2006 – IKTeroak

(bl)O(g)lentzero jauna…

(bl)O(g)lentzero jauna. Gabonak gainean ditugu eta oraindik ez dizut nire gutuntxoa idatzi. Landalan ibili naiz opor aurreko egun hauetan eta tarterik ere ez dut izan nire eskaeratxoa helarazteko.

Lehenik eta behin, zin dagizut urte osoan zintzo jokatzen ahalegindu naizela euskal blogosferako kide guztiekin. Iaz eskatu zenidan bezala, nire jarioak besteekin partekatzen ahalegindu naiz. Agian aurten, iaz baino jario gutxiago bidali ditut. Ez dut uste alferkeriagatik izan denik, mila saltsatan sartuta ibili naiz eta ez dut denbora gehiegirik izan. Halere, bizi eta kontatutako esperientziak iazkoak baina aberatsagoak izan direla uste dut eta alderdi horretatik gusturago nago.

Datorren igande gauean nire jario agregatzailearen ateak irekita utziko dizkizut, orain eskatutakoak ekarriko dizkidazulakoaren esperantzaz. Ez dut uste gauza konplikatuak direnik baina oso pozik jarriko nintzateke nire eskaerari erantzungo bazenio. Hauxe da datorren urteari begira eskatzen dizudana:

Artikulu osoa jasota dakarten jario gehiago nahiko nituzke datorren urtean. Ez ditut gustukoak artikuluaren sarrera bakarrik idatzita dakartenak. Jario asko irakurri behar ditudanean ez zait batere erosoa egiten agregatzailetik webguneetara saltoka ibili behar izateak. Ez dut oso garbi zein den bidalketaren sarrera bakarrik bidaltzearen arrazoi nagusiena: agian batzuen ustez, bloga bisitatzea ariketa sanoa izan daiteke (batez ere publizitatea dutenak), ez dakit. Nire iritziz blog bat hona izateko eduki onak izan behar ditu eta hori jarioan islatzen da. Jario onak jasotzen ditudanean, blogara salto egiteko gogoa ematen dit, iruzkinak ote dauden ikustera. Moztuta datorrenean, askotan gainbegirada bat eman eta paso egiten dut. Nola ikusten duzu gaia? Eskaerari erantzuteko gai izango al zara (bl)O(g)lentzero jauna?
Euskal eskola komunitatetik ausardia gehiago eskatuko nizuke ere, nire agregatzailean Euskal Herriko hezkuntza mundutik jario piloa jaso nahiko nuke. Egia da ikasleekin geroz eta gehiago erabiltzen den tresna bat dela bloga. Tira ez dago gaizki. Baina nire kideekin esperientziak transmititzeari buruz ari naiz. Ziur nago irakaskuntza munduan esperientzia berritzaile mordo bat garatzen ari direla urtero, idei polit ugari sortzen direla ikasturte bakoitzean, IKTeekiko konpromezu erreala duten irakasle “ero” mordo bat dabiltzatela hortikan zehar, gauzak beste era batera egin daitezkeela sinesten dutenak eta “hezkuntzaren erraldoi erdoildua” mugitzen ahalegintzen ari direnak. Horien guztien berri jaso nahiko nuke nire agregatzailean. Nik nire aldetik, eskaini dezakedan gutxi hori plazaratzeko konpromisoarekin jarraituko dut datorren urtean.
Hirugarren eskaerak jatekoarekin zerikusia du. Lasai, ez dizkizut kapoiak eta arraultzak eskatuko, ezta Jabugoko urdaiazpikorik ere. Sekretutxo bat kontatuko dizut: oso gustukoa dut sukaldaritza eta, apal-apal esaten dizut, kazolen artean nahiko ondo moldatzen naizela. Euskal Herritarrok orokorrean dugun sukaldari sena berezi hori ere badudala uste dut. Eta nire galdera da: nola liteke sukaldaritzaren inguruko euskal blogik ez izatea? ze demontre gertatzen da honekin? Mila arlo jorratzen dituzten blogak ditugu euskaraz eta sukaldaritza inguruan bat ere ez? (mila buelta eman dut euskal blogosferan zehar eta nik behintza ez dut batere aurkitu). Nola liteke? Bihotz-bihotzetik eskatzen dizut, agregatzailean aspaldi sortu eta oraindik hutsik dudan “euskal sukaldaritza” karpeta jarioz betetzea urte honetan, baina jario pilo bat nahi ditut, eh? Ez ahaztu!

