apirila 2006 – IKTeroak

Mimio

mimio Aspaldiko partez idazten dut post bat atal honetan. IKTeroen bloga bere lehen urratsak ematen hasi zen garaian, interes berezia genuen sarean zehar topatzen genituen tramankulu informatiko berrien berri emateko. Baina denborarekin, poliki-poliki, gure artikuluek beste eduki batzuk jorratu dituzte eta atal hau zertxobait ahaztuta geratu da.

Baina, gaurkoan, aurkitu dudan tramankulu hau oso interesgarria dela iruditu zait, batez ere eskoletan erabiltzeko. Pentsa, gure ikastolarako bat erostekotan nabil.

Gure ikastolan, geroz eta gehiago dira proiektorea eta informatikako gela erabiltzen ari diren irakasleak, tramankulu berri hauek gure egunerokoan normaltasunez erabiltzen hasi garenaren seinale garbia da. Egoera honetan,duela hilabete pare batetik hona serioski planteatzen hasi gara, datorren ikasturteari begira, arbel interaktiboak erostea, proiektore batekin erabiliz hauek eskaintzen dituzten abantailak izugarriak baitira. Halere, arbel hauen prezioak erreparo handia ematen du horrelakoak erosterakoan. Azkenaldi honetan proiektoreen prezioa dezente jaitsi den arren, arbel hauen prezioa oraindik nahiko garestia da. Hor daude SmartBoard, Promethean, 3M… etxe ezberdinen ereduak kontsulta ditzazuen. Duela hilabete batzuk ere, blog honetan bertan La Pizarra Digital webgunearen berri eman genuen non bertan arbel hauei dagokien informazio piloa topa daitekeen.

Baina gaur Mimio ezagutu dut. Eta benetan oso inpresio ona eman dit. Mimioren bitartez arbel interaktibo bat eduki dezakezu zure ikastetxean arbela bera erosi beharrik izan gabe. Berdin dio pareta zuria, izara zati bat edota Velleda arbel bat erabiltzen baduzu. Mimiok hauek guztiak arbel interaktibo bihurtzen ditu. Bai, bai, horrelaxe da, entzuten duzuen bezala.

Zertan oinarritzen da Mimio?. Mimioren muina Mimio xi deritzon produktua da. Mimio xi alde batetik bestera eraman daitekeen aparailu bat da, honekin batera benetako tinta eta tinta birtuala erabiltzen duten errotulagailu txikiak ditu. Mimio erabiltzen hasteko hiru urrats eman behar dira:

Lehenik eta behin ordenadore bati konektatu egon behar da. Konexio hau Mimiok dakarren USB kable baten bitartez bermatzen da. Halere, wirelees adaptadorea erantsiz gero konexio hau wi-fi bitartez ere egin daiteke, kableak zintzilik edukitzea sahiestuz.
Bestalde Mimiok, bere eginkizuna behar bezala betetzeko, argindarra behar du. Hemen ere bi aukera dituzu: adaptadore baten bitartez argindarrari zuzenean konektatu daiteke edota, inguruan entxuferik ez badago, pila bitartez funtzionatzeko aukera ere eskaintzen badu.
Azkenik, Mimio xi arbel modura erabiliko dugun gainazalean ipini beharko dugu horretarako dituen gehigarri batzuen bitartez. Erabiliko dugun gainazalari lotuta erabat finko utzi daiteke edo, alde batetik bestera eramateko asmoa badaukagu, erraz jarri eta kentzeko sistema bat ere badauka.

Mimio xik bi erabilera mota desberdin eduki ditzake. Alde batetik, ez da beharrezkoa proiketore batekin funtzionatzea. Errotulagailuei kolorezko tinta kartutxoak ipiniz edozein gainazalaren gainean egindako arrasto guztiak ordenadoreak jasoko ditu. Beraz, erabili dugun arbelaren kopia osoa gure ekipoan jaso ahal izango dugu irudi moduan. Bestalde, Mimioz gain proiektore bat erabiltzeko aukera baldin badaukagu, edozein dela aurkezpen gainazala, ordenadorearen kontrola pantailaren bitartez gauzatu ahal izango dugu. Beraz, gure gelako pareta zuria edota aspaldiko Velleda arbel zaharra gure ordenadorearen mahaigain birtuala bilakatuko dugu, ohiko arbel interaktiboetan gertatzen den bezala. Kasu honetan errotulaigulean tinta kartutxoa, “tinta birtuala” erabiliko duen kartutxoaren bitartez ordezkatuko dugu.

