiarekin, litxarreriak hartu, manta jarri eta pelikula ikusten gelditzeko gogoa piztu zaidala.

mySchoolog irabazle Infomatrix sariketan

saria jasotzenDagoeneko garbi dago mySchoolog gustuko dudala, ezta? :smile: Bada, ez naiz bakarra eta orain esango dizuet zergatik. Lehengoan, nire lagun Ahmet turkiarrak idatzi zidan esanez, Errumaniara zihoazela mySchoolog aplikazioa sariketa batera aurkeztera, 5th InfoMatrix International Computer Project Competition delakora. Bertan mundu osoko gazteek parte hartu behar zutela adierazi zidan eta Turkiatik abiatu baino ordu batzuk lehenago hantxe zebilen, programari azken ukituak ematen.

Ahmetek (izugarria da mutiko hau egiten ari dena) berriz ere eskerrak eman zizkidan euskarara itzultzeagatik programa eta nik zorte ona opatu nion. Baina ez da hor bukatzen kontua. Han banatu behar zuten foileto baten kopia igorri zidan. A ze ezustekoa ikustean, itzultzaileok ere hantxe azaltzen ginela (argazki eta guzti) mySchoolog-eko partaide izango bagina bezala!!! Horrek ilusio handia egin zidan, noski, (foileto bidez baino ez bada ere, Errumanian izan bainaiz aste honetan) :wink: , baina onena orain dator: urrezko domina lortu dute!

Oraindik ez dut zabaldu programa ikasleen artean (ezagutu genuenean, ikasleek azterketa bezperan zeuden eta nahiko lan!) baina hurrengo astean, azterketa guztiak amaitzen dituztenean, euskaljakintzan ipintzeko asmoa dut eta, noski, hurrengo ikasturte hasieran, azalpen guztiak emango dizkiet ea norbait erabiltzera animatzen den!

Ahmet, zorionak bihotz-bihotzez! (Congratulations!)

MySchoolog euskaraz eta gaztelaniaz

Lehengo ostiralean mySchoolog ikasle-agenda azaldu nuen. Zehatz-mehatz aipatzen saiatu nintzen eskaintzen dituen aukerak, baita etortzekoak direnak ere (hauen artean ikasleen apunteak partekatzea, mugikorraren bidez ere den-dena kudeatzea eta beste hainbat). Baina ez nuen buruan itzultzea, egia esateko, Aitorren mezu hau jaso nuen arte:

Kaixo guztioi,

Duela aste bat edo, Ahmet-i e-mail bat bidali nion, mySchoolog erdarara itzultzeko asmoz. Atzo bertan, berarekin hitz egin nuen eta itzultzen hasi nintzen. Euskarara ere itzultzeko pentsatu nuen.

Orain, post-a ikusita, mezu hau uzten dizuet. Euskaraz itzultzeko arazorik badaukat, norekin hitz egin dezaket? Nire posta elektronikoa hau da: aimless.destiny@gmail.com

myschoolog2Aitorren proposamenari jarraituz, berarekin harremanetan jarri eta onena Ahmetekin ere hitz egitea izango zela erabaki genuen (Aitor gaztelaniazko itzulpenarekin hasita zegoen jada eta nik euskarazkoa egingo nuen). Gauzak horrela, larunbatean bertan, Ahmetekin hitz egin eta itzulpena egiten hasi nintzen. Hasieratik izugarrizko itxura ona hartu nion. Itzultzeko artxiboaz gain, fitxategia irekitzeko aplikazio bat ere jaso nuen eta baita itzulpena nola egin eta zeinu arraro guztiak azaltzen zituen PDF bat ere. Den-dena oso antolatuta eta oso argi adierazita. Atzo gauean, dena itzulita bueltatu nion Ahmeti eta hara non gaur goizean ikusten dudan gure itzulpenak jada jarriak eta martxan daudela! Dena den, ez da hori gehien harrritu nauena. Jolausen antzera, ni ere aho bete hortz gelditu naiz proiektuko kideen adinak ikusita (nire ikasleren bati eman behar nion itzulpena :wink: ). Esaterako, Ahmetek 17 urte ditu eta Aitorrek (euskaratzera animatu gaituenak), 15 !!!

Nondik sortu dira ekimen hauek? Ikastetxeren batek bultzatuta? Hala bada, Turkian adibidez, lehenago hasten dira ikasketa espezializatuekin? Aisialdian egindako zerbait da? Denbora-pasa bat? Eta Aitorren kasuan? Nola ezagutu du aplikazioa? Norbaitek animatu du itzultzera? Horrelako zerbait egiten duen lehenengo aldia da? Pizgarriren bat jasoko du hori egiteagatik (nota igo edo horrelako zerbait)? Ikusten duzuen bezala, egundokoa iruditu zait gazte hauen lana. Hauxe da guk behin eta berriz aldarrikatu duguna, ezta? Ikasle autonomoak, eraikitzaileak, ekintzaileak, partekatzaileak…Irakasle eta hezitzaileok gure ereduaren alderdi asko zalantzan jarri beharko genituzkeela iruditzen zait; izan ere, gaur egun, unibertsitatera bideratzen ditugun ikasle askoren profilak ez baitauka zerikusi handirik deskribatutako horrekin.