2007 – 10 orrialdea

Argazki libreak sarean

Nire ikasleekin askotan izan dudan borroka irudiena izan da. Izan ere, euren ohitura Google bilatzailera jotzea eta bertatik edozein irudia hartzea baitzen. Copyright eta lizentzia libreen inguruko oinarrizko informazio eman nienean, ohartu ziren gai horrek duen garrantziaz. Hala ere, erotu ez zitezen, ez nien helbide gehiegi eman eta gehien erabili zuten zerbitzua Flickr izan zen, hori bai, Creative Commons lizentziapean dauden argazkien bilaketa egiten zuten.

Atzo, nire lankide batzuekin ikastolan elkartu eta lantzen ari diren proiekturako irudi askeak behar zituztela aipatu zidaten.

Portzierto, irakasle talde hau zoriondu nahiko nuke egiten ari den lanarengatik. Ikastolako partaide guztiok harro gaude zuen jarrera eta lanarekin. Ikastolako kide guztiontzat mesedegarria izango den proiektu batean lan eta lan ari zarete, zeuen oporrei izugarrizko pusketa kenduz eta denbora pilo bat eskainiz. Ez dakit inoiz barkatuko ote didazuen proiektu horretan sartzeagatik, baina zuen adibidea guztiontzat eredu bilakatu da. Bejondeizuela!!!

Argazkien gaiari berriro helduz, horra hor sarean topa daitezkeen argazki libreen gune ezberdinak. Espero dezagun lagungarria izatea nire lankideentzat eta mezu hau irakurtzen duen ororentzat.

Wikipedia: era guztietako estekak irudi askeak lortzeko eta gaika antolatuta.

MorgueFile: irudiari buruzko era guztietako informazioa ematen du, etiketak, neurria, egilea, atala…

Imagebase: nik uste dut irudi kopuru oso baxua duela eta oso zaila egiten dela topatzea bilatu nahi dena.

Stock.xchng: oso ongi landutako gunea. Ataletan antolaturiko irudi asko eta bilaketak irizpide ezberdinen arabera egiteko aukera: egileen arabera, kameraren arabera, lurraldearen arabera…

CC Search: Creative Commons bilatzaile honek media ezberdinak bilatzen ditu. Irudiak ez ezik, audio eta bideoa ere bilatzen du. Horretarako, Google, Yahoo, Flickr, BlipTV, OWL music search, SpinXpress, Archive.org… bezalako guneak erabiltzen ditu.

FreeFoto.com: hemengo irudi kopurua ere ez zait iruditzen oso handia denik eta nahiko lan bilatu nahi duzuna aurkitzeko.

Stockvault: ongi diseinatutako gunea eta nahiko informazio esanguratsua eskaintzen dutena.

FreeDigitalPhotos.net: beste gune bat ataletan sailkatutako irudiak eskaintzen dituelarik.

Alamy: “9.11 million images” omen dituzte. Behar duzuna topatzen ez baduzu…

PD Photo: diseinu aldetik nahiko pobrea den arren, irudi dezente topa daiteke eta ataletan nahiko ongi antolatuta daudela dirudi.

TurboPhoto: ez du argazki kopuru handiegirik, baina ataletan ongi antolatuta daude eta oso erraz bistaratzen dira. Oso irisgarria iruditu zait.

Public Domain Pictures: Domeinu publikoko lizentziapean dauden irudien bilduma interesgarria oinarrizko ataletan sailkatuta.

Xcavator: web 2.0 diseinuko bilatzaile bikaina. Etiketak, koloreak, atalak… dira, besteak beste, erabili daitezkeen irizpideak. Neurri ezberdinez jaitsi daitezke eta oso informazio zehatza erakusten du irudi bakoitzarekin.

Yotophoto: beste bilatzaile interesgarri bat. Mota honetako lizentzia duten argazkiak bilatzen ditu: Creative Commons, Public Domain, GNU FDL…

Public.resource.org: Public Resource-k Flickr-en duen argazki libreen bilduma.

Bukatzeko, aholku bat: bilaketak egin behar badituzue, bilaketa ingelesez idatziz gero, emaitza askoz hobeak lortuko dituzue.

LenMus: musikako irakasleentzat

Gaur, beste aplikazio berri batekin gatozkizue. Bitelian LenMus programaren deskarga proposatzen zigutela ikusita, bertara joan eta programa honen ezaugarriak aztertzen aritu naiz.

Egia esateko, ni ez naiz aditu bat musikaren irakaskuntzan, baina eskaintzen dituen ezaugarriak ikusita, musikako irakasleentzat oso interesgarria izan daitekeelakoan nago.

Hasteko, software libre, doako ikaskuntza eta ezagutzaren zabalkundearekin konpromisoa azaltzen du. Horretarako, programa hau GNU lizentziapean banatzen da. Programa honek plataforma ezberdinetan funtzionatzen du eta, dagoeneko, prest ditugu Windows eta Linuxerako bertsioak. Mac OS X-erako ere prestatuta omen dago, baina distribuzioa konpilatu eta banatzeko beharrezkoa diren baliabideak ez dituzte eta laguntza eskatzen dute lan horrekin amaitzeko.

