Opor hauetan gure ikastola hankaz gora daukagu. Urtero lez, eraikina mantentzeko lanak hasita daude: infogela berri bat egokitu, hormak margotu, zaharkitutako altzariak aldatu, instalakuntza elektrikoa egokitu… Baina, zalantzarik gabe, egiten ari garen berrikuntza guztien artean deigarriena ikastolaren kanpoaldean egiten ari garena da: ikastolako jolastokia estaltzeko eta frontoia eraikitzeko obrak, hain zuzen ere.
Ordizia ez da oso herri handia baina frontoi bakarra izateak pilotazale asko inguruko herri txikietako frontoietara joatera derrigortu ditu. Gainera, bolada batean, udalak frontoia giltzapean jarri zuenez, Ordizian nahiko ahulduta zegoen pilotazaletasuna galtzeko zorian izan genuen. Ea ikastolak egin behar duen ahalegin handi honekin berriro suspertzen dugun gurea den kirol hau. Une honetan, 8-9 urteko pilotari bikainak ditugu eta konbentzituta nago frontoia ikastolan izateak gure harrobia indartuko duela eta agian urte batzuk barru entzungo dugu ordiziar batek Aimar Olaizolari koroa kentzen diola.
Bestalde, herritar guztientzat irekita egongo denez, ez da giro faltako ikastolako frontoian. Irakasleen artean ere, ordiziarrek herri txikietako irakasleei aspaldi desafioa bota zieten, baina azken hauek beldurtuta ez dira sekula ausartu. Orain aitzakiarik gabe gelditzen dira. Portzierto, Ordiziako bikotea bi IKTeroz osaturik legoke. Hemen ere saltseroak.
Hemendik aurrera obra hauen jarraipena egingo dut eta hemen nahiz ikastolako web orrialdean lanen berri izango duzue. Gaur hasiko naiz frontoiak erakusten duen aurpegia erakutsiz.
