Gaurtik aurrera gure blogeko alboko barran atal berri bat izango duzue. Kalitatearen ereduari jarraituz “benchmarking” egitea otu zaigu 
eta Sustatun dagoen “Jamaika ikusteko…” antzekoaren zerbait txertatu dugu. Zerrenda horretaan IKTerook del.icio.us bildutako azken horren berri izango duzue. Irakaskuntzarekin zerikusia izango dute hauetako gehienek baina beste gaien ingurukoak (wordpress, diseinua…) ere azalduko direla ziur egon. Gure del.icio.us-eko zerrendara harpidetu naahi izanez gero RSS jarioa ere ipini diogu. Interesgarria izango zaizuelakoan…
Urtea: 2005
Egia al da?
Azaroak 18, ostirala, zalantzarik gabe egun berezia, buruan mila sentipen eta emozio, horien artean poza eta nekea. Ikastolako atea zeharkatu eta etxerantz nindoala, ordura arte ikusteko aukerarik izan ez nuen arratsaren goria benetan ederra. Irri eta algara DBH2ko ikasle talde bat zetorren estali berri dugun patiotik ikastolako aterantz eskola kiroleko entrenamendua bukatuta. Elkarrekin topo egin genuenean, jakin min handiz izenburuko galdera egin zidaten. Egia al da? Lortu al dugu urrezko Q-a? Asko poztu ninduen galderan dagoen dugu aditzak. Hizketan luze jardun genuen ikastolako atarian ikasle koadrila jator eta alaiarekin.
Ustez solasaldia amaitu eta pausoa ematearekin batera, ihes egin nuen bezperako egunera, ostegunera. Azaroaren 17an Bilbon, Euskadiko Irakaskuntzako Kooperatiben Batzarra ospatu genuen. Pedro Miguel Etxenike zientzialari ospetsuak hitzaldi zoragarria eskaini zigun “Zientzia eta sormena irakaskuntzan” izenburuarekin. Hori bai kalitatea!. Oso gutxitan jaso ditut honelako erregaliak, bere jakinduria, komunikatzeko gaitasuna eta umorea maisuki konbinatzen ditu Isabako maisu handiak. Ba al dakizue zer esan zuen besteak beste? Cambridge edo Harvard-eko unibertsitatean egin berri duten ikerketa batek dioenez gizakiok asko jota, 20 minutuz manten dezakegula arreta hitzaldi edo saio baten aurrean. Hortik aurrera deskonektatu egiten dugula eta era guztietako fantasietara ihes egiten dugula…, beraz irakaskuntzan gabiltzanok badugu zer aldatua eta hobetua. Nik ere bai, ezin egin sermoi luze eta aspergarririk.
Esan bezala, Etxenikek kalitate handiko hitzaldia eskaini zigun, eta aipatu zigun XX. mendea zoragarria izan zela zientziaren garapenari dagokionez. Baina esan zigun frakaso handia izan zela gizartearen kohesio eta elkartasunari dagokionez. Balioak… irakaskuntzan hainbat aldiz aipatu baina behar den kalitatez jantzi ez ditugunak.
Bilbotik Ordiziara itzuliz, ostiral arratsaldean sentimenduak tropelka, alde batetik helburu garrantzitsu baten lorpena, lortu dugu! lortu dugu! urrezko Q-aren dizdira sumatzen da. Baina errealitateak berehala dio urrearen dizdira baina anitzez ederragoa eta beroagoa dela umiltasunaren dizdira. Alegia, hezur, mamizkoak garela eta erori altxa jardungo dugula ikusi eta ikasi, hobetu eta hobetu nahian eguneroko lanean. Hezur mamizkoak eta azala etorri zait burura. Etxenikek esan bezala, uste dut nik ere deskonektatu dudala. Derrepentean azalak kezkatu nau, heldutasunarekin geroz eta zimur eta azal gehiago!
Baina goazen gauza serioetaz hitz egitera, ahalegin izugarria dago gaurko egunaren atzean, urteetakoa, kasik 8 urte daramatzagu ibilbide honetan. Norbaitek esango balu, aho beroaldi batean, marketing hutsa dela kalitatearena, oso, oso, oso oker dabilela esango diogu Jakintzaren ikuspegitik edo hemen burutu dugun prozesuaren ikuspegitik.
Geurea maratoia dela esaten genuen, karrera luzea. Zalantzarik gabe esan dezaket ondo prestatuta gaudela irakaskuntzaren maratoirako, mitxelin gutxi ikusten dudala Jakintzan, konformismo gutxi dago hemen. Aitzitik sormena, berrikuntza eta hobekuntza eguneroko ikur dira gurean. Ez al da hori kalitatea?.
