2006 – 7 orrialdea

WordPressen ondorengoak

Gogor aritu dira lanean azken urte honetan Matt & Company. WordPress-en garatzaile nagusia eta bere taldea ez dira lo geratu honek izan duen arrakastaren ondoren eta beta fasean zituzten hainbat produktuen bertsio ofizialak kaleratu dituzte azken egun hauetan.

Duela gutxi bbpress, foroak sortu eta kudeatzeko aplikazioaren 0.72 bertsioa ipini dute kalean. WordPress bezala, oso erraz instalatzen den aplikazioa da. Gainera, lehenengoarekin sorturiko erabiltzaile datu-basea konpartitzeko aukera ereb eskaintzen du, hau da, blogea jadanik izena emanda duten erabiltzaileek fororako sarbide zuzena lortzen dute. Nik, dagoeneko, instalatu dut eta laister hasiko naiz nire ikasleekin erabiltzen.

Aplikazio berriekin jarraituz, gaur bertan kaleratu dute WordPress MU 1.0 bertsio ofiziala. Aplikazio honekin multierabiltzailedun multiblogak sor daitezke datu-base bakar batean oinarrituz. Duela hilabete batzuk aproba batzuk egin nituen, bai WordPress MU-en beta bertsioarekin eta baita honen antzekoa den Lyceum aplikazioekin ere, baina berehala utzi nuen alde batera, gure intranetean hauekin kudeaturiko blog sistema bat sortu eta kudeatzeko asmoa: arazo gehiegi, bata ala bestearekin, blogak abian ipintzeko. 1.0 bertsio ofizial honetan, badirudi asko sinplifikatu dela instalazio prozesua. Ez dakit, probatu beharko dut ea egia den eta esango dizuet.

WordPress MU-en garapenean, garrantzia berezia izan du dohaineko blogak sortzeko WordPress.com atariak. Azpian WordPress MU bat instalatuta duen gune honen arrakastaren ondorioz, MU bertsioa izugarri hobetu dute, era berean, WordPress.com zerbitzuari hobekuntza ugari gehitu dizkiotelarik. Nire uste apalean, WordPress.com une honetan blogak dohain sortzeko dagoen plataformarik erabilterrazena, sendoena eta seguruena da. Une honetan blogaren ia interfaze osoa euskaraz konfigura daiteke (oso baliagarriak horretarako widget bitarteko pertsonalizazio sistema) eta , oker ez banago, dagoeneko euskaraz kudea daiteke admin gune osoa.

Garai berriak

Garbi dago garai berrietan murgilduta gabiltzala. “El florido pensil”-etik “e-learning” plataformetara ia ohartu gabe igaro gara. Atzo, ordu batzuk eman nituen online nire ikasleekin lanean. Niretzat, ez da oso ohikoa, baina pozgarria izan da eurekin izandako harremana eta lorturiko emaitza.

LHko 5. mailako ikasleei (10 urteko ikasleak dira) Jolausek azaldutako korreoa erabiliz, etxerako lana jarri nien ostiralean. Gelan, ipuina lantzen ari direnez, wiki bat sortu nuen (external link) istorio elkarreragile bat osa zezaten, baina wiki zer den oraindik ez dakite. Horrekin, euren jakin-mina piztu eta, aldi berean, zailtasunen aurrean irtenbideak bilatzeko ohitura indartu nahi nuen.

Bestalde, DBH 1eko ikasleek (12 urteko ikasleek), blog bana sortu dute Blogsomen (external link) eta dena Euskaratu behar dute. Epea astelehenean amaitzen zaie eta batzuk, azkenerako utzi dutenez, asteburu honetan buru-belarri aritu dira lanean.