Eta zeintzuk dira sistema honek aurkezten dituen abantaila nagusiak betiko arbel interaktiboekiko?

Proiektorerik gabe erabil daieke. Edozein gainazalean idatzi edo marraztutakoa gure ekipoan gordeta izango dugu digitalean.
Proiektorea erabili nahi izanez gero, arbel interaktibo guztiek bezala, ordenadorea era birtualean kudeatzeko aukera ematen du.
Mugikortasuna ahalbidetzen du. Arbel digitalekin hau izaten da arazorik handiena: behin gela batean arbela kokatuz gero, bertatik mugitzea ez da batere erosoa izaten. Mimiorekin ez daukazu inongo arazorik arbel digital edozein gelan ipintzeko. Beraz, joku handia ematen du gelaz gela erabili nahi badugu.
Bateriak eta wireless moduluarekin erabiliz ez da inongo kablerik behar erabiltzen hasteko.
Azkenik, garrantzitsuena; bere prezioa. Oinarrizko mimio xi-k $799 balio ditu. Arbel digitalek dutenarekiko alderatuz gero diferentzia handia da. Wireless modulua aparte erosi beharra dago eta honek $299 balio ditu. Ondorioz, $1100en truke wireless arbel interaktibo zure ikastolako edozein txokoan erabiltzeko aukera daukazu, proiektoreari lotuta edo ez, zuk nahi duzun bezala. Une honetan, arbel interaktibo arrunt baten prezioa honen bikoitza da gutxi gorabehera.Bukatzeko mimiok oinarrizko software aplikazioak ere salgai ditu. Aplikazio pakete osoak $199eko prezioa dauka eta bertan mimio Studio oinarrizko softwareaz aparte Mimio writing Recognition (idatzitako testua ulertzen duen softwarea da, idatzitakoa testu editore batera pasatzeko balio duena) eta Mimio Recorder (pantailan egiten diren arrasto guztien jarraipena egiten duen aplikazioa) aurkitu daitezke.

Datozen egunetan ondo aztertu beharreko aukera bat interesgarria Mimiorena.

Mimioren erabilera azaltzen duen gida (pdf) irakurtzeko klika ezazu hemen.

IKTeroak HUHEZIn

Duela aste batzuk IKTerook Joxe Aranzabalen gonbitea jaso genuen HUHEZIko Irakasle Eskolan antolatu berri zuen ikastaroan parte hartzeko. Ezusteko handia izan zen guretzat unibertsitatean antolatutako ikastaro batera gonbidatuak izatea. Eta ez dizuet gezurrik esango; lotsa puntu bat ere eman zigun. Izan ere, urtebete besterik ez daramagu blogen mundu honetan eta arrotza da guretzat horrelako foroetan gure esperientziaren berri ematea. Azkenean animatu ginen eta, horrela, Eskoriatzako bidea hartu dugu gaur goizean.

Goizeko 10:30erako geldituta geunden Joxerekin Eskoriatzan eta, gure kasuan ohikoa ez den arren, puntual heldu gara behingoz. Berehala agertu da Joxe. Laburki bederen, baina eskolako eraikin zaharra erakutsi digu bere historia zein izan den argitu digularik. Oso atsegina izan da. Kafetxo bat hartu eta zuzenean joan gara Joxeren ikasleak zeuden gelara. Gustura egoteko gelatxo batean aritu gara, ikasleez inguraturik, anfiteatro itxura duten gela hotz horiek transmititzen duten giro hotzetik urruti. Egia esan, oso eroso sentitu gara, gure ikasleekin egunero bizi izaten dugun giro berean aritu baikara

Hitzaldiari buruz zer esan!. Neu hasi naiz gure blogaren jatorria azaltzen, Web 2.0 kontzeptua ahal den neurrian agertzen eta web berri honek irakaskuntza mailan ekar ditzakeen abantailez hitz egiten. Ondoren, Magic aritu da, Lehen Hezkuntzako eta Bigarren Hezkuntzako ikasleekin burutzen ari den bere proiektu, bizipen eta balorazioak gure entzuleei azalduz. Azkenik, Seiren txanda izan da. Euskaljakintzak bere irakasle esperientziaren arabera suposatu dion iraultzaz argibideak eman ditu: ikasturtea hasi zenean finkatutako helburuak, ikasleekin komunean gauzatutako proiektuak, irakasle bezala jaso duen betetasuna garbi utzi die gure entzuleei. Nik uste dut Euskaljakintzaren inguruan bizi izandakoak benetan garbi uzten duela, lortu nahi diren helburuak aurretik ondo finkatzen badira, teknologia berriek onura handiak ekar diezazkiola irakaskuntzari