DBH2ko ikasle alai eta jatorrak ikastolako atean galdetzen zuten, urrezko Q-a bai eta guretzat zer? Galderen artean beraien erantzun batzuk ere entzun nituen… Aurten ordenagailu berriak dauzkagu. Halako gaia aurten beste era batean ematen dugu…Oso gustura nabil Jakintzan, irakasleak oso jatorrak dira… Ziur nago hori eta askoz gauza gehiago nabarituko dituztela Jakintzako ikasleak. Izan ere kalitatea ez bada mamira iristen, alegia gela barruan egiten den lanketara, ezer gutxi balio du.
Burutazio horiekin eta ilunabarraren koloreek zerua sekula baino dotoreago margotzen zutelarik, etxerantz nindoala, buruan nituen Jakintzako gurasoak, oraingoak eta lehengoak, irakasleak, oraingoak eta lehengoak, ikasleak, oraingoak eta ikasle ohiak nola ez! Halako batean DBH2ko ikasle koadrila artetik Aupa Jakintza! entzun nuen. Begirada beraiengana itzuli eta pozik eta zoriontsu zeuden denak, baita ere tartean zen etorkin berria, orain dela 2 egun eskolarizatua. Kalitatea da etorkina ere honela sentitzea pentsatu nuen nirekiko. Horiek horrela ikusita zoriontsu sentitu nintzen ni ere eta ozen aldarrikatu nuen Aupa Jakintza!!!
Urrezkoak gara!
Blog hau martxan jarri genuenetik, tarteka tarteka gure ikastolan gertatzen direnen berri zuei helarazten ahalegindu gara, beti ere, gure esperientziak zuen mesedean jartzeko asmoz. Gaurkoa desberdina da.
Gaur eguerdian jakinarazi digutenez kalitatearen urrezko Q-a jaso dugu. Harro gaude, ezin dut ukatu: saria baino gehiago bere atzean dagoenarengatik. Hobekuntzarako konpromisoa, taldeko lana, barne antolaketa, proiektu berritzaileei aurre egiteko ausardia, erronkei aurre egiten ahalegintzen den irakaskuntza sistema… Hau guztia da nire ikastola barruan ikusten dudana eta saria sentimendu hau barnean dudala nireganatzen dut.
Harro nago Jakintzako hezkuntza komunitateko kide izateaz. Zorionak guztiei. Merezi duzue eta!
Webmasterrentzako baliabideak
Color schemes 2
Esperientziadun diseinatzailea bazara agian ez duzu beharko Color Schemes 2 bezalakorik, baina web eta aplikazioen diseinuan hasiberria bazara ziur eskertuko duzula webgune honek eskaintzen dizun laguntza.
Hona hemen webgunean bertan adierazten dutena aplikazio honen inguruan;
Los diseñadores experimentados escogen colores intuitivamente, muchas personas pueden “oler” qué colores van bien juntos y cuales no. Sin embargo, encontrar la combinación buena de colores a veces puede ser un trabajo largo y tedioso. La teoría del color hace el trabajo más fácil. Esta herramienta encontrará juegos de colores con los que puedes empezar, y puede facilitar tu búsqueda de la paleta de colores óptima.
Esta aplicación genera esquemas de colores de varios tipos. Cada esquema está basado en un color (base) que se complementa con colores adicionales que dan juntos la mejor impresión óptica – usando uno de los algoritmos auténticos.
CSSVista
Ez dakit zuei baina niri askotan gertatzen zait blogaren CSSan aldaketak egin ondoren arazoak izatea nabigatzaile desberdinetan bistaratzerakoan. CSSVistarekin aukera daukazu CSSan aldaketak egin eta denbora errealean nabigatzaile bietan (Internet Explorer eta Firefox-en) aldaketa horiek izango duten itxura ikusteko. Aplikazioa zuen ordenadorera jaitsi ondoren, instalatu egin beharko duzue. Aplikazioa exekutatzerakoan nabigatzaile antzeko bat zabaltzen da. Helbide barran bere CSSa aldatu nahi duzuen web orriaren helbidea idatzi beharko duzue eta denbora tarte baten ondoren kodea ezkerraldeko zutabean izango duzue. Bere eskuinean, leiho horizontaletan, kode horri dagokion aurre-bista ikus dezakezue bi nabigatzaile horietan. Oso praktikoa benetan. Halere, kontutan izan behar duzue aplikazioa oraindik beta fasean dagoela, beraz, baliteke erroreak agertzea.
Bestalde, CSSVista garatu duen etxeak bere webgunean eskaintzen duen produktua ere oso interesgarria dela iruditzen zait. Aukera ematen dute edozein web orri baten bateragarritasuna aztertzeko merkatuan dauden nabigatzaile desberdinekin. Zoritxarrez aukera hau erabiltzeko ordaindu beharra dago.