Bada, atzo nire feed-ak irakurtzen ari nintzela, hara non sartzen den Eider nire Gtalk-en (external link). Eider 10 urteko neskato bat da. Bere korreoan nire mezua jaso eta agindutakoa egiten saitu zela, baina ez zuela ulertzen ipuinaren hasiera. Nik, ezin sinisturik, ea wikian sartu den galdetu nion. Baietz erantzun zidan, baina ipuinaren hasiera ez zuela ulertzen. Lagundu nion eta handik bost minutura, eginda zuela esan eta ikastolako taldearekin partidua jokatzera zihoala esanez, agurtu ninduen. Nik ezin nuen sinistu. Nola arraio lortu du, laguntzarik gabe, wikian alta eman eta mezua editatu? Wikian sartu eta hantxe zegoen berak utzitako arrastoa. Baina, zoritxarrez, eginiko lana gordetzen ez zuen asmatuko eta galduta zegoen. Hala ere, 10 urteko neskato honen ekintzailetasuna zoriontzeko modukoa izan da. Gurasoak ezagutzen ditut eta gai hauetaz ezertxo ere ez dakite, beraz, garbi daukat ez ziotela lagundu. Astelehenean galdetuko diot nola lortu duen, zein motako pausuak eman dituen, informazioa nola lortu duen, G-talk-en nola sartu den… Gelako beste inork ez du lortu oraindik.

Arratsaldez, antzeko zerbait gertatu zitzaidan. Lan bat prestatzen ari nintzela, Irati (DBH 1eko neska) sartu zen eta arazo larri bat zuela adierazi zidan. Sobra ere, neska koadrila bat elkartu zen bere etxean euskaratzeko falta zitzaizkien blogak bukatzeko eta, nola ez, ongi pasatzeko. Azken hori, batez ere. Izan ere, beste blogetan eginikoa errepikatzea besterik ez zuten, baina ez zuten asmatzen. Nik pista bat eman nien eta ikusi nuen nola poliki-poliki euren blog guztiak Txirritaren hizkuntzan agertzen ziren. Blog bakoitzarekin amaitzerakoan, festatxo bat antolatu zuten (G-talk-en behintzat).

Horrekin, hausnarketa txiki bat egin eta zuekin partekatu nahi dut. Atzokoa, ez da beste munduko gauzarik izan eta, beharbada, ez da egungo errealitatearen isla, baina garbi uzten du praktika berriak zabaltzen ari direla gure ikasleen artean eta ezin diegula bizkar eman. Honekin ez dut esan nahi irakasleok asteburuetan ikasleen esanetara egon behar dugunik, ezta gutxiagorik ere. Baina, aukera eta praktika berri hauek aintzat harturik, garatu nahi ditugun helburuak lortzeko bide ahaltsu eta zabal baten aurrean gaudela ezin dugu ukatu. Behin eta berriz errepikatzen dugu ordenagailu asko eta potenteak izateak ez duela, berez, inongo berrikuntzarik bermatzen. Benetako berrikuntza metodologiarekin lotuta dago, eta hau da, azken finean, baliabide bat edo beste bultzatuko duena. Hezkuntzaren munduan oso barneratuta dagoen kontzeptu okerrak, berrikuntza baliabideekin nahastera garamatza, baina aspertuta gaude “el florido pensil”-etik ateratako metodologiak ordenagailuz lagundurik ikusteaz. Bada garaia, Teknologia Berriek eskaintzen dizkiguten aukera berriak hezkuntza eraginkor baten mesedean jartzeko. Lan kolaboratiboa bultzatzen duten aplikazioak arruntak bilaka ditzagun gure ikasleentzat, ekintzailetasuna indartzen dituzten jarduerak proposatu, jakin-mina indartzeko baliagarriak diren proposamenak luzatu, ezagutzaren kudeaketarako baliagarriak diren tresnak gure ikasleen esku jar ditzagun…

Jakin, badakit, aipaturiko aspektu horiek teknologia berriak erabili gabe sustatu daitezkeela, baina era berean, konbentzituta nago IKTek laguntza paregabea eskaintzen digutela lan horretan eraginkorragoak izateko eta metodologia tradizionalek eskaintzen ez dituzten abentaila batzuk gure esku jartzen dizkigutela.

Zer diozue honi buruz?

IE 7. Aspirinak, mesedez

Firefox IE jaten Arazoz beteriko bost urte igaro ondoren, iritsi da etengabe iragartzen zen Internet Explorer 7. Kasualitatez (ohi denez, esan beharko nuke?), bere debutaren egun berean, segurtasun arazo larri bat aurkitu diote. Web diseinatzaileak dardarka edo haserre daude. Estandarrak soberan daude

Hori gutxi balitz, eginiko frogetan, Firefoxen abiadura IEren bikoitza dela egiaztatu dute.