Hizkuntza ezberdinetara itzulita dago. Une honetan hauek dira eskura jarrita dauden hizkuntzak: Ingelesa, Gaztelania eta Nederlandera. Baten bat euskaratzeko asmoa badu, hemen jar daiteke harremanetan eta gabezi txiki hori zuzentzeko aukera izango du.

Arlo pedagogikoari dagokionez, honako hauek lirateke bere ezaugarri nagusiak:

LenMus oso erabilgarria da entzumenaren lanketarako

Intonazioa eta musika diktaketen lanketa oso zaila egiten da pianoa jotzen irakasle bat ez badugu. Programa honekin arazo hori konpon daiteke, horretarako proposatzen dituen jarduera hauekin:

Denbora-tarteak alderatzeko jarduerak
Denbora-tarteak identifikatzeko jarduerak
Akordeak identifikatzeko jarduerak
Eskalak identifikatzeko jarduerak

Teoriako kontzeptu batzuen lanketarako balio du

Zure beharren eta erritmoaren arabera lantzeko aukera eskaintzen digu, tarteka ebaluazio jarduerak eskaintzen dituelarik lortu nahi duzun mailara iritsi bitartean. Honako aukerak topatuko ditugu:

Denbora-tarteak sortu eta identifikatzeko jarduerak
Elementu erritmikoak barneratzeko eta praktikatzeko jarduerak
Solfeo praktikak: programak ekoiztutako partiturak (inoiz ez dira errepikatzen)
Klabeak ikasteko jarduerak

Bukatzeko, programa jaitsi nahi izanez gero, hemendik lor dezakezu.

Xtimeline

Egungo web berri honetan, etengabe zerbitzu berriak ateratzen ari dira era guztietako zerbitzuak eskaintzeko. Guri, bereziki, irakaskuntzarako baliagarritasuna izan dezaketenak interesatzen zaizkigu. Horregatik, gaur horietako bat aurkeztu nahi dizuegu: Xtimeline

Zerbitzuaren izenak garbi adierazten duen moduan, denbora-lerroak sortzeko eta partekatzeko gune oso interesgarria dugu hau. Slideshare-n aurkezpenak edo Scribd-en dokumentuak gorde eta partekatzen diren moduan, hemen gauza bera egin dezakegu denbora-lerroekin.

Duela urtebete baino gehiago hemen bertan denbora-lerroak sortzeko aplikazio baten berri eman genizuen. Oraingo honetan, aurkezten dizuegun aplikazioaren erabilera antzekoa izan arren, eskaintzen dituen aukera gehigarriek oso erakargarria bihurtzen dute:

Denbora-lerroak etiketatu daitezke eta, horren ondorioz, bilaketa eraginkorrak egin daitezke
Besteek eginiko denbora-lerroak eskura daitezke
Zure gunean sar daitezke horretarako ematen duten kodea erabiliz
Era guztietako baliabide multimedia sar daitezke: bideoak, argazkiak, audioak..
Beste erabiltzaileekin partekatzeko aukera eskaintzen du
Iruzkinak egin daitezke
…

Horren adibide bat hemen jartzeko, nire denbora-lerro bat sortu dut, baina oraindik ulertzen ez dudan arrazoi batengatik script arazoa ematen dit eta ezin da bistaratu. Jolausi komentatu eta berari gauza bera gertatzen zitzaiola egiaztatu zidan. Zuei gauza bera gertatzen ote zaizuen jakin nahiko genuke. Agian guk zer edo zer gaizki egiten dugu eta horregatik ematen digu akats hori.

Azkenean, nirea erakusteko aukera ez dudanez, azpiko hori sartzea erabaki dut. Denbora-lerro horretan bideo-jokoen historia ikus dezakegu.

Stage 6en itzalpean

Aurreko batean, pelikulak online ikusteko zerbitzu baten berri eman genizuen eta iruzkinetan zerbitzu gehiagoren berri jaso genuen. Bada, hori ikusita, gaurkoan saiatuko naiz zerbitzu horien nondik-norakoa azaltzen.

Divx Web Player-en sorrerarekin, kalitatezko bideo zerbitzu bat eskaintzeko aukera zabaldu zen. Hobeto ulertzeko, Youtube bezalako zerbitzu bat, baina kalitate handia eskainiz. Horrela sortu zen Stage 6. Beste zerbitzuetan gertatzen den bezala, hemen ere norberak bere bideoak igo eta partekatzeko aukera eskaintzen digute. Berehala, pelikulak, serieak, dokumentalak… igotzen hasi zirenez, zerbitzu honen arduradunak, Copyright-ekin arazoak ez izateko, izena aldatzen eta helbide oso bereziak ematen hasi ziren.

Aldaketa horiekin ezinezkoa egiten zen pelikula bat bilatzea eta hortxe kokatu behar ditugu ondoren sortu diren zerbitzuak. Izan ere, zerbitzu horiek egiten dutena da Stage 6 zerbitzua arakatu eta eskaini nahi diren pelikulak, seriak… lokalizatu eta euren guneetan eskaini. Beraz, edukiak Stage 6 zerbitzuan kokatuta daude, baina eskura ahal izateko beste zerbitzu horiek erabili behar ditugu.