Denera, ordu pare bat aritu gara, jo ta ke, hitz egiten. Balorazioa egitekotan esango nuke nire aurkezpena, agian, “potoloegia” izan dela ikasle hauentzat. Blogintzaren munduan hasiberriak diren ikasleen aurrean aritu naiz eta ikasle hauentzat oraindik hainbat kontzeptu/aplikazio nahiko arrotzak dira. Web mailan ematen ari diren aldaketa hauek ahalik eta zehatzen azaldu nahi izateak, nire entzuleen interes eta ezagutzarengandik urruti ibiltzera eraman naute. Denbora gutxi utzi diet Magic eta Seiri beraien eperientzien berri eman dezaten eta, ziurrenik Eskoriatzako gazte horien interesak, batez ere, nire bi lankideen esperientziak entzutean oinarriturik zeuden. Azken finean, laster murgilduko dira irakaskuntza munduan eta beraien ikasleekin burutu ditzaketen proiektuen inguruko informazioa jasotzea izan daiteke gehien eskertzen dutena.

Gure lehen esperientzia izan da ikastolatik kanpo eta gu, behintzat, pozik bueltatu gara. Horrelako beste aukera bat suertatzen bada, jadanik aurretiko esperientziak zerbaitetarako balio izango digula uste dugu.

Bukatzeko, hiruron izenean eskerrak eman nahi dizkiogu Joxe Aranzabali; lehenengo, gu gonbidatu eta gure esperientzia eta lanen berri emateko aukera eskaintzeagatik eta, bigarrenik, egin digun harreragatik. Hemendik aurrera, Joxe, badakizu non gauden!

Ordenadorez Lagunduriko Esperimentazioa (OLE)

Denbora luzez zain egon eta gero, gaur heldu da ikastolara fisikako esperientziak burutzeko aspalditik eskatuta genuen materiala. Azkenik!!!

Zuetako gehienek jakingo duzuen bezala, aurten fisikako mintegian proiektu berri bat jarri dugu martxan. Proiektu honen ardatza bloga izanik, gure asmo nagusia, ikasleekin erabiliko dugun ikasmaterial guztia bertan kokatzea eta bertatik erabiltzea izan da. Bertan ipini ditugu Batxilergo 2ko fisikako eduki guztiak (datorren ikasturterako DBHO 1ekoak sartuko ditugu), erabilitako simulazioen zerrenda (oraindik simulazioak saioetan sakabanatuta ditugun arren, laister antolatutako ditugu gaikako zerrenda batean bakoitzaren deskribapen zehatzarekin), ikasleek gaiarekiko dituzten zalantzen inguruan galdera/erantzunen txokoa (onartu beharra daukat arrakasta gehiegirik ez duela izan) eta, azkenik, gelan landuko ditugun saiakuntzen gidoiak eta emaitzak.

Azken atal hau hutsik egon da gaurdaino. Ikasturtea hasi zenean nahiko lan izan genuen bloga martxan jartzen: WordPress, CSS, HTML… eta horrelakoekin denbora dezente pasa ondoren, bigarren ebaluazioan OLEarekin hasteko asmoa genuen. Materialaren eskaera egiteko epea eguberrietan jarri genuen, baina kontuak kontu, oporrak pasa ziren eta guk oraindik eskaera egin gabe. Azkenik, otsailearen hasieran egin genuen eskatu genuen eskatu beharrekoa. Hara non esaten diguten materiala Estatu Batuetatik ekartzen dela, eta gutxi gorabehera, bi hilabete pasa beharko zirela gure ikastolan izan arte . Aste Santuko oporrak pasa berriak ditugu eta azkenik, gaur jaso dugu material guztia (bi hilabete luze, ezta? ).

Oinarrian eskatu dugun materiala sentsore mota desberdinez osatuta dago (posizioa, indarra, tenperatura, presioa, boltaia…), hauek ordenadorera konektatzeko beharrezkoak diren USB interfazeak (USB Link deitzen dira eta sentsoreen datuak ordenadoreak ulertzeko moduko hizkuntzara bihurtzen dituzte) ere erosi ditugularik.