Niretzako horixe da dena. Amaitu baino lehen eskaera txiki bat egin nahiko nizuke euskal blogosfera osatzen dugun guztiontzat. Zabal dezagun euskara mundu osora; eman dezagun gurearen berri blogosfera osoan. Erabil ditzagun trackback eta pingback-ak “a sako”! Ez dakizu ze ilusioa egiten didan Googleko blog ofizialetik bisitak jasotzen ditugunean; edota Pixel y Dixel bezalako blogetik bisitari piloa etortzen zaizkigunean. Bai badakit, heltzen diren bezala joaten dira, ez baitute tutik ere ulertzen. Baina, ez al da akaso garrantzitsua gurearen berri Euskal Herriko mugetatik kanpo ematea? Ez al da garrantzitsua euskal blogosferaren errealitatearen berri ematea gure herriko mugetatik kanpo? Ez al digu honek lagunduko .eus domeinuaren lorpenean? Lan handia egin behar da oraindik horretarako, baina zalantzarik ez daukat horrelako pausu txikiak oso lagungarriak izan daitezkeela. Josi dezagun internet trackbacketaz!!

Hau da dena. Esan bezala nire agregatzaileko ateak irekita utziko dizkizut. Ekarri zakua jario mordo batekin beteta, bale?

Aldez aurretik eskerrak emanez, zorionak eta urte berri on, zuri eta gure blogaren jarraitzaileak diren guztiei, Ordiziako IKTeroen partetik.

Ondo pasa jai egun hauek!!

Ereduak

Aspaldi honetan, ohikoa bilakatu da ume, nerabe eta gaztetxoen jokabidea gaitzeztea. Hala ere, gutxitan entzun dut jokabide desegokien atzean dagoenari buruzko inongo gogoeta seriorik eta, gehienetan, Hezkuntza Sistema izaten da kritika guztien jomuga.

Nik ez ditut baloiak kanpora bota nahi, baina dumb little man blogean aurkitu dudan bideo honek, garbi uzten du noren erantzukizuna da: GUZTIONA!!!

Irakasleen irakasle; hirugarrena, oraingoz

Hirugarrena, oraingoz, diot ez baitut uste, irakasleek azaldutako jarrera eta jakin-mina ikusita, azkena izango denik. Aurten, Jolausek azaldu zuen bezala eta Seik idatzi zigun lez, hiru ikastaro antolatu genituen gure lankideen eskaerari erantzun nahian. Niri hirugarrena, Web 2.0 eta Blogak izeneko ikastaroa, gidatzea egokitu zitzaidan eta bost saio burutu ondoren, bihar amaituko dugu.

Ikastaro honen hasieran, Web 2.0ari buruzko sarreratxo bat egin ondoren, RSS jarioa eta Jario-irakurleak edo agregatzaileak jorratu genituen, Bloglines izan zen sakontasunez azaldu genuena. Batzuentzat gai hau arrotza bazen ere, orain pozgarria egiten zait hauetako batuk euren jarioak irakurtzen ikustea. Jarraian, Social Bookmarking eta Folksonomiak landu genituen eta del.icio.us-i egundoko “errepasoa” eman genion. Jarraian, Digg, Technorati, Zabaldu… bezalako guneak ezagutu eta erabili genituen. Azkenik, blogen lanketa hasi genuen eta blogen ezaugarriak aztertu ondoren, sortzeari ekin genion. WordPress-en oinarritutako blogak sortu dituzte eta praktika ugari egiten ari dira. Bihar, azken lanketa horri amaiera emango diogu eta, ondoren, baliabide hauek ikaskuntza-irakaskuntza prozesuari nola eragiten dioten edo nola eragin diezaioketen aztertuko dugu.

Ikus dezakezuenez, ikastaro honen lehen zatian, berebiziko garrantzia eman nahi izan diogu informazioaren kudeaketari, hots, informazioa lortzeko, gordetzeko eta partekatzeko bide berri horiei. Hori ez da kasualitatearen ondorioz gertatutakoa, baizik eta nahita planifikatutako zerbait. Izan ere, gure iritziz, funtsezkoa da edozein irakaslearentzat baliabide eraginkorrak ezagutu eta erabiltzea bere eguneroko jardunean. Guretzat, irakasle guztion kezka izan beharko litzateke informazio iturri egokiak eskuratzeko eta kudeatzeko tresna eraginkorrak menperatzea eta, hori dela eta, atal horri berebiziko garrantzia eman nahi izan diogu. Zenbat aldiz entzun ditugu irakasleen kexak bilaketak egiten orduak igaro eta gauza interesgarriak lortu gabe amaitu ondoren?