Irudien oinarrizko edizioa Photoshop-en
Zuen irudiak webgunean txertatzerakoan, Photoshop-en oinarrizko ukituak eman nahi badizkiozue jo ezazue hona. Zortzi urratsetan zuen argazkien kalitatea nola hobetu daitekeen oso era sinplean azaltzen da. Gutako gehienontzat baliagarriak izango direlakoan nago.
Javascript baliabideak
Javascript baliabideen zerrenda luzea duzue ondorengo helbidean: dokumentazioa, demoak… Agian weben diseinuan denbora gutxi daramagunontzat hemen aurkitu daitekeen informnazio asko konplikatuegia izan daiteke. Edozein eratara interesgarria izan daiteke bistazo bat botatzea.
AJAX baliabideak
Web 2.0 delakoren inguruan aplikazio batek garrantzia berezia hartu badu hori AJAX da. Zuetako norbaitek bere webgunean aplikazio honekin garatutako elementuak txertatu nahi baditu jo ezazue web honetara. Teknologia berri honen inguruko informazio ugari aurkituko duzue.
Wi-Fiaren iraultza gertu dago
Badirudi Wi-Fiak azkenaldi honetan indarberritze bat jasaten ari dela, haririk gabeko teknologia honekin lotutako albiste kopuruak asko handitu baitira aspaldi honetan.
Gaur bertan irakurri dut Intel, Lycos eta Telefonica-k akordio bat sinatu dutela wi-fi konexio puntuak lokalizatzen dituen software bat garatzeko. Aplikazio honen izena (nola ez!) SNIFFER da eta hemendik jaitsi dezakezu. Sniffer honen bitartez, inguruko wi-fi puntuak lokaliza ditzakezu, konexioaren kostua eta zer operadoreak kudeatzen duen ere jakin dezakezularik.
Bilatzailea erabilgarri dago jada; une honetan, Espainian erregistraturiko 1700 “hotspot” baino gehiago indexaturik ditu. Datu base hau etengabe eguneratzen omen da eta bertan aurki daitezke erakunde, taberna, hoteletan… aurki daitezkeen konexio puntuen ezaugarri guztiak. Gerora begira, asmoa dago Europako beste hainbat herrialdetako wi-fi konexio puntuak lokalizatzeko aukera izatea ere.
Pentsatzen dut sistema honen bitartez FON sarea osatzen duten wi-fi konexioen bilaketa egiteko aukera ere izango dela. Jazztel-en fundatzailea den Martin Varsavsky-k bultzaturiko sistema honen bitartez norberak duen wi-fi sarearen banda zati bat besteekin parteka dezake, “fonero” guztiek utzitako banda zati guztiekin wi-fi sare global bat sortu nahi delarik.
Zure konexioa konpartitzerakoan hiru eratara joka dezakezu:
- linus bezala: zure konexioa dohain eskaintzen duzu, FON sarea edonon dohain erabiltzeko aukera izatearen truke
- bills bezala: zure konexio banda zati bat konpartitzen duzu diru kantitate baten truke. Kasu honetan ez duzu FON sarea dohain erabiltzeko eskubiderik baina aliens-ek euren konexioa erabiltzerakoan ordainduko duten diruaren %50a irabazten duzu.
- aliens bezala: wi-fi propiorik ez baduzu ere FON sarera konekta zaitezke diru kantitate bat ordainduz: 5€ 24 orduko edota 40€ hilabeteko.
Kuriositatez, Ordizia inguruan FON sarea nola dagoen ikusi dut eta esan beharra daukat espero nituen baino wi-fi puntu gehiago aurkitu ditudala (batez ere Donostialdean). Agian gure ikastolako wi-fi konexioa konpartitzeko aukera interesgarria izan daiteke FON hau. Informazio gehiago Sustatun.
Horrelako sareak eta laster ezarriko den WiMAX teknologia berria (Euskaltel laster hasiko da produktu hau garatzen Tolosaldean) hedatzen diren heinean, garrantzia berezia hartuko dute haririk gabeko konexioa eskaintzen dituzten tramankuluak. Zalantzarik ez dago edonon konektatuta egoteak aukera berri oso interesgarriak ekarriko dituela. Adibidez, wi-fia duten argazki kamerak (jasotako argazkiak une berean internetera igotzeko aukera eskainiko lukete, edonon zaudela ere), bideokontsolak (wi-fi bitartez erabiltzaile desberdinen arteko partidak jokatzeko)… eta, nola ez, wi-fi konexioa eskaintzen duten telefono mugikorrak, VoIP teknologian oinarritutako telefono deiak egiteko aukera eskainiko baitute oso prezio baxuetan.
Wi-Fiaren iraultza gertu daukagu mutilak!