Oinarrizko material honekin karrotxoak, “rollercoaster” bat, masak eta poleak…. ere eskatu ditugu, mekanikako arloari dagozkion saiakuntza gehienak burutu ahal izateko. Saiakuntzak burutzeko bost Tablet PC ere erosi ditugu, gure ikasleek taldekako lana egiterakoan, taldeko ordenadore bana eduki dezaten.

Esan beharra dago, gure ikastolan aurten hasiko dugun proiektu hau ez dela berria irakaskuntzaren munduan. Halere, aintzindariak ez dabiltza oso urruti: alde batetik, hor dago Mikel Etxaniz-en lana Pasaia-Lezoko Lizeoan (estatu mailako saria merezi izan duena) eta bestetik, hemen bertan, Ordiziko Oianguren ikastetxean irakasten duen Arantxa Oterminen esperientziak OLEarekin. Horrelako materialarekin “ausartu” diren lehenegoak izan dira Euskal-Herri mailan eta biei eskerrak eman nahi dizkiet hemendik: lehenengoari, eskaini zigun laguntzarengatik Foru Aldundira proiektua aurkeztu behar izan genuenean eta bigarrenari, Ordiziko institutuan eskaini zigun ikastaroarengatik, material honen oinarrizko erabilera ulertzeko oso baliagarria suerta baitzitzaigun.

Norbaitek horrelakorik aurrera eraman nahiko balu, esan material hau guztia Batxilergoko eta Lanbide Heziketako ikastetxeentzat Foru Aldundiak eskaintzen dituen diru laguntzetatik lortu dugula. Beraz, hemendik animatzen zaituztegu datorren urterako proiektu bat aurkeztu dezazuen zuen ikastetxean ere. Bestalde hemen ipintzen dizkizuet helbide interesgarri batzuk OLEaren inguruan gehiago ikasi nahi duenarentzat:

Mikel Etxanizek eta Arantxa Oterminek, duela urte t’erdi, OLEaren inguruan eskaini zuten ikastaro baten Powerpointa
Horrelako materiala saltzen duen Pasco etxearen webgunea
Pascoren produktuak merkaturatzen dituen Prodel etxearen webgunea
Erosi dugun materialaren inguruko argazki gehiago

Beno, orain lanean hastea tokatzen da. Laister emango dizuegu gure lanaren berri.

Ikasturtearen amaiera gertu?

Irakasleok pribilegiatu batzuk garela, behin baino gehiagotan, entzun ohi dugu, baina opor garaietan, bereziki. Ez naiz ni izango hori eztabaidatzen hasiko dena, baina gaur bertan gogorazi didatenean ikasturte hau ia amaitu dugula, pentsakor gelditu naiz eta burura etorri zaizkit udako oporrak hartu bitartean egin beharreko gauza guztiak eta urduri jarri naiz oso. Iritsiko ote naiz? Gelditzen zaizkigun hilabete hauek aldapa gora egingo zaizkit, gauza mordo bat egiteke eta denborarik ez. Hau da marka!

Ezkortasun horretan murgilduta, etxera iritsi eta nire feed-ak arakatzen hasi naizenean, del.icio.us-en EEBBetako Gobernuaren web hau aurkitu dudanean, ni baino okerrago daudenak ikusita, lasaitu ederra hartu dut. Amerikar Gobernuarena bai psikosia.

Baina ez da hori izan nire arreta bereganatu duen albiste bakarra, izan ere, TechEBlog-en efektu bitxi hori ikusi dudanean, nire egoera pertsonalarekin alderatu egin dut eta arestian aipaturiko aldapa gora hori gainditzeko beharrezkoa dudan adorea eta kemena lortu dut. Esplikatuko naiz.

Urak beti goitik behera egiten du, baina azpiko bideo horretan ikus daitekeen bezala, errealitate hori eraldatzeko ez da gauza handirik egin behar. Horixe da, hain zuzen ere, irakasleoi gertatzen zaiguna kaleko jendeak lehenago aipaturiko gisako baieztapenak egiten dizkigutenean. Perspektiba galtzen dugu eta ito egiten gara. Ez gara ohartzen bi hilabete eta erdian gauza asko gerta daitezkeela, gauza asko egin daitezkeela, ordu asko direla eta gure lan guztiak aurrera ateratzeko denbora izan badugula.