Bestalde, blogen lanketari dagokionez, arlo mekanikoari baino, garrantzia beste atal bati eman diogu: edukiak sortzeari eta partekatzeari, hain zuzen ere. Gure iritziz, ez dugu ezer egiten gure ikastolako irakasleak tresna hauen erabiltze hutsarekin gelditzen badira, erabilera horri balio erantsi bat eman nahi diogu irakasleen jarrera aktiboa indartuz eta sustatuz. Blogosferan arnasten den partekatze kultura helarazi nahi izan diegu, etorkizunean, eduki sortzaileak bihur daitezen. Konbentzituta nago, hein handi batean, lortzen ari garela eta berandu baino lehen, gure taldera ale berriak gehitzen joango direla.

Denbora izango dugu, dena amaitutakoan eta perspektiba daukagunean, balorazioa egiteko eta, gauzak espero bezala ateraz gero, fruituak biltzen hasteko.

Ikastaroan erabilitako aurkezpen bat azpian ikus dezakezue

TiddlyWikirekin praktika onenaren saria Jolaus eta Jakintzarentzat

IKTeroak bloga sortu genuenean, askok eta askok erotuta geundela esaten ziguten, eta ez zitzaien arrazoi falta. Makina bat ordu sartu eta makina bat izerdi bota ondoren, hortxe gabiltza gure erokeria plazaratzen, askotan, bat ere lotsarik gabe eta, gehienetan, ausardi punttu batekin.

Horiek guztiak beharrezkoak dira, zalantzarik gabe, baina, era berean, esfortzu edo erokeri horren atzetik beste zertxobait ere beharrezkoa da. Boluntarismoa ongi dago, baina ez da nahikoa.

Gure kasuan, bi motore izan ditugu hau guztia aurrera ateratzeko:

“Ero” bat proiektua lideratzeko. Hori, zalantzarik gabe, Jolaus izan da.
Jakintza Ikastolako zuzendaritza taldea, hasieratik gure proiektua babestu eta indartu duena, erabateko konfiantza eskaini digularik.

Hala ere, ez dira izan gure lanaren akuilu bakarrak. Ikastolako irakasleria, ikasleak, gurasoak…, hots, Jakintza Ikastolako Komunitateak eskaintzen digun harrerarekin indarra ateratzen dugu honekin jarraitu eta bizipen berrietan murgiltzen hasteko.

Baten batek esango du seko erotuta nagoela edota aurreko asteazkeneko ajea ez zaidala oraindik pasatu, baina ez. Gaur oso pozik nago (ez da Baldorba ardoa edan dudalako), ezta bizirik gelditzen zitzaidan azken neurona bereak egin duelako ere.

Gaur, IKTero batek, Euskalitek antolaturiko Praktika Onen 3. Elkartrukea saioan, Praktika Onenaren Saria irabazi baitu. Gainera, irabazlea gure “guru” izan da: Jolaus. Eta aurkeztu duen praktika, nola ez, blog honetan azaldu zuen artikulu hauetan: bat eta bi. Ez, Jolaus ez da bere ezagutza ezkutatzen eta bere apalean gordetzen duen horietako bat, hori ez dut uste inork zalantzan jarriko duenik. Guztiokin partekatzen du eta, hori gutxi balitz, besteok zirikatzen gaitu gauza bera egin dezagun. Bere ondoan gabiltzanok ederki asko dakigu zenbat ordu eskaini behar izan dio proiektu “txiki” horri eta zenbat buruhauste ekarri dizkio. Hala ere, berehala ekin zion idazteari eta bere lan guztia gure eskura jarri zigun. Bai adibide zintzoa ematen diguzuna!!!

Eta harro nago, bai. Harro nire ondoan jolaus bezalako lankideak izateaz gain, Sei dudalako. Iaz, bere proiektuarekin bigarren praktika onenaren saria jaso zuen eta zer esango dizuet bere lanari buruz zuek ez dakizuena. Honek ere hamaika bider azaldu digu zenbaterainoko kemena eta adorea duen edozein lanari aurre egiteko eta guztiokin partekatzeko. Adibiderik garbiena Moodle plataforma erabiliz, sorturiko EGA ikastaroa

Baina harro eta pozik sentitzeko arrazoi bakarra ez da nire lankide fin hauen jarrera edota lana, badaukat beste arrazoi sakonxeago bat; guk aldarrikatzen dugun partekatzearen kulturak, berriro ere, bere fruituak eman dituelako. Honek, lehendik konbentzituta banengoen, beste urrats bat eramatera narama konbentzimendu horren haritik: konpromiso irmo bat hartzen dut Euskal Herriko Hezkuntza Sistemaren “mitxelinak” eta “armiarma sareak” kentzen saiatzeko. Ez nago prest beti kexu azaltzeko, akziora pasako naiz. Euskal Hezkuntza Sistemako eragile guztiek, hala sare publikakoek nola ikastolakoek nahiz gainontzeko kontzertatuek pauso sendoak eman beharko dituzte, behingoagatik, EUSKAL HEZKUNTZAREN SAREA osatzeko. Hori egin ezean, ez dut atsedenik hartuko hori salatzeko eta dagozkion foro eta esparruetan agerian uzteko.

Bada garaia Euskal Herrian gauzak eraikitzen hasteko eta ez errezeloz begiratzen jarraitzeko. Jendea oraindik ez al da jabetzen partekatzearen abantailaz?, ez da ohartzen beste biderik ez dagoela?, ez al daki horrek guztiok aberasten gaituela?, irakasleek ez al dakite euren “apunte” dotore horiek beste batzuentzat ere baliagarriak izan daitezkeela?, edo ez al dakite “apunte” horiek osatzeko besteek eginiko lanetan oinarritu zirela?… Eta horrela jarrai nezakeen arren, ez dizuet, gaurkoz, honekin nekatu nahi. Baina, lasai, konpromiso publikoa hartu dut eta zin dagizuet antzemango duzuela.

Bukatzeko, mezu pozgarri batekin amaitu nahiko nuke: Jolausek lortutako errekonozimenduarengatik sekulako poza hartu dut, bai, eta are handiagoa ikusi dudanean egokitu zaion saria: Asteburu bat bi pertsonentzat Ziekoko (Eltziegoko) hotel batean. Eta ez da nolanahiko hotela, ez, Frank Gehry-k diseinatutako hotelean: Marques de Riscal ardogileek eraikitako Ardoaren Hiria, hain zuzen ere.

Ez naiz gaiztoa izango eta ez diot eskatuko sari hau ere nirekin partekatzea, nik uste dut Loik eta Enekok hori eta gehiago irabazita dutela, bikotea eta aita ikusteko ia txanda eskatu behar izaten baitute. ZORIONAK GUZTIOI eta ongi pasatu bertan, merezita daukazue eta. Hori bai, handik etorritakoan, hango esperientzia, horrelako hotel bat sekula zapalduko ez dugunoi kontatu. Ados?

Gaurko ekitaldiaren bideo txiki-txiki bat Youtubera igo dugu eta ikusgai hortxe daukazue. Denbora hartzen dudanean, emanaldiaren bideoa jartzen ahaleginduko naiz (baina hau ezin dizuet ziurtatu).

Sustatu

Gaur, arratsaldeko 6:30ean Arrasateko Klaustroan izango gara. Sustaturen 5. urteurrena ospatzeko antolaturiko jaia aukera paregabea baita Euskal Blogosferako aurpegi zahar batzuk berriro ikusteko eta ezagunak egiten zaizkigun izen batzuei aurpegiak jartzeko.

Baina ez da hori bertara joateko daukagun arrazoi nagusia, guretzat, Sustatu blog bat baino gehiago izan baita. Euskaraz idatzitako informazioa aurkitzeko aukera bakarrenetakoa izan da denbora luzez, eztabaidarako ia aukera bakarra, gauzak egiteko estilo berria, egunerokotasuna fokatzeko era berri bat… Horregatik guztiagatik eta beste gauza askorengatik, Sustatu Euskal Blogosferaren erreferente garbia izan da eta, nola ez, guretzat erreferente bat izateaz gain, laguntza eskaintzeko beti prest egon den talde jator bat.

Lasai, ez dizuet xaboia eman nahi. Ez dezala inork pentsa iPod bategatik makurtzen ari garenik, ezta pentsatu ere. Nik Benitoren Baldorba edo Klaus Nomiren kantak entzuteko, nahiago ohiko tresnak eta bafleak. Ez dut uste, baina, nire taldekideek gauza bera esango dutenik. smile

Egia esan behar baldin badut, gaurko hitzaldiak ongi egongo dira, baina itxaropen handiagoak ditut ondorengo “aperitive”an (egongo da, ezta?), batez ere nire bi kideengatik. Hauek, horrelakoetan, duten sakea agerian uzten baitute.

Bukatzeko, ospakizuna behar bezala igarotzea eta hartu-emanak sendotzeko aukera ez galtzea opa nahi diet bertara joango diren guztiei.