Urtea: 2006

Mikroformatuak: Ikastolaren Eguna

Teknosexuan honi buruzko artikulu interesgarria irakurri ondoren, gurean froga bera egitea otu zait. Horretarako, gainean dugun Ikastolaren Eguna iragarriko dugu.

Garik dioenez, informazio hau formato honekin jartzeagatik, Technorati-k garatu duen Pingerati izeneko zerbitzuari esker ekitaldi hau bilatu ahal izango dugu.

Honek zer esan nahi duen? bada, ondorengo kode hau hemen idazteagatik bakarrik, laster azalduko dela ebentu moduan Technoratiren ebentu bilatzailean eta beste webgune batzuetan. Hauxe:

Ikastolaren Eguna: Ekainaren 17an goizeko 9:30etatik aurrera
Amaiera: arboledan 14:30ean,
Ordizia: arboleda, frontoia, Herri Antzokia, Barrena…

<span class="vevent">
<a class="url" href="http://www.jakintza.net/">
<span class="summary">Ikastolaren Eguna</span>:
<abbr class="dtstart" title="2006-06-17">Ekainaren 17an goizeko 9:30etatik aurrera</abbr>-
<abbr class="dtend" title="2006-06-17">Amaiera: arboledan 14:30ean</abbr>,
<span class="location">Ordizia: arboleda, frontoia, Herri Antzokia, Barrena... </span>
</a>
</span>

Froga egin nahi baduzue, Technoratin Ikastolaren Eguna bilatzerakoan ebentu moduan agertuko zaizue eta zorte pittin batekin eventful datu basean

Beraz, zuen ebentuak argitaratu edota besteenak bilatzeko asmoa baduzue, etzazue aukera berri hau alperrik galtzen utzi

Eguneraketa: Pin in the map zerbitzua erabiliz, ebentuaren berri Google Earth-en kokaturik ikus ahal izango duzue

Tagzanian egun horretako ekintza ezberdinak kokatu ditugu. Hona hemen sorturiko mapa.


Tagzania: jakintza

Wikimapia.org=Wiki+Google Maps

Duela egun batzuk Pedro Arreitunandiak (Tolon) bere blogean, Seik idatzitako post batean irakurritakoaren haritik, ideia interesgarri bat proposatzen zuen gure ikasleekin Geografiaren lanketa egiteko. Tolonek zera proposatzen zuen:

Geografia ikastea aspergarria izan daiteke, baina betiko moduan planteatu beharrean, ikasleak superman/superwoman bihurtzen baditugu eta zerutik mundua zela ikusten den erakusten badiegu seguru emaitza hobeagoak lortu daitezkeela, edo behintzat lana erakarriagoa egin.

Erabat ados nago. Honekin batera, aukera izango bagenu gure ikasleek, kokapen geografiko jakin baten inguruko informazioa gehitzeko, oraindik hobe. Hau da, Tagzania bezalako gune batek eskaintzen duena.

Tagzania lekuekin eta etiketekin dago egina. Erregistratzen bazara, lekuak gehitu ahal izango dituzu, zure gustuko tokiak edo mapak gordetzeko. Puntu bat gehitzen duzunean, etiketak eman diezaizkiozu, gako-hitzak. Horrela, Tagzania ez da bakarrik zure mapen bilgunea: lurralde partekatuak ere sortzen dira etengabe.

Fenomeno. Tagzania erabiliz gure ikasleek jada, kokapen geografiko jakin batzuk etiketatu eta hauen inguruko informazio esanguratsua gehitzeko aukera badute. Baina honekin batera, ikasleek euren artean, elkarlanean arituz (Seik Writely erabiliz bere ikasleekin egin duen lanketaren antzera) kokapen jakin baten inguruan informazio gehitzeko, aldatzeko eta osatzeko aukera edukiko balute, egindako ekarpenen historiala gordeta gelditzen delarik (Writelyrekin gertatzen den bezala), tope tumatxa izango litzateke!. Hauxe da wikimapia.org gunean aurkitu daitekeena

WikiMapia is a project to help describe the whole planet Earth. Just move the map to find interesting places, click on rectangles. To add an interesting place or object use Add New link. Wikimapia was created by Alexandre Koriakine and Evgeniy Saveliev, inspired by Google maps and WikiPedia.

Wikimapia.org oso, oso erabilterraza da. Sarrera orrian mundu osoko mapa aurkituko duzu. Pantailaren azpian eta ezkerrean agertzen den nabigatzailea eta zooma konbinatuz puntu geografikoa erraz bilatzeko aukera izango duzu. Behin lokalizatu ondoren “Add New” aukeratu eta zuzenean kokapen horren inguruko informazioa txertatu ahal izango duzu, testuaz gain, beste webgune batzuetarako linkak ere gehitzeko aukera izanik. Hori besterik ez da egin behar. Ekarpen honen gainean beste edonork informazio gehiagarria erantsi dezake, egindakoari zuzenketak ere egiteko aukera izango duelarik. Aldaketa guztiak historial txiki batean gordetzen dira: atzera eta aurrera egin ahal izango duzu bertsio desberdinak ikusi ahal izateko.

