Hilabetea: maiatza 2007

Atzo goizean nire postontzian Xa2-k bidalitako mezu bat nuen. Bertan BBCk argitaratutako albiste baten berri ematen zidan. Artikulu honetan Scratch izeneko aplikazio baten inguruko zehaztasunak ematen dira. Hasierako inpresioa nahiko positiboa izanik, zertxobait gehixeago sakontzen ahalegindu naiz eta hemen uzten dizkizuet nire lehen inpresioak.

Scratch MITeko Media Lab-ek garaturiko programazio interfaze grafiko berria da. Programazio lengoaia berri hau umeei begiratuz garatu da batez ere. Bertan, gure haurrek programa interaktibo sinpleak garatu ditzakete soinuak, irudiak bideoak eta bestelako elementuak bloke moduan pilatuz, LEGOko adreiluak izango bailira. Horrela programa sinpleak garatu kode eta sintaxi lerro bat ere erabili gabe.

Programaren oinarrizko erabilera ulertzeko botaiozue bistazo bat ondorengo bideoari:

Gehiago ikusteko gogoz geratu bazarete hemen dituzue gehiago.

Ez da lehenengo aldia gure blogean gaztetxoentzat bereziki diseinaturiko programazio lengoaiaz hitz egiten dugula. Magic-ek C-Jump-en berri eman zuen aspaldi eta ni ere, duela urtebete edo, KPL lengoaiaz aritu nintzen. Hiruen artean azken hau iruditzen zait erakargarriena, oso sinplea dirudielako, oso erakargarria bisualki haurrentzat eta erraz menperatu daitekeena irakasleon aldetik. Kontutan izanik zeintzuk diren definituta ditugun oinarrizko konpetentziak datorren urterako, iruditzen zait horrelako aplikazio batek primeran uztartuko litzatekeela laugarren helburu orokorrarekin.

Nik dagoeneko aplikazioa deskargatu dut eta datozen egunetan probatuko dut (ea zer deritzon nire semeak honi buruz). Bizitako esperientziak zuekin partekatuko ditut.

Mila esker Xa2. Hirekin zorretan gelditu nauk.

Informazio gehiago: MITeko prentsa oharra

Aplikazio jaisteko: Scratch (azken egunetan jaso duten bisita kopurua dela eta gunea erorita dago baina lortu dute esteka eta irdui pare bat ipintzea)

Oraintxe bertan eman dizkiet ikastolako batxilergoko tutoreei azken ebaluazio honetako emaitza akademikoak nire gaian. Azken urteotan gertatu izan zaidan bezala, oso deseroso sentitzen naiz jasotakoarekin; eta naiz ari soilik emaitzei buruz. Errazena errua ikasleei botatzea da; alperkeria, gogo falta, arduragabekeriak, etorkizunari aurre egiteko baliabide falta…. Baina ez da hori bakarrik. Ez nago gustura nire lanarekin. Uste dut oker ari naizela metodoan, helburuetan eta ipintzen ditudan bitartekoetan. Horixe da adibidez horrelakoak irakurtzen ditudanean pentsatzen dudana

Aurkezpen horretan aipatzen diren egoeretako asko oso arruntak egiten zaizkit, nire ikasleekin ere bizi ditudala iruditzen, baina. Gauza bera gertatzen zait Jordi Adell-ek bideo honetan (55 minutu inguru) azaltzen dituen askorekin.

Aldaketarako unea heldu da? Orain artekoa zeharo moztu eta bide berriak urratzeko unea heldu zait? Uste dut baietz.

EHUko eta iKide taldekoa den Ainhoa Ezeizak idatzi zidan atzo esanez izerdi asko bota eta gero zabalik dagoela I. Moodle Esperientzien Elkartrukerako Jardunaldiak 2007: MoodleMoot Euskadi jardunaldietarako deia. Azterketak zuzendu eta zuzendu nabil eta oraintxe hartu dut tartea deialdi interesgarri honen berri emateko. Beraz, gatozen harira.

Jardunaldi hauen xede nagusia Moodle darabilten eragileei elkartzeko, esperientziak elkartrukatzeko eta Moodle-ren erabilerei buruz eta egin daitezkeen garapenei buruz eztabaidatzeko aukera eskaintzea da. Dakizuen bezala, Moodle plataformaren erabilera asko hedatzen ari da azkenaldi honetan Euskal Herrian (unibertsitate, ikastetxe eta euskaltegien munduan, batik bat) eta aukera ezin hobea izan daiteke horretan ari garenok bizi ditugun esperientziak, topatzen ditugun zailtasunak eta ikusten dizkiogun onura nahiz zirriztuak partekatzeko.

Aurtengo topaketa ekainaren 27 eta 28an izango da eta gai hauek jorratu nahi dira:

• Moodle esperientziak Unibertsitatean: esperientzien elkartrukea irakasleen artean
• Moodle esperientziak Unibertsitatetik kanpo:
Lehen eta Bigarren Hezkuntza
Lanbide Heziketa eta enpresa
Hizkuntzen irakaskuntza, euskararen irakaskuntza bereziki
Unibertsitatetik kanpoko beste esperientzia batzuk
• Baliagarritasun berriak: Moodle-n erabiltzeko baliagarritasun berrien garapena, proiektuen aurkezpena
• Moodle-ren garapen eta ezarpenerako erakundeen estrategiak: esperientziak eta etorkizunerako gakoak

Jardunaldietan zehar gonbidatuen hitzaldiak, komunikazioak eta tailerrak izango dira. Komunikazioak irekiak dira, hau da, edonork eska dezake parte hartzea. Horretarako, zuen komunikazioa bidali behar duzue eta, hautatua bada, jardunaldietan aurkeztu ahal izango duzue. Bidaltzeko epemuga maiatzaren 31 izango da eta ISBNdun CD-ROM batean argitaratuko dira bidalitako komunikazioak.

Ez dira guretzat data komenigarrienak (bilerak, plangintzak, ikasturte amaiera…) baina gure ahalegin guztiak egingo ditugu bertan egoteko. Bide batez, beste guztioi ere parte hartzera animatu nahi zaituztegu.

Informazio osoa:

• Moodlemoot Euskadi 07

Honen berri eman duten beste guneak:

• Karrajua
• Moodle Lab
• Sustatu

Zorte on eta eutsi goiari, Ainhoa!