Salaketak eta itxierak iritsi bitartean aprobetxatu beharko dugu. Beraz, hortxe doakizue Stage 6en itzalpean sorturiko zerbitzu eta blog batzuen zerrenda:

Informazio gehiago: Genbeta, Blogoff eta del.icio.us.

Informazioa guk maneiatzen dugu, ez informazioak gu

2006-2007 ikasturteari agur esan diogun unean, nire DBH 1eko ikasleekin burututako lanketa azaldu nahiko nuke, batez ere ikasturte osoan zehar nire “jarioa” jasan behar izan duten ikasleen errekonozimendua egin nahirik eta, nola ez, zuetako norbaitentzat lagungarria izango delakoan.

Batez ere, Carlos zoriondu nahiko nuke tokatu zitzaion loteriari aurre egiteko erakutsitako kemenarengatik. Bertan esaldi garrantzitsu bat bota zuen eta, nik uste dut, bertan bildutako gehienentzat oharkabean pasatu zela, horregatik mezu honen izenburuan jartzea otu zait. Horrek laburtzen baitu 12 urteko ikasle hauekin eginiko lanaren helburua.

Hasi baino lehen, gure lanketa kokatzen ahaleginduko naiz. DBH 1ean, gure ikastolan, Informatika ikasgaia agertzen da curriculumean eta astero ordubete eskaintzen zaio. Bestalde, aurten maila horretan egon diren ikasleak, Lehen Hezkuntzako azken bi ikasturteetan Multimedia Tailer bat (30 ordu inguru) eta partekatutako blog batean lana egin zuten. Beraz, ikasle hauentzat blog bat ez zen tresna arrotz bat eta hainbat tresnetan trebatuta zeuden.

Horregatik, ez nintzen zerotik abiatu eta, ikasturtearen hasieran, nire lana errazagoa izango zelakoan nengoen. Baina oker nengoen. Gauza bat da blog batean noizbehinka idaztea eta beste bat norberaren bloga hornitzeko beharrezkoak diren baliabideak ongi kudeatzen jakitea.

Egia esan, nire helburua ez zen bloga bera, blog txukun bat aurrera ateratzeko beharrezkoak diren baliabideetan trebatzea eta informazioa eraginkorra kudeatzeko ahalmena garatzea baizik. Planteamendu oso sinplea zen: informazioa kudeatzeko tresnetan trebatu ahala, ikasleen mezuak aberasten joango dira eta blogaren kalitatea hobetzen joango da. Nik ez nituen ikasle blogariak sortu nahi, baizik eta informazioaren aurrean bitartekoak dituzten ikasleak, iritzi kritikoa duten ikasleak, sortzeko eta partekatzeko gaitasuna duten ikasleak, elkarreragiteko gai diren ikasleak… Ikasten dakiten ikasleak nahi nituen.

Egia esan, gauzak horrela gertatu dira, baina, zoritxarrez, ez ikasle guztiekin. Ohartu naiz lanketarekin konektatu duten ikasleek egundoko aurrerakuntza eman duten bitartean, ikasle askorekin ez dudala asmatu eta euren lorpen maila nabarmen jatsi dela. Baten batek esango dit hori gai guztietan gertatzen dela eta arrazoia izango du, baina ni horrekin ez naiz gustura gelditzen. Metodologian ez nuen asmatu, hori garbi daukat. Hasieran, planteamendu irekia egiten nien irtenbidea bila zezaten, baina oso zaila egiten zitzaienez, planteamendu gidatu batera pasa nintzen eta, honekin, ikasle batzuek oso jarrera aktiboa eta eraikitzailea azaldu zuten, besteek, ordea, pasibotasunean erori ziren eta nik zer esango zain gelditzen ziren.

Jordi Adellek esango lukeen bezala, gure ikasleak 2.0 izan dira eta nik eskainitako metodologia 0.9 izan da. Beraz, opor hauek aprobetxatuko ditut metodologiari astindu sakon bat emateko, ikasleek eta gizarteak irakasleoi exijitzen diguten formazioa eskaini asmoz. Gure erantzukizuna da gizarteak eskatzen digunari erantzun egoki bat ematea eta horretan ahaleginduko naiz. Ea lortzen dudan.

Bukatzeko, ikasle hauek osatutako blog batzuen zerrenda jarriko dizuet, zuek ere euren lana ezagutu eta baloratu ahal izateko.

Iñigo Jauregi: Bihurrikeriak (Umorea eta bizipen pertsonalak)
Alexander Oiarbide: Tenisasko (%100 Tenisa)
Lierni Garmendia: Gurekin (Super Pop bezalako bloga)
Mikel Aiestaran: Gaixotasunak (Izenak dena esaten du)
Beñat Ventureira: Milakirolak (Era guztietako kirolak)
Carlos Peña: Animali (Animalien mundua)
Irati Otamendi: Mendittonttor (Mendizaletasuna)
Iñigo Etxarri: Parkeak (Atrakzio parkeetan topa daitezkeen “tramankuluak”)