Erabileran duen sinpletasun aldeko puntu garrantzitsua izanik, baditu eragozpen handi bi ere:

  • Alde batetik, wikimapia.org-en ekarpenak hizkuntza desberdinetan egin daitezke. Bat aukeratzerakoan, mapan agertuko diren ekarpenak hizkuntza horretan bakarrik egindakoak izango dira. Horrela, ingelesez egindakoak eta erdaraz egindakoak mapa desberdinetan agertuko dira. Eta hemen dago arazoa. Euskara ez dela agertzen oraindik aukeren artean, beraz, gure aportazioak beste hizkuntzetan daudenekin nahastuta agertuko dira.
  • Zerbitzua erabiltzeko ez da beharrezkoa erregistratuta egotea. Beraz, nahiz eta bertsio desberdinen ikuspegia izan, ez dugu jakingo norena izan den ekarpen bakoitza, beraz, bakoitzak egindako aportazioak ebaluatzeko arazoak izango ditugu.

Kontutan izanik Tagzaniak atal hauek ondo lotuta dituela, nahiz eta oraindik maiatzan egon, hona hemen aurtengorako Olentzerori (Luistxori, alegia :lol: ) egin nahi diodan eskaera: aukerarik egongo al litzateke, epe labur-ertainera, Tagzaniako lekuak taldeko kide desberdinen artean, era partekatuan, gehitzeko aukera izatea eta, bide batez, gehiegi eskatzea ez bada, taldekideen ekarpenen historial txiki bat eskaintzea? :wink:

Iturria: ñblog

Sinonimoak lantzeko ariketak sarean (II)

Ez zaizue benetan zaila egiten ohiko hitz eta esamoldeetatik atera eta zuen idatziak hitz berriez apaintzea? Nire ikasleei, behintzat, bai! Idazketan trebatzea ez da egun batetik bestera lortzen den zerbait, ez da formula matematiko bat aplikatuz ondo ateratzen den ariketa eta, nire uste apalean, horrexegatik ikasleen lehentasunen artean kokatzea kosta egiten da. Orokorrean denok, eta nire ikasleak ez dira salbuespena, nahiago izaten ditugu gure indarra berehalako emaitza positiboak lor ditzakegun ekintzetan fokatzea eta ez ditugu horrenbeste lantzen epe luzera onurak ekar dakizkiguketen jarduerak!

Aspaldi honetan konturatuta nago ikasle askoren funtzionatzeko eraz eta oso zaila egiten zait jokabide horretan eragitea. Demagun esamoldeak lantzen ari garela eta gustura aritu direla lanketa horrekin eta, hori gutxi balitz, esamolde batzuk ere barneratu dituztela. Hurrengo egunean, testu bat idazteko eskatu eta ehuneko handi batean horietako bakarren bat sartuko du bere ekoizpenean zalantzarik gabe. Primeran! Baina ez da hor amaitzen kontua. Handik denbora batera, beste zerbaitekin ari zarela, beste idazlan bat izkiriatzeko eskatu eta zer faltako da? Esamoldeak, ziur!

Gauza bera gertatu zitzaidan lehengo egunean. Hautaprobetarako jarduera bat prestatzen ari ginela (bi esaldi lokailuen bidez uztartu), puntuazioarekin gora eta behera ibili ginen denek ondo ulertu arte dena den, hala ere eta mota honetako lokailuak nola idazten diren puntuazio aldetik. Ondoren, iazko azterketa bat egiteko eskatu nien. Bada, guztiz kuriosoa izan zen gertatutakoa! Aipatutako jardueran, lokailuak idazterakoan, ederki asko idatzi zituzten (puntu eta koma aurretik, koma ondoren…) baina ondorengo idazlanean lokailuak berriz ere gaizki! Zer egin daiteke horren aurrean? Pixka bat haserretu bai, baina gero? Nola lortzen da, esaterako, sinonimo zerrenda luze batetik ikasitako bakar batzuk euren idatzietan sarraraztea? Azken galdera honentzako erantzunik ez badut ere, lehenengoa (sinonimoak ikastearena) atseginago bihurtzeko ideiak ez zaizkit falta eta, horregatik, aurretik egindako ariketa sortari beste bat erantsi diot: EGAko azterketetan ateratako sinonimoak lantzeko GURUTZEGRAMAK.

Gauzak horrela, euskaljakintzako atal hau honela gelditzen da (oraingoz):

  • 1-8: Testuinguruaren laguntzaz sinonimoa eman (flash). Adibide bat ikusi.
  • 9-18: Ezkerreko zutabeko sinonimoak eskuinekoekin lotu (flash). Adibide bat ikusi.
  • 19-23: Sinonimo-gurutzegramak (berria): 1, 2, 3, 4 eta 5.

    – Gurutzegramak elkarri lotuta daude; beraz, nahi izanez gero, denak jarraian egin daitezke.