Irakaskuntzan nagoenetik, irakasleon estresa, urte sasoi honetan, nola areagotzen den ikusteko aukera izan dut. Ni ez naiz salbuespen bat eta urduritasun hori nik ere bizi izan dut nire erraietan. Horregatik, gaurko bideo honekin ohartu naiz zer gertatzen den ikuspegi desegokia erabiltzen dugunean.

Beraz, lasaitasunez eta gogoz ekingo diot ikasturte honen azken txanpari. Ikasleekin, Ikastolen Elkarteko lankideekin, IKT taldeko kideekin eta gainontzeko lankideekin burutu beharko ditudan lan guztiei aurre egiten saiatuko naiz eta, ahal badut, nire lankideen une zailetan laguntzen ahaleginduko naiz. Ur korronteak eraman gaitzala. Ikastolako lankideen kalitatea ezagututa, itsas bare batera iritsiko garela ziur bainago.

Bukatzeko, IKTeroon lanarekin jarraituko dut eta idatzi hau baino hobeak egiten saiatuko naiz. Ea gauza interesgarriak egin edo lortzen ditugun zuekin partekatzeko.

GOOGLE CALENDAR

Egun hauetan hainbat gauza (ordenagailukoak, lanekoak, etxekoak…) txukuntzeko aprobetxatzen ari naiz eta ez dago zalantzarik sareak horretarako baliabide ugari eskaintzen digula. Horien artean azkenaldi honetan jende asko itxaroten ari zen
Google calendar dugu. Nik lehengo astean probatu nuen Genbetako artikulu hau irakurri eta gero eta, egia esan, tresna oso egokia da, Google nonahikoak eskaintzen digun guztia bezala, hainbat zerbitzu bateratu ahal izateko.

Google calendar-era zuzenean nahiz Simply Google-etik (oso-oso interesgarria, Google-en zerbitzu guztiak batera jarriak) sar gaitezke Google kontuko pasahitza erabiliz. Behin sartuta, irudian ikus dezakegunez, ezker goialdean Google-eko zerbitzu guztiak integratuta topatuko ditugu (hasiera orria, Gmail, calendar, beste zerbitzuak…).

Seguruenik batek baino gehiagok dagoeneko probatuta izango duzue. Hala bada, ondo legoke zuen iritzia ematea. Besteentzat hona hemen ezaugarri nagusienak eta hainbat aholku abian jartzeko:

1. Sartu bezain pronto, settings-era jotzea (eskuin goialdean) eta konfiguratzea komeni da. Ondorengoak alda ditzakegu:

– ordu-zona
– ordua eta dataren formatua
– astea zein egunetan hastea nahi dugun
– irekitzen dugunean zer ikusi nahi dugun (eguna, astea, hilabetea, agenda…)
– betebeharrak gogoratzen dizkiguten mezuak nola jaso nahi ditugun ( sms, pop-up, postaz…)
– …

2. Eskaintzen duena:

– Egutegi bat baino gehiago kudeatzeko aukera (lanekoa, pertsonala…) eta, gainera, horiek batera edo bereiz ikustekoa.
– Gmail-ekin bat egiten du: Gmaileko mezuren batean ekitaldi baterako deia badugu, antzeman egiten du eta, klik pare bat eginez, ekitaldi horiek gure agendara gehitu ditzakegu.
– Quick add botoia: Zeregin bat laster batean gehitzeko laguntza botoia.
– Partekatzea: gure agenda (baimen batzuen bidez) besteekin parteka dezakegu eta alderantziz. Ez da beharrezkoa besteek Google Calendar izatea; izan ere, feed edo web bidez egin baitaiteke trukatze hau.
– Eginkizunak gogorarazteko modu ezberdinak: gure telefono mugikorrean mezu bat jaso dezakegu, besteak beste.
– Agendan sartuta dugun edozein zereginetarako gonbidapenak luza ditzakegu.
– Inportatzea: egun gure agenda Yahoo Calendar edo Microsoft Outlook-en badugu, horietatik inportatzeko aukera eskaintzen du (ezaugarri benetan interesgarria honako hau kontuan izanda oso pisutsua gerta dakigukeela agendako datu guztiak banan-banan berriz sartu behar izatea!). Honen inguruko informazio gehiago hementxe .

Ikusten duzuen bezala, alde onak begi bestakoak dira: erosoa, erabilerraza, bateratzailea, partekatzailea… Dena den, oraingoz ingelesezko bertsioak baino ez du onartzen hau gauztia!