Hilabetea: maiatza 2006

Spama del.icio.usen?

Jarraian azalduko dizuedana zehazki zertan datzan ez dakit oso ondo azaltzen jakingo dudan baina, tira, ahaleginduko naiz. Agian sekulako astakeria botatzera noa, ez dakit. Hala bada, barkatuko didazuelakoan nago.

Kontua da, duela egun batzuk nire del.icio.useko kontuan “inbox” zerbitzua erabiltzea erabaki nuela. Zera pentsatu nuen: sarean zehar norbaitek fisikako ikasgaiarekin harremana gordetzen zuen webgune bat bilatzen zuenean eta bere del.icio.usean gordetzerakoan fisika etiketa erabiltzen bazuen, hori nire inboxera ekartzera. Horrela, inbox honetara ekarriko nituen “fiska”, “fisica”, “physics” eta “physique” etiketekin mundu osoan jasotako webguneak. Behin lau hitz gako hauek nire inboxean txertatu ondoren, bere RSSa jaso eta nire agregatzailean sartu nuen. Gauza bera egin nuen matematikarekin erlazionatutako etiketekin.

Lehenengo unetik konszientea nintzen, etiketa hauek hain arruntak izanik, nire inboxak, eta ondorioz, nire agregatzailean sortutako karpetek segituan topetaraino betetzeko arriskua zutela. Halere, proba egin nuen eta hasieran, behintzat, ez zen hainbesterako.

Baina azken egun hauetan egoera zeharo aldatu da. Fisikarako sortu nuen postontzia di-da batean betetzen zait; nahiko da minutu batzuk pasatzea jasotako webguneen zerrenda izugarri handitzeko. Eta mezu gehienak erabiltzaile jakin batenak dira: bere izena blogminer da (adierazgarria izena ala?). Bere del.icio.useko kontuari begirada bat botatzen badiozue, konturatuko zarete zein tipo langilea den gure Blogminer hau!!!! Minutu gutxi batzuetan bere kontuan ehundaka mezu gehitzen direla konturatuko zarete. Hau da, “tipoa” ez da ordenadore paretik kentzen ezta pixa egiteko ere!!!!!!

Bestalde, oso kuriosoa da, bere del.icio.useko kontura gehitzen dituen erreferentzia guztiak webgune berekoak direla egiaztatzea: webgunearen izena Blog@Case da eta, ez banago oker, blogak sortzeko hostinga eskaintzen duen leku bat da, Blogsome, Blogak.com edo Blogari.net bezala.

Blogmineren etiketa zerrendari begirada bat botaz konturatuko zarete erabiltzen dituen etiketak oso generikoak direla, Apache, Apple, Microsoft, IBM, Google…

Honek guztiak del.icio.usen spama egon daitekeela pentsatzera eraman nau baina ez nago ziur hori gertatzea posiblea ote den edo ez. Nire galdera hau da: posiblea da robot baten bitartez webguneak del.icio.useko kontu batera gehitzea eta hauei lotutako etiketak del.icio.usen gehien erabiltzen direnak izatea? Posible ote da prozesu hau era automatikoan burutzea robot baten laguntzaz? Zuetako norbaitek informaziorik izango balu, honi buruz iruzkin batean azaltzea eskertuko nioke.

Arratsaldeko 15:23ak dira eta une honetan blogminerrek 4323 erreferentzia jasota ditu bere kontuan!!!

Eguneraketa (2006-05-05, 15:50):del.icio.usen zertxobait saltseatu ondoren, settings atalaren barruan “antisocial” izeneko gunea agertzen da. Bertan, erabiltzaile jakin bati edota etiketa konkretu bati betoa jartzeko aukera ematen du. Ale blogminer, hoa popatik hartzera nire del.icio.usetik!!!!!

Skypecasts

skypecastsAtzotik eskuragarri dago Skypen 2.5 bertsio berria. Oraindik beta fasean dagoen bertsio berri honek hainbat berrikuntza interesgarri dakartza: Outlookeko kontaktuei Skypen bitartez zuzenean deitzeko aukera, lagunei SMS mezuak bidaltzeko aukera… eta beste batzuk. Baina denen artean interesgarriena Skypecasts zerbitzua iruditu zait. Zerbitzu honen bitartez zure gustukoak diren gaien inguruko elkarrizketetan parte har dezakezu. Txat gelen pareko zerbitzua eskintzen du Skypecasts-ek baina elkarrizketa idatziz burutu beharrean, hitzez ematen da, zuzenean, aldi berean 100 solaskide arteko taldeak osa daitezkeelarik. Elkarrizketa hauetako bakoitzak, gunea sortu duen arduraduna izango du moderatzaile bezala; berak banatuko du mikrofonoa solaskideen artean, beharrezkoa denean hitza kendu edota elkarrizketatik botatzeko aukera ere izango duelarik.

Skypecast bat sortzea oso erraza da: hizpidea zein izango den hautatu, ondoren izenburua ipini, bere deskribapena garbi adierazi eta gaia azaltzen duten etiketa egokiak hautatu. Ondoren, saioan parte hartu nahi dutenak jakinen gainean egon daitezen, zein ordutan konektatuko zaren adierazi beharko duzu. Behin saioa hasi ondoren zeu izango zara moderatzailea eta zeuk erabakiko duzu zein izango den elkarrizketa mota, eztabaida irekia edota norabide bakarreko elkarrizketa, zuk galdetzen duzu eta besteek erantzuten dute, alegia. Zure ardura izango da hitza nori ematea eta, beharrezkkoa izango balitz, hitza nori kendu ere; nahiz eta solaskideei hitza kendu hauek beti izango dute aukera mikronofoa eskatzeko aukera,horrela zure baimenaren zain geldituko dira.

Oraindik ez dut aplikazioa probatu baina irakaskuntzan erabiltzeko oso interesgarria izan daitekeela iruditzen zait. Aurtengo ikasturtearen hbasieran, nire ikasleekin multikonferentzia bat aurrera eraman nahi izan nuen baina elkarrizketan hiru erabiltzaile baino gehiago konektatzen ginenean, seinalearen kalitatea izugarri jaisten zen, elkarrizketa bat baldintza honetan gauzatzea ezinezkoa zelarik. Sistema honekin, berriz, badirudi solaskide multzoa handia izanda ere kalitatea bermatzen dela. Gai jakinen inguruan gure ikasleekin solasean, eztabaidan edota ikuspuntu desberdinak azaltzeko interesgarria izan daitekeela iruditzen zait. Ariketa baten aurrean adibidez, zalantzak eta kezkak argitzeko balio dezake, ikasleek galderak euren artean argitu ditzaten, beti ere irakaslearen moderazio lana dela medio. Ea aurtengo ikasturtea amaitu baino lehen probatzeko aukera dudan.

Skype bezalako tresna batek irakaskuntzan izan dezakeen garrantziaren adibidea da, baita ere, Moodle plataformarako garatu den Skype Presence Block delakoa. Gehigarri honen bitartez Moodleek ikastaro batean parte hartzen duten irakasle eta ikasleen egoera zein den erakusten du (konektatuta, offline, kanpoan, lanpetuta…). Gehigarri hau erabiltzeko erabiltzaile bakoitzaren profilean bere Skype IDa txertatzea besterik ez da behar