Gure ikastolako web orria Firefoxen funtzionatzen duenetik, ez dut inongo arrazoirik bilatzen Internet Explorer erabiltzeko. Beharbada, datorren hilabeterako ahaztuta izango dut “e” urdin horrek nire ordenagailuaren pantailan zer arraio egiten duen.
Bi puxtarri Muchachada Nui-koentzat.
Bideo hau oso deigarria iruditu zait eta ez dut uste iragarpena oso oker dagoenik. Zuei berdin iruditzen al zaizue?
Bihar, Miñanoko Teeknologia Elkargoan eta Araba Enpresa Digitalak antolatuta, Enpresa 2.0 izeneko jardunaldia ospatuko da eta gure ikastolak bere aurkezpena egingo du.
Egia esan behar badugu, bertara joateko gonbitea jaso genuenean, kudeaketa eta etengabeko hobekuntzarekin zerikusia izango zuelakoan geunden, baina berehala ohartu ginen hori baino gehiago nahi zutela. Gure ikastolak arlo horretan duen eskarmentuaz gain, Web 2.0ko aplikazioen erabilerak ibilbide horretan izan duen eragina eta gure ikastolari eginiko ekarpena eta enpresa munduarentzat interesgarriak izan daitezkeen esperientziak azaltzea nahi dute.
Eta horixe da bertan azaltzen saiatuko garena. Ez da lehenbiziko aldia gure ikastolaren esperientziak enpresa munduarekin partekatzen ditugula, baina bai ordea Teknologia Berrien ikuspegia tartean dela. Hori dela eta, guri egokitu zaigu lan honen ardura nagusia eta horretan aritu gara buru-belarri azken egunotan.
Gurekin batera, Julen Iturbe arituko da saioa irekitzen eta Marko Txopitea saioaren azken hitzaldian. Ez dakit hauen pareko maila emateko gauza izango ote garen, baina ahalegin guztiak egingo ditugu euren mailara hurbiltzeko.
Bihar erabiliko dugun aurkezpenak gauza gehiegirik esaten duenez, jarraian, hitzaldian aipatuko ditugun puntu nagusien laburpen bat jartzen dizuegu.
Hasieran, gure ikastolaren inguruko datu batzuk eta azken urteetako ibilbidea laburtuko dugu. Jarraian, gure ikastolaren egungo egoera eta etorkizunerako erronkak aipatuko ditugu.
Sarrera honen ondoren, ibilbide horretan Web 2.0ko tresnen erabilerak gure ikastolari eskaini diona eta beste erakundeentzat baliagarriak izan daitezkeen aspektuak jorratzen hasiko gara. Atal honi hasiera emateko, JARRERA 2.0 izenaz batailatu dugunarekin hasiko gara. Hemen, gure ikastolan garatzen ari den jarrera aktiboa eta eraginkorraz mintzatuko gara. Segidan, informazioa eta ezagutzaren kudeaketaz eta horretan Web 2.0ko aplikazioek hartzen duten protagonismoaz ariko gara. Jarraian, ezagutza eta informazioarekiko erakundeek azaltzen duten jarreraz hitz egingo dugu. Partekatzearen garrantzia azpimarratuko dugu. Ildo beretik jarraituz, egungo teknologiek lan munduan ahalbideratzen dituzten aukera berriak (merkatu berriak, harremanak, negozio aukera berriak…) aipatu eta Web 2.0ko aplikazioen erabilerak ekar ditzakeen abantailak azaltzen ahaleginduko gara. Jorratuko dugun beste atal bat bisibilitatearena izango da. Izan ere, Web 2.0ko aplikazioen erabilerak erakunde bati bisibilitate hori lortzeko egundoko aukera ematen baitio. Azkenik, berrikuntzaren gaia jorratuko dugu. Web 2.0ko aplikazioen erabilerak gure ikastolara ekarri dion berrikuntzarako grina eta kontzientziazioa ez da nolanahikoa izan eta horixe ere partekatuko dugu.
Oraintxe jakin dut Firefoxeko garatzaileek Firefox 3ren lehenengo beta publikoa denon eskura ipini dutela. Horrelakoetan gertatzen den bezala bertsio hau oraindik ofiziala ez dela gogoratzen digute, alegia, akatsak topa daitezkeela abisatzen digute. Aurreko beta bertsio ugari probatu izan ditut (alfaren bat edo beste ere) eta, egia esan, oraindik ez didate arazo berezirik eman. Beraz, une honetan martxan dagoen deskarga amaitu bezain pronto instalatzeko asmoa dut. Irrikitan nago bertsio honetarako aurreikusi diren hobekuntza horiek probatzeko. Kontatuko dizuet 
Tarteka tarteka, nire del.icio.useko jarioek sorpresatxo pozgarriak ekartzen dizkidate. Gaur bertan, Esaidazu Euskaraz! wikiliburuaren berri izan dut. Proiektuaren atzean Euskal Herrian bizi den Alan R. King hizkuntzalaria dago. Horrelaxe aurkezten du bere burua Alanek:
Kaixo! Alan R. King dut izena. Euskal Herrian bizi naiz. Beste herri hauetan ere bizi izan naiz noizbait: Katalunian, El Salvadorren, Estatu Batuetan, Galesen eta Ingalaterran (azken honetan jaio nintzen). Hizkuntzalaritza ikasi nuen Estatu Batuetan eta Inglaterran. Zenbait liburu eta abar idatzi ditut, gehienak euskarari buruz edo nawaterari buruz.
Herri eta hizkuntza txiki, baztertu, minorizatu eta zapalduen askatasuna, garapena eta eskubide guztiak defendatzeko, eta batez ere berauen berri emateko, ahaleginak egin eta egingo ditut neure bizitzan zehar, ditudan baliabideekin, eta Wikipedian ere horixe egiteko asmoarekin nator.
Hizkuntzalaria naiz formazioz eta izatez. Gainera, esperientzia ugari daukat hizkuntz irakasle eta itzultzaile bezala. Nire kontura lan egiten dut eta une honetan ez nago erakunde akademiko batean.
Nire interesguneen artean, hizkuntzen ikerketa eta hizkuntzen irakaskuntza dira aipatzekoak, eta nire lan askoren enfokea, modu batean edo bestean, munduko hizkuntza txiki, minorizatu edo arriskupekoak ezagutu, landu eta babesteko ahaleginetan zentratu da.
Del.icio.usen jasotako erreferentziei erreparatuz (hogeita hamar laster-marka eginda daude dagoeneko eta denak azaroan) proiektua nahiko berria dela dirudi.
Tira, ez nago ni oso bustita filologia eta hizkuntzalaritza kontuetan baina, lehen begiratu batean, proiektu interesgarria dela iruditu zait. Zuetako norbaitek ba al du honen inguruko berri gehiagorik?