Gauzak horrela, saltsa hauetan gabiltzanok, aspirinak eskura jartzea behar-beharrezkoa izango dugulakoan nago. Hala ere, oso zaila ez bazuten ere, hobekuntza dexentekin datorrela aitortu beharra dago.

Nik, lanarengatik, behar-beharrezkoa dut IE erabiltzea, baina, zalantzarik gabe, Firefox izango da nire nabigatzaile lehenetsia. Jada, asko gara horrela jokatzen dugunok, eta zuk? Zer nahiago duzu? Aspirinak edo lasai bizi?

Erabakia zurea da.

Gure irakasleen irakasle

Pasa den ikasturtearen amaieran, aurtengo ikasturterako IKT plana bukatzen ari ginela, IKTen inguruan formazio saiorik ez eskaintzea erabaki genuen. Pasa den ikasturtean, gure intranetaren funtzionamenduaren inguruko ikastaro trinko bat eskaini genien denei eta aurtengorako irakasleei atseden txiki bat ematea erabaki genuen.

IKT plana istear geundela, eskakizun berezi bat jaso genuen gure ikastolako irakasleriaren aldetik. Alde batetik, gure lanaren berri jakin nahi zuten, zertan ari ginen, zer ote zen IKTeroen bloga, zein zen gure lanerako filosofia… Bestetik, erabiltzen ari ginen tresnen inguruko ikastaro bat jasotzeko prest egongo zirela ere jakinarazi ziguten. Benetan harrituta geratu ginen eskari hori IKT taldean jaso genuenean: beldur ginen ez ote genituen irakasleak gehiegi agobiatuko hainbeste IKTekin eta hara non diren eurak formazio beharra eskatzen dutenak. Ez dago esan beharrik sekulako poza jaso genuela, ez baita batere erraza horrelako jarrera baikorrak topatzea IKTekiko irakaskuntza munduan. Lagunak ditut, ni bezala, dinamizazio lanetan dabiltzatenak eta badakit zenbat arazo izaten dituzten IKTen erabilera bultzatu nahi dutenean euren ikastoletan. Onartu beharra daukat gure lankideetaz harro sentitu ginela taldekide guztiak izandako iniziatibarengatik.

Garbi genuen horrelako iniziatiba bati zuhurtasunez erantzun behar geniola. Gure asmoa euren asetze maila ahalik eta handiena izatea zen. Helburu nagusia internet eta IKTen inguruan erabil daitezkeen tresna berrien inguruko trebetasun minimoak jasotzea zen. Baina onartu behar dugu, helburu honetaz gain, prestakuntza saio hauei datozen urteetan jarraipena ematea ere beste helburu nagusietako bat zela. Gauzak horrela ikastaroen antolaketari ekin genion. Hona hemen, hartu genituen erabakiak:

Izen ematea librea izan behar zen: helburua ez zen irakasle guztiek web 2.0, webquest-ak edota wikiak zer diren jakitea. Ezin da ukatu landu beharreko kontzeptu batzuk konplexu samarrak direla eta hainbat tresnekin trebatzeko denbora dezente behar dela. Beraz, pentsatu genuen ikastaroa benetan motibatuta zeuden irakasleen artean bultzatu behar genuela.
Espektatibak ondo ezagutu behar genituen: hasieran egindako eskaria nahiko orokorra zela uste genuen. Zerbait gehiago konkretatu beharra zegoela ikusten genuen. Horretarako bilerak antolatu genituen etapaz etapa, zeuden asmo edo iritzi desberdinak ezagutu nahiean.
Ikastaro mailakatuak egin behar genituen: alde batetik, irakasleengandik jasotako prestakuntza beharrak nahiko ezberdinak ziren etapa desberdinetan. Bestalde, askok azken hemezortzi hilabete hauetan IKTerook ikasi dugun guztia ordu gutxi batzuetan jasotzeko nahia ere luzatu ziguten. Garbi dago, honek mailakatze bat eskatzen zuela landu beharreko edukietan
Erabateko erantzukizuna behar zen gure aldetik: kontzienteak ginen horrelako eskaera bati buru-belarri erantzun behar geniela. Ikastaro ezberdinetan irakasle bakar batek izena ematen bazuen ere, irakasle horri gure indar guztiekin erantzun behar geniola garbi genuen. Guk jaso duguna besteei transmitituz lortuko dugu, poliki-poliki, IKTen inplementazioa gure ikastolan errealitate bat izatea. Aurten talde txikiak izanda ere, irakasleak kontent uzten baditugu, garbi daukagu datorren urtean ikasle kopuruak gora egingo duela