    Honekin nahikoa ez dela argi dago, baina sinonimoen zerrenda barneratzen saiatzeko modu erakargarria izan daiteke (betiko zerrenda amaigabea buruz ikastea baino atseginagoa, behinik behin). Zin dagizuet ariketa hauekin zerbait ikas daitekeela; nik, behintzat, horietako batzuk barruratu, nireganatu eta barrendu ditut! :smile: Orain, eguneroko jardunean, praktikara eramatea baino ez zait falta.

Pearl Jam eta Creative Commons lizentzia

Gaur jakin dut Pearl Jam talde estatubatuarrak, “Life wasted” bere azken bideoa, Creative Commons (CC) lizentziapean kaleratu duela Google Videoren bitartez. Albistea irakurri dudanean lehen inpresioa oso pozgarria izan da. Sony-BMG bezalako multinazional batekin kontratua duen talde batek bere azken bideoa kopiatu, banatu eta partekatzeko aukera ematen du! Eta segituan pentsatu dut, “tira, ea disketxe erraldoi horiekin diskak argitaratzen dituzten taldeek, hauen adibidea jarraitu eta CC lizentziarekin abesti, bideo edota diska gehiago kaleratzen dituzten”.

Dena dela, albiste honen inguruan dagoen informazioari begirada bat eman ondoren zera irakurri dut: bideo hau CC lizentziapean datorren maiatzaren 24ra arte bakarrik eskainiko da. Data honetatik aurrera bideoa salgai jarriko dute, ohi den bezala. Koño! Bideo bat partekatzeko aukera eskaintzen dute 5 egunetarako bakarrik? ….? Zein da estrategia honen helburua? Zer dago honen atzean? Nire ustez, beste askotan gertatu ohi den bezala, interes komertzialekin zerikusia duen azpijokoren bat dago hemen. Gaur egun sareak artisten lanak promozionatzeko duen indarraz baliatu nahirik edo, negozioa egin nahi duen talde baten aurrean gaudela iruditzen zait. Bere momenturik oparoena 90. hamarkadaren erdialdera bizi izan zuen taldeak, horrelako estrategiekin berriro ere “kandelabroan” edonola kokatzeko asmoa duenaren itxura osoa du honek.

Eta egoera honen aurrean zera datorkit burura: zer gertatuko litzateke bideoa deskargatu eta blog honen bitartez edonorekin partekatuko bagenu? Gure blogak CC lizentzia izanik, edonork edukiko luke bideoa kopiatu eta partekatzeko aukera, nahiz eta maiatzaren 24a pasatuta egon, ala? Zer dio legeak honi buruz? Nahiz eta jakin horrelakoekin taldea promozionatzen laguntzen ari naizela, hemen ipintzen dizuet bideoa. Gustukoa baduzue jaitsi eta partekatu nahi duzuenarekin.

Neil Young-en cover band izan den talde honek, hobe luke bere eredua jarraitzea . Ikus bestela Neil-en bloga eta entzun bere azken diskoa dohain.Hemen abestien itzulpenak erdarara.

Pandoraz gehiago

Aurreko batean adierazi nuen Pandora izugarri gustatzen zitzaidala. Egia esan, beti dut eskura musika entzuteko gune hau, Firefox-eko nire barra pertsonalizatuan klik batera, hain zuzen ere. Irrati-kanal ezberdinak sortuak ditut bertan eta umorea edo lanaren baitan, bata edo bestea entzuten dut. Dena erraz, eskuragarri eta modu erosoan.

Dena den, oraintxe bertan Bitelian irakurri dut Pandoraren web orrira sartu gabe, Pandora Desktop Player ordenagailuan instalatu eta eskaintzen duen musikaz gozatu ahal izateko aukera eskaini berri dutela. Berehala jaitsi dut nire ordenagailura eta martxan jarri dut dohaineko zerbitzu hau. Bi aukerak alderatzen baditugu (sarekoa eta ordenagailukoa), ez dugu ezberdinatasun handirik aurkituko(irrati-kanal berriak sor ditzakezu, gustuko ez dituzun abestiak pasatu, atsegin dituzunak zure kutunetan gorde…), baina zerbait aipatzekotan, publizitatearen eraso eza eta irekitzen den leihatilaren neurria (txikiagoa azken honetan) aipatuko nuke.

Aipagarria da, halaber, Mac OS X erabiltzen duzuenok aplikazio hau erabili ahal izateko, Pandoraman deituriko dohaneko musika-erreproduzitzailea duzuela eskuragarri.

Ez dago gehiago esan beharrik: niri Pandora pila bat gustatzen zait! Ezagutu nuenean, ordea, hutsune pare bat zituen: ez zen dohainekoa eta bertako musika ezin zen grabatu. Badirudi, egun, bi gabezia horiek gaindituta daudela eta erabat doan izateaz gain, entzuten den musika grabatzeko aukera ere hortxe dagoela. Azken hau ez det egiaztatu (biharko utziko dut) baina honen inguruko informazio gehiago nahi baduzue, hementxe klikatu. Hori bai, probatzen baduzue, idatzi eta gorabeherak kontatu. :smile: