Artea gogoko baduzue, eseri zaitezte eta gozatu Blog d’una profe DIM izeneko blogean aurkitu dudan bideo zoragarri honekin.
Sei minutu eta hogeita hamazazpi segundo Artearen Historian murgilduta ibiltzeko aukera paregabea. Arteko irakasleek, bideo honekin badute zereginik, ezta?. Gure garaiko diaporamak baino erakargarriagoa bada, behintzat.
Asteazkenean UEUk unibertsitatea.net ataria aurkeztu zuen Zientziaren Kutxaguneko planetarioan. Egun batzuk lehenago, antolatzaileen aldetik gonbidapena jaso genuen ekitaldian hitz batzuk esateko eta gure txoko honetatik gure eskerrik beroenak eman nahi dizkiegu euskal unibertsitatearen unibertsoan sartzen uzteagatik.
Gu ez gara unibertsitate esparrukoak baina bai sentitzen dugu gure harremana zuzen-zuzenekoa beharko lukeela izan alor guztietan. Izan ere, guk elikatuko baititugu jakintzaz eta jakin-minez gerora unibertsitarioak izango diren ikasleak. Eta horrek, ezbairik gabe, adierazi nahi du bidea bera dela guztiontzat nahiz eta ibilibidearen fase ezberdinetan topatu. Beraz, elkarrekin partekatzeko ideia, egitasmo eta beste hainbat proiektu dezente izan ditzakegu eta aurkeztu genuen webgunea izan daiteke horren adibide garbi bat.
Unibertsitatea.net-ek baditu, gutxienez, bi puntu gurekin lotura zuzen-zuzena dutenak: teknologia eta orientazioa. Guretzat teknologia berrien erabilera nahiz orientazio zerbitzua zein baino zein garrantzitsuagoa da eta hori azken bi urteetan teknologia berrien esparruan gure ikastolan izan dugun mugimenduan isla daiteke. Lehendik ere, beste toki askotan bezala, gure arteko komunikaziorako, lanerako, gure apunteak izateko, eta abar erabiltzen genituen, noski, baina azken bi urte hauetan buruetan lehentxeagotik genuen erronka hiruri heldu nahi izan diegu, teknologia berriak zuzenean ikasleen mesederako erabili, web 2.0ren filosofia hedatu eta euskararen presentzia sarean zabaltzeari, hain zuzen ere. Denon eskura, dohain dauden tresna hauek gure geletara eraman nahi genituen azken finean.
Zeintzuk izan dira orain arte teknologia berrien erabileragatik jasotako onurak?
Dena den, nik esparru zehatz batean izandako aldaketa azpimarratu nahiko nuke, ikasle-ikase eta ikasle-irakasle arteko harremanean emandako urratsa, alegia. Harreman hauek ez dira klase orduetara mugatzen. eta ikasleen motibazioa, jakin-mina eta balorazioa nabarmenki igo dela esan daiteke.
Jaio berria den orientazioa.net guneak aukera hauek guztiak ematen ditu. Modu eraginkor batean kudeatzen bada eta harrera ona badu, potentzialitate handiko tresna da. Batxilergoko tutore naizen heinean, eta, ni bezala pentsatzen dut beste ikastetxe guztietako irakasle-orientatzaile eta tutore guztiak, beti gabiltza ikasketa unibertsitarioen informazio eguneratuaren bila. Esan behar, gure orientazioko ordu dezente ere ordenagailu gelan ematen ditugula gune honek eskaintzen hasita dagoen informazio horren bila. Zalantzarik ez dago, beraz, gune hau erabiliko dugula hemendik aurrera eta ahalik eta etekin handiena ateratzen saiatuko garela.
Bertatik bi atal azpimarratuko nituzke: ZER IKASI NON IKASI eta ORIENTAZIO ZERBITZUA. Unibertsitatera sartzear dauden ikasleek euskarazko zein ikasketak topa ditzaketen eta haiei buruzko zehaztasunak webgune bakar batean biltzea guri oso baliagarri gerta dakiguke. Gainera, bilaketa horiek modu erraz eta ezberdinetan egin badaitezke (jakintza arloa, zikloa, lurraldea, eta abarren baitan), are gehiago!
Hori interesgarria izanik ere, oraindik azpimarragarriagoa iruditzen zait informazioa partekatzeko ematen duen aukera: lanak, kezkak, zalantzak eta, batik bat, otsailetik aurrera abian jarriko den orientazio pertsonalizatua. Ikasleek zuzeneko informazioa jasotzea eta elkarreragitea garrantzitsua da oso, askotan propagandarako triptiko eta paperetan ez baita ematen eurak behar duten informazio guztia. Zuzeneko hartu-eman hori, nire ustez, aberatsagoa izan daiteke bai gure ikuspuntutik (informazio eta ahoku bila joaten garenon ikuspuntutik) baita unibertsitatekoen ikuspuntutik ere, elkarreragite horrek eraldatzeko eta hobetzeko bidea ere eman baitezake…
Honako hauek dira jada martxan dauden zerbitzuak eta hemendik gutxira martxan jarriko dituztenak (Berriatik aterata):
Jada eskura
2007-aren hasieratik
2007ko otsailetik
Mila esker berriz ere honelako ekitaldi batean gure ikuspuntua azaltzeko aukera eskaintzeagatik. Zorterik onena opa dizuegu ibilbide berri honetan, zuen arrakasta gu guztiona izango baita!
Bale. TiddlyWikirekin nire ikasle bakoitzak ariketak egiteko tresna arin, praktiko eta portablea dauka eskuartean. Baina oraindik konpontzeke geratzen zitzaidan nire buruhausteen bigarren zatia, alegia, non eta nola jaso nire ikasleek egindako ariketa guztiak, behin denak bildu ondoren, bakoitzak egindakoaren balorazio indibiduala modu erraz eta eraginkorrean egin ahal izateko.
Irtenbidea aurkitzea ez da erraza izan. Nahiz eta aukeratutako bidea ez izan perfektoena, duela gutxirarte nituen hainbat limitazio konpontzeko balio izan dit. Denbora pixka bat beharko dut oraingo egoerari behin-betiko soluzioa aurkitu arte (azpian komentatzen dudan bezala, pentsatzen dut irtenbidea Moodle–en eskutik etorriko dela) baina, bitartean, onartu behar dut gustura nagoela erabiltzen ari naizen tresnarekin.
Ariketen biltegia izango den aplikazioa bilatzeari ekin nionean, segituan pentsatu nuen sistemarik egokiena, zerbitzariaren aldetik lan egingo lukeen TW multierabiltzaile bertsio bat erabiltzea izango zela. Modu honetan, nire ikasleek, bakoitzari bere erabiltzaile kontu pertsonala sortu ondoren, etxean egindako ariketak bertan eransteko aukera izango lukete eta nik, nire aldetik, egindakoaren jarraipena eta balorazioa TWk aurkezten duen efikaziarekin burutzeko aukera izango nuke.
Oinarrian TWa duten horrelako zerbitzu bat baino gehiago aurkitu nituen. Nire ikerketen ondorioz, ZiddlyWiki, ServerSideWiki eta ccTiddly dira gehien erabiltzen direnak. Bakoitzaren ezaugarriak ondo aztertu ondoren, ccTiddly-ren aldeko apostua egin nuen.
MySQL-en gainean dabilen aplikazio honetan, oinarrizko HTML fitxategiak PHPn egindako hainbat artxiboen laguntza jasotzen du. Era honetan posiblea da TW fitxategi bakar baten gainean, erabiltzaile batek baino gehiagok euren tiddlerrak gehitzea, prozesu horretan segurtasun neurri egokiak aurretik definituz eta konfiguratuz.
Horrelaxe, ccTiddly-ren 1.0 bertsio jaitsi eta bere instalazio eta konfigurazio prozesuari ekin nion. Honatx jarraitutako bidea:
ccTiddly-k neurri handi batean nire beharrak asetzen dituen arren, garbi daukat erabiltzaileen kudeaketa beste era batera egin beharko dudala. Egokiena Moodle-en bitartez gauzatzea izango litzateke. Une honetan ezinezkoa dut hori egitea: alde batetik ez dago TWren inguruko modulurik. Axular ikastolako lagunek komentatu didatenez, pasa den MoodleMoot’06ean (eskerrik asko Xa2 
), datozen bertsioetarako TWren inguruko modulu bat garatzeko konpromezua hartuta omen dago. Halere, une honetan Moodle-en lanean ari diren garatzaileak, jsMath eta, batez ere, LaTEX-en aldeko apustua egin dutela iruditzen zait. Beraz, ez dut uste epe laburrean MathML-ren erabateko inplementazioa ikusiko dugunik Moodle-en barruan. Pazientzia eduki behar, bitartean.
Eta amaitzeko hemen duzue ikasle-irakaslearen ikuspegitik, etxerako lanak egin, jaso eta kudeatzeko jarraitzen den prozesua azaltzen duen bideo bat. Onartu behar dizuet izugarri kostatu zaidala bideoa grabatzea. Ez daukat ohiturarik mikrofonoa hartuta, ordenadorearen aurrean bakarrik hitz egiteko; urduri jartzen aniz eta etengabe trabatzen naiz. Egindako akatsak barkatuko didazutela espero dut.
Google-eko bideoa txiki samarra dela iruditzen zait, bertan azaltzen dudana detailez ikusi ahal izateko. Hemendik, 800x600eko bereizmena duen 24,5 MB-eko Flash artxibo bat (21 minutuko iraupena) ikusi ahal izango duzue. Interneterako konexio arina eduki beharko duzue bideoa jarraian ikusi ahal izateko.
Duela egun batzuk argitaratu nuen post batean, etxerako bidalitako lanen inguruan ikusten nituen arazo nagusienak plazaratzen ahalegindu nintzen. Aspalditik ibili naiz, ikusten nituen eragozpen horiei irtenbidea aurkitu nahiean baina ez da erraza izan. Boteprontoan eta gehiegi pentsatu gabe, ikasleei ariketak Word-en egin eta e-postaz bidaltzea otu zitzaidan baino garbi nuen metodo sinpleagoa, praktikoagoa eta, batez ere, eraginkorragoa izan beharra zeukala. Udara osoa eraman nuen handik eta hemendik, nahi nuena aurkitu nahiean eta nola erabiliz pentsatuz.
Lehenik eta behin, arazoak identifikatzea zen helburu nagusia. Ondoren, arazo hauei aurre egiteko, erabiliko nituen tresnen ezaugarriak zehaztea tokatzen zen.
Bi abiapuntu horietatik, lehenengoa burutzeko, TiddlyWiki-ra jo nuen. Jeremy Ruston-ek sortutako apikazio honen ezaugarri nagusienak hauek dira:
Hemen daukazue TWaren oinarrizko ezaugarrien inguruan Gorka Palazio irakasleak, YouTuben zintzilikaturiko bideoa:
Jadanik kalean da aplikazio honen 2.1.3 bertsioa. Aspalditik dago euskaratuta Tiddlywiki; Gorka Palaziok berak euskaratu zuen 1.2.38 bertsioa. Kontua da, TWaren garapenean aukera eta zerbitzu berriak eransten joan direla, aurretik egindako itzulpenak baliogabe geratu direlarik. Horrela, duela aste batzuk, Gorkaren itzulpena oinarri bezala hartuz, 2.0.11 bertsioa euskaratzeari ekin nion. TiddlyWikiarekin probatu nahi duenak hemendik jaitsi dezake euskarazko bertsioa.
USB batean inongo arazorik gabe gorde daitekeen aplikazio honek, halere, formula matematikoak idazteko aukerarik ez du eskaintzen. “Egongo ote da antzekorik baina formula matematikoak idazteko aukera izango duena?” galdetu nion nire buruari. Bila eta bila aritu ondoren, ASiencePad delakoarekin topo egin nuen. TWren gainean egindako moldatze honek abantail nagusi bi aurkezten ditu, batez ere, ikasleekin erabiltzerakoan. Alde batetik, HTMLArea izeneko WYSIWYG editorea integraturik dakar (ez banago oker Moodle-ek duenaren berdina da). Honen bitartez, ez da beharrezkoa wiki-hizkuntza ezagutzea testuari formatua emateko; honen bitartez, nire ikasleek euren apunteak botoi barra baten bitartez formateatu ditzakete, kode berezirik erabili gabe . Bestalde, ASCIIMathML eta ASCCISvg javascript fitxategien integrazioari esker, formula matematikoak eta mota guztietako grafikoak gehitzeko prozedura izugarri sinplifikatzen da. Java fitxategi hauei esker, formulak MathML lengoaian oinarrituz txertatzen dira TWan. MathML, XMLan oinarritutako lengoaia da eta hori da, hain zuzen ere, W3C erakundeak hobesten duena formula eta ekuazio matematikoak erabiltzerakoan. Ez dut LaTEX gehiegi ezagutzen baina adituek diotenez, azken hau askoz ere aberatsagoa eta indartsuagoa da formulak txertatzerakoan. Nire ustez MathML-n oinarritutako hau, askoz ere intuitiboagoa eta erabiterrazagoa da LaTEX baino; niri konplikatua egiten zait LaTEX-ekin lana egitea eta nire ikasleei oraindik gehiago. Horregatik, hain modu sinplean txertatzen direnez formulak, nire ikasleekin MathML-an oinarritutako hizkuntza hau erabiltzea erabaki dut. Eta egia esan, egun gutxi batzuen ostean, formulak inongo arazorik gabe txertatzen ikasi dutela esan beharra daukat
Hurrengo artikuluan komentatuko dizuedan bezala, arazo batzuk izan nituen ASciencePad-ekin. Hori dela eta, Bram Chen-ek, TW arrunt bati gehitutako HTMLArea pluginaren bitartez, sortutako TW berriarekin probatu nuen. Modu honetara, USB batean gordeta, ikasleek beti gainean eraman dezaketen “koaderno digitala” aurkitu nuen. Gelara sartu orduko, euren TWa ordenadoreari lotu, eta edozein motatako apunteak, oharrak edo albisteak jasotzeaz gain, euren etxeko lanak bertan apuntatu eta ondoren bertan egiteko aukera dute, hau guztia oso modu sinplean burutzen delarik.
Aplikazio hau probatu nahi duzuenok hemendik jaitsi dezakezue (bertsio hau ere euskaraturik dago). TWan txertatuko duzuen ASCIIMathML kodea, nabigatzaileak renderizatu ondoren, formula modura era egokian ikusteko, letra mota bereziak instalatu beharko dituzue zuen ekipoan. Hemendik jaitsi dezakezue letra motak instalatuko dituen exekutagarria. Azkenik esan, lehenetsitako nabigatzaile bezala Firefox erabiltzen baduzue, ez duzuela besterik behar izango. Baina Internet Explorer erabiltzen baduzue (nik 6. bertsioarekin egin dut proba bakarrik), ondorengo bi pluginak instalatu beharko dituzue: MathPlayer eta AdobeSVGview
Probatu eta esango didazue.
Informazio gehiago: Nire del.icio.us
Gaussianos izeneko bloga gaur ezagutu dut eta zeharo interesgarria iruditu zait matematika landu nahi duen edonorentzat.
Bitxikeriak, jokoak, aholkuak… topa daitezke bertan, baina gaur bertan argitaratutako bideo honek nire arreta bereganatu du. Ikus dezakezuenez, bideo honetan biderketak burutzeko sistema bitxia azaltzen zaigu. Zifra bakoitza dagozkion lerroen bitartez irudikatuz emaitza lortzeko bidea erakusten digu.
Ikusi eta esango diguzue zer iruditzen zaizuen.