Egoera honen aurrean, hamar orduko hiru ikastaro prestatzea erabaki genuen:

Web 2.0 eta Blogak: HIKHASIk antolatutako ikastaroan landutakoa kokatu genuen hemen. Web 2.0, sindikazioa, social bookmarking, web soziala, blogak… Gure iritziz XXI. mendeko irakasle batek ondo menperatu beharko lituzkeen oinarrizko tresnak. Irakasleei aurretik esan genien bezala, konplexutasun maila altuko ikastaroa baina, era berean, onura handikoa gure eguneroko lanerako. Ikastaroaren ardura Mikelek hartu zuen
Tresna berriak irakaskuntzan: webquest, webquestions, wiki, Moodle… Arlo kurrikularrean definituriko helburuak lortzeko jarduerak, beste era batera, beste tresna batzuekin lor daitezkeela erakutsi nahi genien. Tresna hauen konplexutasuna hain handia ez dela erakutsi nahi genien ere eta, bide batez, sorturiko material berriak denon eskura jarriz, komunitatea sor dezakegula konbentzitu nahi genituen. Beraz, ikuspegi praktikoa izango lukeen ikastaroa, zalantzarik gabe. Ikastaroaren ardura, nola ez, Maiterena izango zen.
Argazkigintza eta bideogintza digitala: hainbat etapetatik (HH eta LHtik, batez ere) euren ikasleekin argazkiak eta bideoak maneiatzeko beharra helarazi ziguten. Txikitxoen bideoak ateratzen dituztenak, ikasleekin elkarlanean aldizkariak eta entziklopediak sortzen dituztenak… oinarrizko prestakuntza baten beharra somatzen zuten. Eta, zergatik ez, bide batez euren etxeetan dituzten argazki eta bideo-kamera digitalak erabiltzen ikasten bazuten, askoz hobe!! Horrelaxe Photoshop Elements eta Pinnacle Studio programen oinarrizko erabilera azaltzea erabaki genuen. Niri egokitu zitzaidan ikastaro honen ardura.

Atzo eman genien hasiera Maite eta biok, gure bi ikastaroei. Hauek bukatu bezain pronto, emango dio hasiera Mikelek bereari. Guztira irakasleria osoaren %70 inguru eman du bere izena ikastaro ezberdinetan, hauetatik talde handi batek, lehenego bi ikastaroak burutzeko konpromisua hartu dutelarik (guztira hogei orduko formazioa, ez da txantxa, eh?). Ez dago esan beharrik sekulako poza eman digula partaidetza hain altua izan dela ikustea. Garbi dago irakasleek heldu diotela euren erronkari; orain gure txanda da. Kontatuko dizuegu zein izan den esperientzia pozgarri honen inguruan egingo dugun balorazioa

Amaitu aurretik hemen uzten dizkizuet, nire taldeko kideentzat prestatu ditudan aurkezpen bi. Lehenengoan irudi digitalen oinarrizko ezaugarriak azaltzen ahalegindu naiz eta bigarrenean, Hp eskaner bat erabiliz, argazkiak eskaneatzeko jarraitu beharreko prozedura. Oso aurkezpen xumeak dira baina agian baliagarriak izan daitezke zuetako norbaitentzat. Badakizue, ohitura onak ez dira galdu behar!

IKTeroen tresna barra

Nazkatuta ohiko tresna barrekin? Ez duzu zure gustuko bat topatzen? Bada, eraiki ezazu zeurea!!!

Gaur, ez galdetu nola, baina Conduit izeneko orrira iritsi naiz eta “Create Toolbar” irakurri dudanean, nire arreta bereganatu eta jakin-mina piztu da. Hasteko, logoa txertatzeko aukera eskaintzen didanez, gure ikono txikia sartu dut. Jarraian, bilatzaile bat txertatzeko eskatu dit (Google, bere bertsio ezberdinekin, bakarrik azaltzen da eta ez dut Google.eu topatu Smilley Negarrez ). Gauzak horrela, google.com hautatu dut. Ondoren, esteka bat jartzeko aukera eman dit (gero editatu dudanean, ezabatu egin dut) eta gure ikastolakoa jarri dut. Azkenik, tesna barrari izena emateko eta pasahitza jartzeko aukera esakini dit. Atal horretan, aipaturiko datuaz gain, zure korreo kontua eskatzen dizu, hizkuntza ezartzeko aukera (hemen ere ez dut euskararik topatu) eta domeinu bat hautatzeko (zerrenda itxia da eta ezin da zure domeinua erabili). Honekin, “Create my toolbar!” izenko botoia sakatu eta listo. Zure toolbar eginda daukazu.

Baina hoberena gero dator, izan ere, aukera gehigarri ugari eskaintzen dizu zure tresna barra pertsonalizatzeko. Adibidez, nik hasieran jarritako ikastolako esteka kendu egin dut eta ondorengo elementuak txertatu ditut:

RSS jario irakurgailua
Albisteak
Posta elektronikoa abisatzeko
Irratia
Eguraldia

Elementu hauek denak konfiguratu egin behar dira eta gure tresna barran honako datuak sartu ditut:

RSS jario irakurgailuan jario hauek: Euskaljakintza, Jakinstein, Ordizia, Jakinmin, Argitxo, Galtzagorri, Sustatu, Berria, Zabaldu eta del.icio.us. Nolanahi ere, editatzeko aukera daukazu eta zureak gehitu, hauek kendu…
Albisteen eremuan: Berriakoak sartu ditut
Posta elektronikoa abisatzeko gunean: Norberak bere kontuak sartu behar ditu, baina hauek onartzen ditu: Gmail (gmail zure domeinuarekin ez du onartzen), Yahoo, Hotmail eta POP3 kontuak
Irratian: Euskadi irratia sartzeko esan diot baina ateratzen dena Radio Euskadi da. Podcast-ak txertatzeko aukera ere badago. Ni saiatu naiz Irratia.com sartzen eta ez dut lortu. Ziur, zuek ni baino iaioagoak zaretela eta lortuko duzue.
Eguraldia: hemen ere, norberak kokatu beharko du bere hiria (ordizia ez da azaltzen).

Arestian aipaturiko aukeraz gain, beste aukera batzuk dauzka tresna barra honek: esteka botoia (lehen kendu dudana), Gogokoen menua (norberak konfiguratu beharko dituenak), mezu kutxa (RSS bidez mezuak bidaltzeko-jasotzeko aukera), banatzailea, testua azpimarratzeko koloreak, mezu pertsonalizatua agertzeko gunea, Txata, Pop-Up leihoen blokeatzailea, HTML bidez osagarriak txertatzeko aukera. Ikus dezakezuenez, aukera ugari tresna barra guztiz ( beno, ezin da dena euskaratu) pertsonalizatua sortzeko.

Behin, osagaiak zehaztu eta gero, ematen dizuten helbidera joan eta hortxe deskargatu beharko duzu. Aukera bikoitza eskaintzen du: Firefox (hedapen edo gehigarri gisa instalatzen du) eta Internet Explorer. Gure tresna barra deskargatu nahi baduzu, hementxe topatuko duzu. Nik Firefoxen nahiz IEn instalatu dut eta primeran funtzionatzen du.

Baten bat animatzen bada eta aukera interesgarriak bilatzen badizkio, badakizue, hementxe daukazue aukera guztiokin partekatzeko. Portzierto, baten batek asmatzen badu podcast-ak txertatzen edota Euskadi Irratia (Euskaraz) eta ez Radio Euskadi (gazteleraz), esan dezala.

Estekak: